ଓଡ଼ିଶାରେ ଡାକ୍ତର ଅଭାବ : ଚିକିତ୍ସା ପାଇଁ ଧାଡ଼ିରେ ରୋଗୀ

କନକ ବ୍ୟୁରୋ : ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟର ଡାକ୍ତରଙ୍କୁ ଦେଖାଇବା ପାଇଁ ଟିକେଟ କାଉଣ୍ଟରରେ ଲାଗିଛି ରୋଗୀଙ୍କ ଲମ୍ବା ଧାଡ଼ି । ଡାକ୍ତର ସଂଖ୍ୟା କମ୍ ଥିବାରୁ ଟିକେଟ କାଟିବା ପରେ ବି ରୋଗୀଙ୍କୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡୁଛି । ରାଜ୍ୟର ପ୍ରାୟ ସବୁ ହସ୍ପିଟାଲର ସ୍ଥିତି ସମାନ । କିନ୍ତୁ ବିଶ୍ବ ସ୍ବାସ୍ଥ୍ୟ ସଂଗଠନର ମାନକ ଅନୁସାରେ, ୧ ହଜାର ଜନସଂଖ୍ୟାରେ ଜଣେ ଡାକ୍ତର ରହିବା କଥା । ଲୋକସଭାରେ କେନ୍ଦ୍ର ସରକାର ରଖିଥିବା ତଥ୍ୟ କହୁଛି, ଭାରତରେ ୧୨୮୪ ଜନସଂଖ୍ୟାରେ ଜଣେ ଏବଂ ଓଡ଼ିଶାରେ ୨୧୮୭ ଜନସଂଖ୍ୟାରେ ଜଣେ ଡାକ୍ତର ରହିଛନ୍ତି । ଯାହା ସ୍ବାସ୍ଥ୍ୟ ସେବାର ବିକଳ ଚିତ୍ରକୁ ପଦାରେ ପକାଉଛି । 

ସରକାରଙ୍କ ତଥ୍ୟ କହୁଛି ଓଡ଼ିଶାରେ ବର୍ତ୍ତମାନ ୧୨ଟି ସରକାରୀ ମେଡିକାଲ କଲେଜ, ୬ଟି ବେସରକାରୀ କଲେଜ ଓ ଗୋଟିଏ ଏମ୍ସ ରହିଛି । ଗୋଟିଏ ଡେଣ୍ଟାଲ କଲେଜ ଓ ଦୁଇଟି ପିଜି ଇନ୍‌ଷ୍ଟିଚ୍ୟୁଟ୍‌ କାର୍ଯ୍ୟକ୍ଷମ ଅଛି। ତେବେ ସରକାରୀ ମେଡିକାଲ କଲେଜ ଓ ବେସରକାରୀ କଲେଜକୁ ମିଶାଇଲେ ପ୍ରତିବର୍ଷ ପ୍ରାୟ ୨୨୦୦ ଡାକ୍ତର ବାହାରୁଛନ୍ତି । ଓଡ଼ିଶାରେ ସାଢ଼େ ଚାରିକୋଟି ଜନସଂଖ୍ୟାକୁ ଦେଖିଲେ ଡବ୍ଲ୍ୟୁଏଚ୍ଓର ମାନକକୁ ଛୁଇଁବା ପାଇଁ ଆହୁରି ୧୦ ବର୍ଷ ସମୟ ଲାଗିବ । ରାଜ୍ୟରେ ଡାକ୍ତର ନିଯୁକ୍ତି ସହ ୪ଟି ନୂଆ ମେଡିକାଲ କଲେଜ ଖୋଲିବାକୁ କନକ ନ୍ୟୁଜ ସ୍ବତନ୍ତ୍ର କାର୍ଯ୍ୟକ୍ରମ ହେଲଥ କନକ୍ଲେଭରେ ପ୍ରତିଶ୍ରୁତି ଦେଇଛନ୍ତି ସ୍ବାସ୍ଥ୍ୟମନ୍ତ୍ରୀ । ଡବଲ ଇଞ୍ଜିନ୍‌ ସରକାରରେ କେବେ ଡାକ୍ତର ଅଭାବ ପୂରଣ ହେବ ତା’ଉପରେ ସମସ୍ତଙ୍କ ନଜର ।