ଗଞ୍ଜାମ ଜିଲ୍ଲାରେ ବିପର୍ଯ୍ୟୟ ମୁକାବିଲା ପ୍ରଶିକ୍ଷଣ,  କେମିତି ସୁରକ୍ଷିତ ରହିବ ଧନ ଓ ଜୀବନ?

କନକ ବ୍ୟୁରୋ: ବାତ୍ୟାପ୍ରବଣ ଗଞ୍ଜାମ ଜିଲ୍ଲାରେ ପ୍ରାକୃତିକ ବିପର୍ଯ୍ୟୟ ମୁକାବିଲା ତାଲିମ ଦେଇଛି ଓଡ୍ରାଫ୍‌। ବିପଦ ଦେଖିଲେ ଧୈର୍ଯ୍ୟ ନହରାଇ କେମିତି ସଫଳ ମୁକାବିଲା କରିହେବ ସେନେଇ ପୁଲିସ, ଅଗ୍ନିଶମ ବାହିନୀଙ୍କୁ ପ୍ରଶିକ୍ଷଣ ଦିଆଯାଇଛି । ଆଗକୁ ସ୍କୁଲ, କଲେଜରେ ବି ପ୍ରଶିକ୍ଷଣ ଦିଆଯିବ। ପ୍ରତିଟି ଲୋକଙ୍କ ସହଯୋଗରେ ବିପର୍ଯ୍ୟୟ ସମୟରେ ଜିରୋ କାଜୁଆଲିଟି ଲକ୍ଷ୍ୟ ନେଇ ଓଡ୍ରାଫ ପକ୍ଷରୁ ସଚେତନ କରାଯାଉଛି । ଛତ୍ରପୁରଠାରେ ଓଡ୍ରାଫ୍‌ର ବରିଷ୍ଠ ଅଧିକାରୀ ଓ ସ୍ୱତନ୍ତ୍ର ପ୍ରଶିକ୍ଷକ ତାଲିମ ଦେଇଛନ୍ତି । ଖାସ କରି ଗର୍ଭବତୀ, ଶିଶୁ ଓ ବୃଦ୍ଧବୃଦ୍ଧାଙ୍କୁ ଉଦ୍ଧାର ବେଳେ ଏସ୍‌ଓପି କ’ଣ ରହିବ ?

 ସେ ସଂପର୍କିତ ଡେମୋ ଦେଖାଇଛନ୍ତି ଓଡ୍ରାଫ ପ୍ରଶିକ୍ଷକ । ୧୯୯୯ ମହାବାତ୍ୟା ପରେ ଫାଇଲିନ୍‌ ଦେଖିଥିଲା ଗଞ୍ଜାମ । ବିପର୍ଯ୍ୟୟର ମୁକାବିଲା ବେଳେ ଅନେକ ଆହ୍ୱାନର ସାମ୍ନା କରିବାକୁ ପଡ଼େ । ସେହିପରି ସଡ଼କ ଦୁର୍ଘଟଣାରେ ବର୍ଷକୁ ଶହଶହ ଜୀବନ ଯାଉଛି ରାଜପଥରେ । ଘଟଣାସ୍ଥଳରେ ପୁଲିସ ପହଞ୍ଚିଲେ ବି ଉଦ୍ଧାର ପ୍ରଣାଳୀ ସମସ୍ତେ ଜାଣି ନଥିବାରୁ ଜୀବନ ବଞ୍ଚାଇବା ମୁସ୍କିଲ ହୋଇପଡ଼େ। ତେଣୁ ଏଭଳି ସମୟରେ ଉଦ୍ଧାରକାରୀ କ’ଣ କରିବା ଉଚିତ୍‌ ସେନେଇ ବି ପ୍ରଶିକ୍ଷଣ ଦିଆଯାଇଛି । ଶିଖିବା ପରେ ନିଜେ କାମରେ ଲଗାଇବା ସହ ଅନ୍ୟକୁ ଶିଖାଇବେ ବୋଲି କହିଛନ୍ତି ପ୍ରଶିକ୍ଷକ । ଘଟଣା ଟିଏ ଘଟିଲେ ଯେକେହି ବି ଉଦ୍ଧାର କରିବାକୁ ସାହସ ଜୁଟାଇବା ଜରୁରୀ। ତେବେ ଯାଇ ଜିରୋ କାଜୁଆଲିଟି ଲକ୍ଷ୍ୟ ସହଜରେ ପୂରଣ ହୋଇପାରିବ ।