ସଂସଦରେ ଡିମ୍ପଲ ଯାଦବଙ୍କ ପ୍ରଶ୍ନ, ଅପରେସନ ସିନ୍ଦୂରକୁ ନେଇ ସରକାରଙ୍କୁ କଟାକ୍ଷ

କନକ ବ୍ୟୁରୋ : ଅପରେସନ ସିନ୍ଦୂରକୁ ନେଇ ସଂସଦରେ ଚର୍ଚ୍ଚା ଜୋର ଧରିଛି । ଉଭୟ ଲୋକସଭା ଓ ରାଜ୍ୟସଭାରେ ସରକାର ଓ ବିରୋଧୀ ମୁହାଁମୁହିଁ ହୋଇଛନ୍ତି । ଏସବୁ ଭିତରେ ସମାଜବାଦୀ ପାର୍ଟି ସାଂସଦ ଡିମ୍ପଲ ଯାଦବ ଆଜି ଅପରେସନ ସିନ୍ଦୂର ବେଳେ ଯୁଦ୍ଧ ବିରତି ଘୋଷଣାକୁ ନେଇ ସରକାରଙ୍କୁ କାଠଗଡ଼ାରେ ଠିଆ କରିଛନ୍ତି । 

 ଡିମ୍ପଲ ଯାଦବ କହିଥିଲେ,‘ ସେନା ଆମର ସମ୍ମାନ ଏବଂ ଗର୍ବ। ଅପରେସନ ସିନ୍ଦୂର ଜରିଆରେ ଆମର ସେନା ଆତଙ୍କବାଦୀଙ୍କୁ କଡ଼ା ଜବାବ ଦେବା ପାଇଁ ଆତଙ୍କବାଦୀଙ୍କ ଆଡ୍ଡାଗୁଡ଼ିକ ଉପରେ ଆକ୍ରମଣ କରି ଧ୍ବଂସ କରିଥିଲା ।

ମୋର ପ୍ରଶ୍ନ ହେଉଛି ଏପରି ପରିସ୍ଥିତିରେ ଯୁଦ୍ଧବିରତି କାହିଁକି ହୋଇଥିଲା? ମୁଁ କହିବି ପହଲଗାମରେ ହୋଇଥିବା ଆକ୍ରମଣ ମଧ୍ୟ ଆମ ଦେଶର ସୁରକ୍ଷା ଉପରେ ଆକ୍ରମଣ ସହିତ ସାମନ। ଗୋଟିଏ ପଟେ ସରକାର ଦାବି କରୁଛନ୍ତି ଯେ କାଶ୍ମୀରରେ ସବୁକିଛି ସ୍ୱାଭାବିକ ଅଛି, ଅନ୍ୟପଟେ ସୁରକ୍ଷା କିପରି ବିପର୍ୟ୍ୟସ୍ତ ହୋଇଥିଲା। କିଛି ଦୋଷ ନଥାଇ କିପରି ଭାବେ ଏତେ ଲୋକ ଆତଙ୍କବାଦୀଙ୍କ ଗୁଳିରେ ପ୍ରାଣ ହରାଇଦେଲେ ।

ବାରମ୍ବାର ଲୋକେ ଅପରେସନ ସିନ୍ଦୂରର ଆକ୍ରମଣ କିପରି, କାହିଁକି ଏବଂ ଏହି ଆକ୍ରମଣରେ ଆମର କେତେ ବିମାନ ଖସି ପଡ଼ିଛି ତାହାକୁ ନେଇ ପ୍ରଶ୍ନ କରି ଆସୁଛନ୍ତି। ଏସବୁ ପ୍ରଶ୍ନର ଉତ୍ତର ସରକାର କାହିଁକି ଦେଉ ନାହାନ୍ତି। ଏସବୁର ଉତ୍ତର ଦେବାରେ ସରକାରଙ୍କର କ'ଣ ଅସୁବିଧା ଅଛି ତାହା ମୁଁ ବୁଝି ପାରୁ ନାହିଁ। ସରକାର ଜାଣି ରଖିବା ଉଚିତ ଯେ ସତ କେବେ ଲୁଚି ରୁହେ ନାହିଁ। ଏହା ଦିନେ ନା ଦିନେ ସାମ୍ନାକୁ ଆସିବ।’