କନକ ବ୍ୟୁରୋ : ବିଷାକ୍ତ ଖାଦ୍ୟ ଖାଇ ଝାଡାବାନ୍ତିରେ ଆକ୍ରାନ୍ତ ଗ୍ରାମବାସୀ । ୫୦ ରୁ ଅଧିକ ଗ୍ରାମବାସୀ ଆକ୍ରାନ୍ତ ହୋଇଛନ୍ତି । ଭଦ୍ରକ ଜିଲ୍ଲା ଜଗଦଲପୁର ପଞ୍ଚାୟତ ଯୋଡାଗଡିଆ ଗାଁରେ ଅନେକ ଲୋକ ଝାଡାବାନ୍ତିରେ ପଡିଛନ୍ତି । ସ୍ଥାନୀୟ ଆଶା କର୍ମୀ ଓ ସରପଞ୍ଚ ଘଟଣା ବିଷୟରେ ସିଡିଏମଓଙ୍କୁ ଜଣାଇବା ପରେ ଗାଁରେ ପହଞ୍ଚିଛି ଡାକ୍ତରୀ ଟିମ୍‌ । ଭଦ୍ରକ ମେଡିକାଲର ୩ ଟି ଟିମ୍ ଗାଁରେ ପହଞ୍ଚି ଚିକିତ୍ସା ଆରମ୍ଭ କରିଛି । ଘର ଘର ବୁଲି ଆକ୍ରାନ୍ତଙ୍କୁ ଚିକିତ୍ସା କରାଯାଉଛି । ସ୍ଥାନୀୟ ଅଙ୍ଗନବାଡ଼ି କେନ୍ଦ୍ରରେ କ୍ୟାମ୍ପ କରିଛନ୍ତି ମେଡିକାଲ ଟିମ୍ । କ୍ୟାମ୍ପରେ ଚିକିତ୍ସା ସହ ଆକ୍ରାନ୍ତଙ୍କୁ ଓଆରଏସ ଏବଂ ଅନ୍ୟ ମେଡିସିନ ଦିଆଯାଉଛି । ଦୁଇ ଜଣଙ୍କୁ ଅଧିକ ଚିକିତ୍ସା ପାଇଁ ମେଡିକାଲକୁ ପଠାଯାଇଛି । କେମିତି ଝାଡାବାନ୍ତି ବ୍ୟାପିଲା ସେନେଇ ତଦନ୍ତ କରୁଛି ଡାକ୍ତରୀ ଟିମ୍ ।