୩୦୦ ଟଙ୍କା ଦରମାରେ ପେଟ୍ରୋଲ୍ ପମ୍ପରେ କରୁଥିଲେ ଚାକିରି  । ଗୋଟିଏ ଆଇଡିଆ ବଦଳାଇ ଦେଇଥିଲା ଧୀରୁ ଭାଇ ଅମ୍ବାନୀଙ୍କ ଜୀବନ

ସଂଘର୍ଷ ଯଦି ଅଭ୍ୟାସରେ ପରିଣତ ହୁଏ
ମୁକୁଟ ପିନ୍ଧାଇବା ପାଇଁ ସଫଳତା ନିଜେ ଚାଲି ଆସେ .. 
ଉପରୋକ୍ତ ଲେଖାଟି ବୋଧହୁଏ ଆଗକୁ ଆମେ ବ୍ୟାଖା କରୁଥିବା ବ୍ୟକ୍ତିତ୍ବଙ୍କ ଜୀବନର ନିରାଟ ସତ୍ୟ । ନାଁ ତାଙ୍କର ସ୍ବର୍ଗତ ଧିରୁଭାଇ ଅମ୍ବାନୀ । ସାମ୍ରାଜ୍ୟ କହିଲେ ରିଲାଏନ୍ସ ଇଣ୍ଡଷ୍ଟ୍ରିଜ୍ କମ୍ପାନୀ । ଯାହାର ନାଁ ସାରା ଦେଶରେ ଏକ ଖ୍ୟାତ । ଅଏଲ୍ , ଗ୍ୟାସ୍ ଠାରୁ ଆରମ୍ଭ କରି ଗ୍ରୀନ୍ ଏନର୍ଜି , ଟେଲିକମ୍ ରୁ ନେଇ ରିଟେଲ୍ ମାର୍କେଟ୍ ପର୍ଯ୍ୟନ୍ତ ବ୍ୟାପିଛି ଏହି କମ୍ପାନୀର କାରବାର । ଯାହାର ସ୍ଥାପନା ମୁକେଶ୍ ଅମ୍ବାନୀ ଏବଂ ଅନିଲ୍ ଅମ୍ବାନୀଙ୍କ ପିତା ଧିରୁଭାଇ ଅମ୍ବାନୀ କରିଥିଲେ । ୨୮ ଡିସେମ୍ବର ୧୯୩୨ ରେ ଜନ୍ମଗ୍ରହଣ କରିଥିବା ଧିରୁଭାଇଙ୍କ ସଂଘର୍ଷର କାହାଣୀ କୌଣସି ଫିଲ୍ମଠାରୁ କମ୍ ନୁହେଁ । ରିଲାଏନ୍ସର ଶିଳାନ୍ୟାସ କରିଥିବା ଧିରୁଭାଇ ସୁନାର ଚାମଚ ପାଟିରେ ଧରି ଜନ୍ମ ହୋଇନଥିଲେ ବରଂ ସଂଘର୍ଷର ମାଡ଼ ଖାଇ ଖାଇ ପେଟ୍ରୋଲ୍ ପମ୍ପରେ ଚାକିରି କରି ନିଜର ବ୍ୟବସାୟର ସାମ୍ରାଜ୍ୟ ଛିଡ଼ା କରାଇଥିଲେ ।   

ଧୀରଜଲାଲ୍ ହୀରାଚାନ୍ଦ ଅମ୍ବାନୀ ବା ଧିରୁଭାଇ ଅମ୍ବାନୀ ନିଜର ପରିଶ୍ରମ ବଳରେ ଆଜି ବାଣିଜ୍ୟିକ କାରବାରକୁ ବହୁ ଆଗକୁ ବଢାଇ ପାରିଛନ୍ତି । ୨୦୦୨ ମସିହାରେ ହୃଦଘାତରେ ତାଙ୍କର ଦେହାନ୍ତ ହୋଇଥିଲା । ନିଜ ଘରୁ ମାତ୍ର ୫୦୦ ଟଙ୍କା ନେଇ ବେପାର କରିବେ ବୋଲି ଆସିଥିଲେ ଧିରୁଭାଇ । ପରେ ସେହି ୫୦୦ ଟଙ୍କାରେ ହିଁ ପ୍ରଥମେ ବେପାର ଆରମ୍ଭ କରିଥିଲେ । କିନ୍ତୁ ୨୦୦୨ ମସିହାରେ ଯେବେ ତାଙ୍କର ଦେହାନ୍ତ ହେଲା ସେତେ ବେଳେ ରିଲାଏନ୍ସ ୬୨ ହଜାର କୋଟିର କମ୍ପାନୀ ହୋଇସାରିଥିଲା । ଦୁନିଆରେ ଜଣେ ସଫଳ ବ୍ୟକ୍ତି ହିସାବରେ ସମସ୍ତେ ତାଙ୍କୁ ଜାଣନ୍ତି । ଆଉ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ସେ କେବେ ବି ୧୦ ଘଣ୍ଟାରୁ ଅଧିକ ସମୟ କାମ କରୁନଥିଲେ ।

ସେ ଏକ ସଭାରେ କହିଥିଲେ ଯେ “ ଯେଉଁମାନେ କୁହନ୍ତି ଆମେ ମାନେ ୧୨ ରୁ ୧୬ ଘଣ୍ଟା ପର୍ଯ୍ୟନ୍ତ କାମ କରୁଛୁ ସେମାନେ କାମରେ ପୂରା ଦୁର୍ବଳ କିମ୍ବା ସେହି ଗୋଟିଏ କାମକୁ ଅଧିକ ସମୟ କରିବାରେ ଅଭ୍ୟସ୍ତ” । ଏକ ରିପୋର୍ଟରୁ ଜଣାଯାଇଛି ଯେ, ସେ ପ୍ରତ୍ୟେକ ଦିନ ସନ୍ଧ୍ୟା ସମୟରେ ନିଜର ଅଧିକାରୀଙ୍କ ସହ ଆଲୋଚନା କରିବା ସହ ନିଜର ବଡି ମସାଜ୍ କରିସାରିଲା ପରେ ସିଧା ତାଙ୍କ ଘରକୁ ଯାଉଥିଲେ । ଧିରୁଭାଇଙ୍କୁ ପାର୍ଟି, ଟ୍ରାଭେଲ୍ସ କିମ୍ବା ବିଦେଶ ଯାତ୍ରା ପସନ୍ଦ ନଥିଲା । ତେଣୁ ସେ କମ୍ପାନୀ କାମରେ ନିଜର ଅଧିକାରୀଙ୍କୁ ହିଁ ବିଦେଶ ପଠାଉଥିଲେ । 

ଧିରୁଭାଇଙ୍କ ମନ ଯେତେବେଳେ ପାଠପଢାରେ ଲାଗିଲାନାହିଁ ସେ ମାତ୍ର ୧୭ ବର୍ଷ ବୟସରେ ଟଙ୍କା ରୋଜଗାର କରିବା ପାଇଁ ନିଜ ଭାଇ ରମଣିକଲାଲଙ୍କ ପାଖକୁ ୟମନ୍ ଚାଲିଯାଇଥିଲେ । ୧୯୪୯ ରେ ବିଦେଶ ଯାତ୍ରା କରିଥିବା ଧିରୁଭାଇ ୩୦୦ ଟଙ୍କା ଦରମାରେ ଗୋଟିଏ ପେଟ୍ରୋଲ୍ ପମ୍ପରେ ଚାକିରି କଲେ । କମ୍ ଦରମା ଥିଲେ ବି ସେ ସଚ୍ଚୋଟତା ଏବଂ ପରିଶ୍ରମର ସହ ସେ କାମ କରୁଥିଲେ । ଯେଉଁଥିରେ ଖୁସି ହୋଇ ପେଟ୍ରୋଲ୍ ପମ୍ପ ମାଲିକ ତାଙ୍କୁ ମ୍ୟାନେଜର୍ ପଦବୀ ଦେଇଥିଲେ । ୫ ବର୍ଷ ପରେ ମନରେ ଏକ ଆଇଡିଆ ନେଇ ଧିରୁଭାଇ ଭାରତ ଫେରିଲେ । କିଛି ଦିନ ଘରେ ପରିବାର ସହ ସମୟ ବିତାଇ ମାତ୍ର ୫୦୦ ଟଙ୍କା ଧରି ସେ ମୁମ୍ବାଇ ଆସିଲେ । ମୁମ୍ବାଇ ଆସୁ ଆସୁ ସେ ଫଟାଫଟ୍ କିଛି କାମ ଆରମ୍ଭ କଲେନାହିଁ ବରଂ ଅନେକ ବଜାର ବୁଲିଲେ ଏବଂ ସବୁ ସ୍ଥିତିକୁ ଅତି ପାଖରୁ ପରଖିଲେ । ଭାରତରେ ପେଟ୍ରୋଲର ଚାହିଦା ଏବଂ ବିଦେଶରେ ମସଲାର ଡିମାଣ୍ଡକୁ ସେ ବୁଝିପାରିଲେ । ତାପରେ ଆରମ୍ଭ ହେଲା ଧିରୁଭାଇ ଅମ୍ବାନୀ ଯୁଗ । ସମୟ ସହ ମାତ୍ ଦେଇ ସାମ୍ରାଜ୍ୟ ଛିଡ଼ା କଲେ ଧିରୁଭାଇ । 

୨୦୦୨ ମସିହା ଜୁଲାଇ ୬ ତାରିଖରେ ଦୁନିଆକୁ ଅଲବିଦା କହିଥିଲେ ଧିରୁଭାଇ ଅମ୍ବାନୀ । ସ୍ବାମୀଙ୍କ ମୃତ୍ୟୁ ପରେ ଧର୍ମପତ୍ନୀ କାନ୍ଧରେ ପଡ଼ିଲା କମ୍ପାନୀର ଭାର । କିଛି ବର୍ଷ ସ୍ତ୍ରୀ କୋକିଲାବେନ୍ ଅମ୍ବାନୀ କାରବାରର ଯତ୍ନ ନେଇଥିଲେ । ପରେ ୨ ପୁଅ ମୁକେଶ୍ ଅମ୍ବାନୀ ଏବଂ ଅନିଲ୍ ଅମ୍ବାନୀ ସମ୍ଭାଳିଥିଲେ କମ୍ପାନୀର ଭାର ।