ଚାଇନା ଦେଇଥିଲା ଫାଇଟର୍ ଜେଟ୍ : ନଡ଼ିଆ ଗଛରେ ପିଟି ହୋଇ ଢାକା ଶିକ୍ଷାନୁଷ୍ଠାନରେ ପଡ଼ିଲା

କନକ ବ୍ୟୁରୋ : ବାଙ୍ଗଲାଦେଶର ରାଜଧାନୀ ଢାକାର ଉତ୍ତରା ଅଞ୍ଚଳ । ସୋମବାର ଦିନ ପ୍ରାୟ ୧.୩୦ ସମୟରେ ଶିକ୍ଷାନୁଷ୍ଠାନରେ ପିଲାମାନଙ୍କର କ୍ଲାସ୍ ଚାଲିଥାଏ ଏବଂ ଅଭିଭାବକ ଗେଟ୍ ସାମ୍ନାରେ ପିଲାଙ୍କୁ ଅପେକ୍ଷା କରିଥା’ନ୍ତି । ଠିକ୍ ସେହି ସମୟରେ ଏକ ଜୋରଦାର ବିସ୍ଫୋରଣର ଶବ୍ଦ ଶୁଣିବାକୁ ମିଳିଲା ଏବଂ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳିଗଲା । ଲୋକମାନେ ଜୀବନ ବଞ୍ଚାଇବା ପାଇଁ ଏଣେତେଣେ ଦୌଡ଼ିବାକୁ ଲାଗିଲେ । ଦେଖୁ ଦେଖୁ କିଛି ମିନିଟରେ ସବୁ କିଛି ବଦଳିଗଲା । ବାଙ୍ଗଲାଦେଶ ଏୟାରଫୋର୍ସର ଏକ ଏଫ୍-7 ଟ୍ରେନର ବିମାନ ସୋମବାର ଦିନ ହଠାତ୍ ଉତ୍ତରା ଅଞ୍ଚଳରେ ଥିବା ଏକ ଶିକ୍ଷାନୁଷ୍ଠାନର ବିଲ୍ଡିଂ ଉପରେ ଖସି ପଡ଼ିଲା । ଦୁର୍ଘଟଣା ସମୟରେ କ୍ଲାସ୍ ଚାଲୁଥିବାରୁ ଅନେକ ଛାତ୍ରଛାତ୍ରୀ ଓ ଶିକ୍ଷକ କଲେଜ ଭିତରେ ଉପସ୍ଥିତ ଥିଲେ ଏବଂ ଅନେକ ଅଭିଭାବକ ଗେଟ୍ ସାମ୍ନାରେ ସେମାନଙ୍କ ପିଲାମାନଙ୍କୁ ଅପେକ୍ଷା କରି ରହିଥିଲେ ।

ନଡ଼ିଆ ଗଛରେ ପିଟି ହୋଇଗଲା ବିମାନ 

ପ୍ରାଥମିକ ସୂଚନା ଅନୁସାରେ, ବିମାନଟି ବହୁତ ତଳେ ଉଡ଼ୁଥିଲା ଏବଂ ହଠାତ୍ ଭାରସାମ୍ୟ ହରାଇ ତଳକୁ ଖସିବାକୁ ଲାଗିଲା । ପ୍ରଥମେ ଏହା ନଡ଼ିଆ ଗଛରେ ପିଟି ହେଲା, ତା’ପରେ ଏକ ଶିକ୍ଷାନୁଷ୍ଠାନ ବିଲ୍ଡିଂ ସହିତ ଧକ୍କା ହୋଇ ଦୁର୍ଘଟଣାଗ୍ରସ୍ତ ହେଲା । ଧକ୍କା ହେବା ମାତ୍ରେ ହିଁ ଏକ ଶକ୍ତିଶାଳୀ ବିସ୍ଫୋରଣ ହେଲା ଏବଂ ବିମାନଟି ହୁ ହୁ ହୋଇ ଜଳିବାକୁ ଲାଗିଲା । ବିମାନଟି ୧.୦୬ ସମୟରେ ଉଡ଼ାଣ ଭରିଥିଲା ଏବଂ ସାଢ଼େ ଗୋଟାଏରେ ଦୁର୍ଘଟଣାଗ୍ରସ୍ତ ହେଲା । ଦୁର୍ଘଟଣା ପରେ ସମଗ୍ର ଅଞ୍ଚଳରେ ଆତଙ୍କ ଖେଳିଗଲା । ପ୍ରତ୍ୟକ୍ଷଦର୍ଶୀଙ୍କ ଅନୁସାରେ ବିସ୍ଫୋରଣର ଶବ୍ଦ ଏତେ ଜୋରରେ ଥିଲା ଯେ ଆଖପାଖର ଲୋକମାନେ ଭୟଭୀତ ହୋଇ ବାହାରକୁ ଦୌଡ଼ିବାକୁ ଲାଗିଲେ । ତେବେ ନିଆଁର ପ୍ରକୋପ ହେତୁ ଉଦ୍ଧାରକାରୀ ଦଳ ଭିତରକୁ ଯିବାକୁ ଅସୁବିଧାର ସମ୍ମୁଖୀନ ହେଉଛି । ଦମକଳ ବାହିନୀ ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଛନ୍ତି । ଜେଟ୍ ପାଇଲଟଙ୍କ ମୃତ୍ୟୁ ହୋଇଥିବାର ସୂଚନା ଆସୁଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଯେଉଁ ଫାଇଟର ଜେଟଟି ଦୁର୍ଘଟଣାଗ୍ରସ୍ତ ହୋଇଛି ତାହାକୁ ଚୀନ୍ ବାଂଲାଦେଶ ପାଇଁ ତିଆରି କରିଥିଲା । ତେବେ ଘଟଣାସ୍ଥଳରେ ଉଦ୍ଧାରକାର୍ଯ୍ୟ ଜାରି ରହିଛି ।