ଦୁର୍ଘଟଣାସ୍ଥଳରେ ଡିଜିସିଏ, ଫରେନ୍ସିକ୍ ଟିମ୍ ; କେମିତି ହେଲା ଦୁର୍ଘଟଣା, ଚାଲିଛି କାରଣ ଖୋଜା

କନକ ବ୍ୟୁରୋ: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାର ଏବଂ ଅନ୍ୟ ପାଞ୍ଚ ଜଣଙ୍କ ଜୀବନ ନେଇଥିବା ବିମାନ ଦୁର୍ଘଟଣାର ତଦନ୍ତ ପାଇଁ ଗୁରୁବାର ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଏବଂ ଫରେନ୍ସିକ୍ ଦଳଙ୍କ ଅଧିକାରୀମାନେ ବାରାମତିର ଦୁର୍ଘଟଣାସ୍ଥଳରେ ପହଞ୍ଚିଛନ୍ତି । ଦୁର୍ଘଟଣା ସମ୍ପର୍କରେ ପୁଣେ ଗ୍ରାମୀଣ ପୋଲିସ ବାରାମତି ତାଲୁକା ପୋଲିସ ଷ୍ଟେସନରେ ଏକ ଦୁର୍ଘଟଣାଜନିତ ମୃତ୍ୟୁ ରିପୋର୍ଟ ପଞ୍ଜିକୃତ କରିଛି ଏବଂ ଅଧିକ ତଦନ୍ତ ଆରମ୍ଭ କରିଛି।

କେନ୍ଦ୍ରମନ୍ତ୍ରୀ ରକ୍ଷା ଖଡସେ ଏହି ଘଟଣାକୁ ହୃଦୟବିଦାରକ ବୋଲି କହିବା ସହିତ ମହାରାଷ୍ଟ୍ର ଅଜିତ ପାୱାରଙ୍କ ପରି ଆଉ ଜଣେ ନେତା ଦେଖିବ ନାହିଁ ବୋଲି କହିଛନ୍ତି । ତେବେ ଗତକାଲି ଘଟିଥିବା ଦୁର୍ଘଟଣା ହୃଦୟ ବିଦାରକ। କେହି ଭାବି ନଥିଲେ ଯେ ଏପରି କିଛି ଘଟିବ। ଗତକାଲି ଖବର ଶୁଣି ଆମେ ସମସ୍ତେ ଦୁଃଖିତ ହୋଇଥିଲୁ। ମୁଁ ଭାବୁଛି ମହାରାଷ୍ଟ୍ରରେ ଅଜିତ ଦାଦାଙ୍କ ପରି ଆଉ କୌଣସି ନେତା ରହିବେ ନାହିଁ। ସେ ଜଣେ ଭଲ ନେତା ଥିଲେ ଯିଏ ମହାରାଷ୍ଟ୍ରର ବିକାଶରେ ଏକ ବଡ଼ ଭୂମିକା ଗ୍ରହଣ କରିଥିଲେ ବୋଲି କହିନଛନ୍ତି କେନ୍ଦ୍ରମନ୍ତ୍ରୀ ରକ୍ଷା ଖଡସେ ।

ଆହୁରି ପଢ଼ନ୍ତୁ : ଭାରତ- ଇୟୁ ମୁକ୍ତ ବାଣିଜ୍ୟ ରାଜିନାମା 

ତେବେ ଜାନୁଆରୀ ୨୮ ତାରିଖରେ ବିମାନ ଦୁର୍ଘଟଣାରେ ପ୍ରାଣ ହରାଇଥିବା ଏନସିପି ନେତାଙ୍କ ପାଇଁ ବାରାମତୀର ବିଦ୍ୟା ପ୍ରତିଷ୍ଠାନ ପଡ଼ିଆରେ ଅନ୍ତିମ ସଂସ୍କାର ପ୍ରସ୍ତୁତି ଚାଲିଛି । ଏନସିପି ମୁଖ୍ୟ ତଥା ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ପାର୍ଥିବ ଶରୀର ବାହାର କରାଯିବା ସମୟରେ ତାଙ୍କ ସମର୍ଥକମାନେ ଅହଲ୍ୟାବାଇ ହୋଲକର ସରକାରୀ ମେଡିକାଲ କଲେଜ ବାହାରେ ଏକତ୍ରିତ ହୋଇଥିଲେ।

ଅଜିତ ପାୱାର ଲଗାତାର ଭାବରେ ମହାରାଷ୍ଟ୍ରର ସବୁଠାରୁ ଦୀର୍ଘ ସମୟ ଧରି ଉପମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଥିଲେ । ସେ ବିଭିନ୍ନ ସରକାରରେ ଛଅ ଥର ପାଇଁ ଏହି ପଦବୀରେ ରହିଥିଲେ। ସେ ପୃଥ୍ୱୀରାଜ ଚୌହ୍ୱାନ, ଦେବେନ୍ଦ୍ର ଫଡନବିସ, ଉଦ୍ଧବ ଠାକରେ ଏବଂ ଏକନାଥ ସିନ୍ଦେଙ୍କ କ୍ୟାବିନେଟରେ ଉପମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ।

ନଭେମ୍ବର ୨୦୧୯ରେ ସେ ଏନସିପିର ବିଭାଜନ କରିଥିଲେ, ଆଉ ଭାରତୀୟ ଜନତା ପାର୍ଟି ନେତୃତ୍ୱରେ ଗଠିତ ସରକାରରେ ଯୋଗ ଦେଇଥିଲେ ଏବଂ ଉପମୁଖ୍ୟମନ୍ତ୍ରୀ ହୋଇଥିଲେ। ଫେବୃଆରୀ ୨୦୨୪ରେ, ନିର୍ବାଚନ କମିସନ ଅଜିତ ପାୱାରଙ୍କ ନେତୃତ୍ୱାଧୀନ ଗୋଷ୍ଠୀକୁ ଦଳର ନାମ ଏବଂ ଚିହ୍ନ ପ୍ରଦାନ କରିଥିଲେ। ଏହାସତ୍ତ୍ୱେ, ଅଜିତ ପାୱାର ତାଙ୍କ କାକା ଶରଦ ପାୱାରଙ୍କ ଅତ୍ୟନ୍ତ ନିକଟତର ବୋଲି ଜଣାଶୁଣା ଥିଲେ ।