କନକ ବ୍ୟୁରୋ : ନାଲିଫିତା ତଳେ ପଡ଼ିରହିଛି ବୋରିଗୁମ୍ମା ଏନଏସି ମାନ୍ୟତା । ବିଜେପୁର ପରେ ବୋରିଗୁମ୍ମାକୁ ନେଇ ବଢ଼ିଥିଲା ଆଶା । ନିର୍ବାଚନ ପୁର୍ବରୁ ତତ୍କାଳୀନ ସରକାର ଘୋଷଣା ବି କରିଥିଲେ । ହେଲେ ଏବେ ବଦଳିଗଲେ ସରକାର । ନୂଆ ସରକାର କହିଲେ ତାହା କେବଳ କାଗଜ କଲମରେ । ଏବେ ପ୍ରଶ୍ନ ଉଠୁଛି ବୋରିଗୁମ୍ମାର ଭାଗ୍ୟ ବଦଳିବ କେବେ । ଜୟପୁର ବିଧାୟକ କହିଲେ ମାନ୍ୟତା ନମିଳିଲେ ପୁଣି ହେବ ଆନ୍ଦୋଳନ ।

Advertisment

କୋରାପୁଟ ଜିଲ୍ଲା ବୋରିଗୁମ୍ମାରେ ୧୯୫୧ ମସିହାରୁ ଖୋଲିଲାଣି ବ୍ଳକ ଓ ତହସିଲ । ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରଠାରୁ ଆରମ୍ଭ କରି ଦମକଳ କେନ୍ଦ୍ର, ରାଜ୍ୟ ସରକାରଙ୍କ ବିଭିନ୍ନ ବିଭାଗ ତଥା ରାସ୍ତା ଓ ଗୃହ ନିର୍ମାଣ କାର୍ଯ୍ୟାଳୟ ଭଳି ଅନେକ ସରାକରୀ ସଂସ୍ଥା ରହିଛି । ଏନଏସି ପାଇଁ ଆବଶ୍ୟକତା ଥିବା ସବୁ କିଛି ରହିଛି । ନିର୍ବାଚନ ପୁର୍ବରୁ ତତ୍କାଳୀନ ସରକାର ଘୋଷଣା ବି କରିଥିଲେ । ନୂଆ ସରକାର ଆସିବା ପରେ ସେସବୁ ଯେମିତି କାଗଜକଲମରେ ଅଟକିଯାଇଛି ।

ଏନଏସି ମାନ୍ୟତା ପାଇଁ ପୂର୍ବରୁ ବିଜେଡ଼ି, ବିଜେପି ଓ କଂଗ୍ରେସ ପକ୍ଷରୁ ଅନେକ ଥର ଆନ୍ଦୋଳନ ହୋଇଛି । କିନ୍ତୁ ନିର୍ବାଚନ ସରିଗଲା ପରେ ଏହାକୁ ଯେମିତି ସରକାର ଭୁଲିଯାଇଛନ୍ତି । ବୋରିଗୁମ୍ମାକୁ ଏନଏସି ମାନ୍ୟତା ପାଇଁ କୋର୍ଟଙ୍କ ଦ୍ୱାରସ୍ଥ ହେବା ପାଇଁ ଅଣ୍ଟା ଭିଡିଥିଲା ବିଜେପି । ଏବେ ବିଜେପି ସରକାର ଆସିବା ପରେ ନିଶ୍ଚୟ କାମ ହେବ ବୋଲି କହିଛନ୍ତି ସ୍ଥାନୀୟ ନେତା । ସେପଟେ ଜୟପୁର ବିଧାୟକ ତାରା ବାହିନୀପତି କହିଛନ୍ତି ଦାବି ପୂରଣ ନହେଲେ ବିଧାନସଭାରେ ପୁଣି ଉଠିବ ପ୍ରସଙ୍ଗ ।

ବିକାଶର ଦ୍ୱାହି ଦେଉଥିବା ରାଜନେତା ନିର୍ବାଚନ ପରେ ସତେ ଯେମିତି ଏନଏସି ମାନ୍ୟତା ଦାବିକୁ ଭୁଲିଯାଇଛନ୍ତି ।