ମିସ୍ ୟୁନିଭର୍ସ ୨୦୨୪ ହେଲେ ମିସ୍ ଡେନମାର୍କ; ଗୋଟିଏ କଠିନ ପ୍ରଶ୍ନର ଉତ୍ତର ଦେଇ ସମସ୍ତଙ୍କ ମନ ଜିତିନେଲେ

କନକ ବ୍ୟୁରୋ: ୨୦୨୪ ବର୍ଷ ପାଇଁ ମିସ୍ ୟୁନିଭର୍ସ ଘୋଷଣା ହୋଇସାରିଛନ୍ତି । ଡେନମାର୍କ କଣ୍ଟେଷ୍ଟାଣ୍ଟ ଭିକ୍ଟୋରିଆ କେଜିର୍ ମିସ୍ ୟୁନିଭର୍ସ ୨୦୨୪ ଟାଇଟଲ୍ ଜିତିଛନ୍ତି । ଭାରତରୁ ଏହି ପ୍ରତିଯୋଗିତାରେ ଭାଗ ନେଇଥିବା ରିୟା ସିଂ ଟପ୍-୧୨ରୁ ବାହାରି ଯାଇଥିଲେ । ରିୟାଙ୍କ ବିଷୟରେ କହିବାକୁ ଗଲେ ସେ ଗୁଜରାଟର ବାସିନ୍ଦା । ଏହା ପୂର୍ବରୁ ରିୟା ୫୧ ଫାଇନାଲିଷ୍ଟଙ୍କୁ ପରାସ୍ତ କରି ମିସ୍ ୟୁନିଭର୍ସ ଇଣ୍ଡିଆ ଟାଇଟଲ୍ ଜିତିଥିଲେ । ଏହା ସହିତ ସେ ମିସ୍ ଟିନ୍ ଆର୍ଥ ୨୦୨୩ ଏବଂ ଡିଭାସ୍ ମିସ୍ ଟିନ୍ ଗୁଜୁରାଟ ୨୦୨୦ ଭଳି ଅନେକ ଟାଇଟଲ୍ ଜିତିଛନ୍ତି । ରିୟା ୧୬ ବର୍ଷ ବୟସରେ ନିଜର ମଡେଲିଂ କ୍ୟାରିୟର ଆରମ୍ଭ କରିଥିଲେ ।

ରିୟା ଅହମ୍ମଦାବାଦର ଜିଏଲ୍ଏସ୍ ୟୁନିଭରସିଟିରୁ ପରଫର୍ମିଂ ଆର୍ଟରେ ଡିଗ୍ରୀ ହାସଲ କରିଛନ୍ତି । ଏହି ପ୍ରତିଯୋଗିତାରେ ୧୨୫ ଦେଶରୁ ୧୩୦ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ । ଏହା ପୂର୍ବରୁ ରିୟା ସିଂ ମଧ୍ୟ ମିସ୍ ୟୁନିଭର୍ସ ଇଣ୍ଡିଆ ବିୟୁଟି ପେଜେଣ୍ଟର ବିଜେତା ହୋଇଥିଲେ । ଚଳିତ ବର୍ଷ ଚତୁର୍ଥ ଥର ପାଇଁ ଭାରତ ଏହି ଟାଇଟଲ ଜିତିବାର ସୁଯୋଗ ପାଇଲା । ଏହାପୂର୍ବରୁ ତିନିଥର ଭାରତୀୟ ବ୍ୟୁଟି କ୍ବିନ୍ ନିଜ ଦେଶ ନାମରେ ଟାଇଟଲ୍ ଜିତିଛନ୍ତି । ୧୯୯୪ ରେ ସୁସ୍ମିତା ସେନ୍ ପ୍ରଥମ ଥର ଭାରତ ପାଇଁ ଏହି ଟାଇଟଲ୍ ଜିତିଥିଲେ ।

ଏହା ପରେ ଲାରା ଦତ୍ତା ଏବଂ ହରନାଜ ସନ୍ଧୁ ମଧ୍ୟ ଏହି ଟାଇଟଲ୍ ଜିତିଥିଲେ । ମେକ୍ସିକୋରେ ଅନୁଷ୍ଠିତ ହୋଇଥିବା ୭୩ ତମ ମିସ୍ ୟୁନିଭର୍ସ ପେଜ୍ ପାଇଁ ଶ୍ରେଷ୍ଠ ପାଞ୍ଚଜଣ ଫାଇନାଲିଷ୍ଟ ଘୋଷଣା କରାଯାଇଥିଲା । ମେକ୍ସିକୋ, ନାଇଜେରିଆ, ଥାଇଲ୍ୟାଣ୍ଡ, ଭେନେଜୁଏଲା ଏବଂ ଡେନମାର୍କ ଫାଇନାଲକୁ ଯାଇଥିଲେ କାରଣ ୧୨ ଜଣ ଫାଇନାଲିଷ୍ଟ ଚମତ୍କାର ଗାଉନ୍ ଉପସ୍ଥାପନ କରିଥିଲେ ଯାହାକି ସେମାନେ ପ୍ରତିନିଧିତ୍ୱ କରୁଥିବା ଦେଶର ଅନନ୍ୟ ସଂସ୍କୃତି ଏବଂ ସୌନ୍ଦର୍ୟ୍ୟକୁ ପ୍ରତିଫଳିତ କରିଥିଲା । ସେମିଫାଇନାଲ୍ ପରେ ମିସ୍ ୟୁନିଭର୍ସ ୨୦୨୪ ପାଇଁ ୧୨ ଜଣ ଫାଇନାଲିଷ୍ଟ ପ୍ରକାଶ ପାଇଥିଲେ ।

ସେମାନେ ବୋଲିଭିଆ, ମେକ୍ସିକୋ, ଭେନେଜୁଏଲା, ଆର୍ଜେଣ୍ଟିନା, ପୁଏର୍ତୋ ରିକୋ, ନାଇଜେରିଆ, ରୁଷିଆ, ଚିଲି, ଥାଇଲ୍ୟାଣ୍ଡ, ଡେନମାର୍କ, କାନାଡା ଏବଂ ପେରୁକୁ ପ୍ରତିନିଧିତ୍ୱ କରନ୍ତି । ସେହିଭଳି ଜୁରି ପ୍ୟାନେଲରେ ଫ୍ୟାଶନ୍, ମନୋରଞ୍ଜନ, କଳା ଏବଂ ବ୍ୟବସାୟ ଜଗତର ଲୋକପ୍ରିୟ ବ୍ୟକ୍ତି ସାମିଲ ଥିଲେ । ସେମାନଙ୍କ ମଧ୍ୟରେ ଏମିଲିଓ ଏଷ୍ଟେଫନ୍, ମାଇକେଲ୍ ସିନ୍କୋ, ଇଭା କେବଲ୍ଲି, ଜେସିକା କେରିଲୋ, ଜିଆନଲୁକା ଭାଚି, ନୋଭା ଷ୍ଟିଭେନ୍ସ, ଫରିନା, ଗ୍ୟାରି ନାଡର, ଗାବ୍ରିଏଲା ଗୋଞ୍ଜାଲେଜ୍ ଏବଂ କେମିଲା ଗୁଇରିବିଟି ଅଛନ୍ତି ।

 ତେବେ ଭିକ୍ଟୋରିଆଙ୍କୁ ଏଭଳି ଏକ ପ୍ରଶ୍ନ ପଚରାଯାଇଥିଲା, ଯାହାର ଉତ୍ତର ଦେଇ ସେ ବିଚାରକମଣ୍ଡଳୀଙ୍କ ମନ ଜିତିନେଇଥିଲେ । ପ୍ରଶ୍ନ ଥିଲା , ଯଦି ତାଙ୍କୁ କେହି ଗୁରୁତ୍ୱ ନଦିଅନ୍ତି ତେବେ ସେ କ’ଣ ନିଜ ଜୀବନଶୈଳୀ ବଦଳାଇଦେବେ? ଉତ୍ତରରେ ଭିକ୍ଟୋରିଆ କହିଥିଲେ, ‘ ମୁଁ କେବେବି ନିଜ ଜୀବନ ବଞ୍ଚିବାର ତରିକାରେ ପରିବର୍ତ୍ତନ କରିବି ନାହିଁ । ଆମେ ଆମ ଭୁଲରୁ ଶିଖିବା କଥା । ମୁଁ ବି ଶିଖେ । ଏହାକୁ ନେଇ ଆଗକୁ ବଢିବାକୁ ହୁଏ । ପ୍ରତିଦିନ କିଛି ନା କିଛି ନୂଆ ଶିଖିବାକୁ ମିଳେ । ଏହି କାରଣରୁ ପ୍ରତିଦିନ ହିଁ ମୁଁ ନିଜ ଅନୁସାରେ ବଞ୍ଚେ । କାହାରି ପାଇଁ ମୁଁ ମୋ ଜୀବନଶୈଳୀରେ ପରିବର୍ତ୍ତନ କରିବି ନାହିଁ’ ।