ଦିଲ୍ଲୀ ମେଟ୍ରୋ ଭଡା ବୃଦ୍ଧି: ଯାତ୍ରୀଙ୍କ ପକେଟ ଉପରେ କେତେ ପଡିବ ପ୍ରଭାବ, ଜାଣନ୍ତୁ ନୂଆ ଦର

କନକ ବ୍ୟୁରୋ: ବଢିଲା  ଦିଲ୍ଲୀ ମେଟ୍ରୋ ଭଡା ।  ଆଜ୍ଞା ହଁ  ଦିଲ୍ଲୀର ଲାଇଫଲାଇନ୍ କୁହାଯାଉଥିବା ଦିଲ୍ଲୀ ମେଟ୍ରୋରେ ଯାତ୍ରା କରିବା ଆଜିଠାରୁ ମହଙ୍ଗା ହୋଇଛି  । ଦିଲ୍ଲୀ ମେଟ୍ରୋ ରେଳ ନିଗମ (DMRC) ପ୍ରାୟ ଆଠ ବର୍ଷ ପରେ ମେଟ୍ରୋ ଭଡା ବୃଦ୍ଧି କରିଛି, ଯାହା ୨୫ ଅଗଷ୍ଟ ୨୦୨୫ରୁ  ଅର୍ଥାତ୍‌ ଆଜିଠୁ  ଲାଗୁ ହୋଇଛି ।   ଏହି ଭଡା ବୃଦ୍ଧି ସାମାନ୍ୟ ହୋଇଥିଲେ ମଧ୍ୟ ଏହା ଦୈନିକ ଯାତ୍ରା କରୁଥିବା ଲକ୍ଷ ଲକ୍ଷ ଯାତ୍ରୀଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଇବ ।  DMRC ପକ୍ଷରୁ କୁହାଯାଇଛି ଯେ ଏହି ଭଡ଼ା ବୃଦ୍ଧି ଅତି ସାମାନ୍ୟ ଏବଂ ଯାତ୍ରାର ଦୂରତାକୁ ଆଧାର କରି ୧ ଟଙ୍କାରୁ ୪ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି । ଏହା ସହିତ ଏୟାରପୋର୍ଟ ଏକ୍ସପ୍ରେସ ଲାଇନର ଭଡ଼ାରେ ମଧ୍ୟ ୧ ଟଙ୍କାରୁ ୫ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି । ଏହି ପରିବର୍ତ୍ତନ ପରେ ଦିଲ୍ଲୀ ମେଟ୍ରୋର ସର୍ବନିମ୍ନ ଭଡ଼ା ୧୦ ଟଙ୍କାରୁ ୧୧ ଟଙ୍କାକୁ ବୃଦ୍ଧି ପାଇଥିବା ବେଳେ ସର୍ବାଧିକ ଭଡ଼ା ୬୦ ଟଙ୍କାରୁ ୬୪ ଟଙ୍କାକୁ ବୃଦ୍ଧି କରାଯାଇଛି । 

ନୂତନ ଭଡ଼ା ତାଲିକା:
DMRC ଦ୍ୱାରା ଜାରି କରାଯାଇଥିବା ନୂତନ ଭଡ଼ା ସ୍ଲାବ୍ ଅନୁଯାୟୀ, ଦୂରତା ଭିତ୍ତିରେ ଭଡ଼ା ନିମ୍ନଲିଖିତ ଭାବରେ ସଂଶୋଧନ କରାଯାଇଛି:
୦ ରୁ ୨ କିଲୋମିଟର: ପୂର୍ବରୁ ୧୦ ଟଙ୍କା ଥିବାବେଳେ ବର୍ତ୍ତମାନ ୧୧ ଟଙ୍କା ଦେବାକୁ ପଡ଼ିବ । 
୨ ରୁ ୫ କିଲୋମିଟର: ପୂର୍ବରୁ ୨୦ ଟଙ୍କା ଥିଲା, ଯାହା ବର୍ତ୍ତମାନ ୨୧ ଟଙ୍କା ହୋଇଛି ।
୫ ରୁ ୧୨ କିଲୋମିଟର: ଏହି ଦୂରତା ପାଇଁ ଏବେ ୩୦ ଟଙ୍କା ପରିବର୍ତ୍ତେ ୩୨ ଟଙ୍କା ଦେବାକୁ ହେବ । 
୧୨ ରୁ ୨୧ କିଲୋମିଟର: ପୂର୍ବରୁ ୪୦ ଟଙ୍କା ଭଡ଼ା ଥିବାବେଳେ ବର୍ତ୍ତମାନ ଏହା ୪୩ ଟଙ୍କାକୁ ବୃଦ୍ଧି ପାଇଛି ।
୨୧ ରୁ ୩୨ କିଲୋମିଟର: ଏହି ଦୂରତା ପାଇଁ ଯାତ୍ରୀମାନଙ୍କୁ ୫୦ ଟଙ୍କା ବଦଳରେ ୫୪ ଟଙ୍କା ଦେବାକୁ ପଡ଼ିବ ।
୩୨ କିଲୋମିଟରରୁ ଅଧିକ: ୩୨ କିଲୋମିଟରରୁ ଅଧିକ ଦୂରତା ପାଇଁ ସର୍ବାଧିକ ଭଡ଼ା ୬୦ ଟଙ୍କାରୁ ୬୪ ଟଙ୍କାକୁ ବୃଦ୍ଧି କରାଯାଇଛି ।

ଏହା ବ୍ୟତୀତ, ରବିବାର ଏବଂ ଜାତୀୟ ଛୁଟିଦିନମାନଙ୍କରେ ମିଳୁଥିବା ରିହାତିରେ ମଧ୍ୟ ସାମାନ୍ୟ ପରିବର୍ତ୍ତନ କରାଯାଇଛି । ପୂର୍ବରୁ ଏହି ଦିନମାନଙ୍କରେ ୧୦ ଟଙ୍କାରୁ ୫୦ ଟଙ୍କା ପର୍ଯ୍ୟନ୍ତ ଭଡ଼ା ଲାଗୁଥିବା ବେଳେ, ବର୍ତ୍ତମାନ ଏହା ୧୧ ଟଙ୍କାରୁ ୫୪ ଟଙ୍କା ମଧ୍ୟରେ ରହିବ ।  ତେବେ, ସ୍ମାର୍ଟ କାର୍ଡ ବ୍ୟବହାରକାରୀମାନଙ୍କୁ ପୂର୍ବଭଳି ପ୍ରତ୍ୟେକ ଯାତ୍ରାରେ ୧୦% ରିହାତି ମିଳିବ ବୋଲି DMRC ସ୍ପଷ୍ଟ କରିଛି । 

କାହିଁକି ବଢିଲା ଭଡ଼ା?
ଦିଲ୍ଲୀ ମେଟ୍ରୋ ପକ୍ଷରୁ ଶେଷ ଥର ପାଇଁ ୨୦୧୭ ମସିହାରେ ଭଡ଼ା ସଂଶୋଧନ କରାଯାଇଥିଲା ।  ସେତେବେଳେ ସର୍ବନିମ୍ନ ଭଡ଼ା ୧୦ ଟଙ୍କା ଏବଂ ସର୍ବାଧିକ ୬୦ ଟଙ୍କା ଧାର୍ଯ୍ୟ କରାଯାଇଥିଲା । ଗତ କିଛି ବର୍ଷ ମଧ୍ୟରେ ପରିଚାଳନା ଖର୍ଚ୍ଚ, ରକ୍ଷଣାବେକ୍ଷଣ ଏବଂ ଅନ୍ୟାନ୍ୟ ଆନୁଷଙ୍ଗିକ ଖର୍ଚ୍ଚ ବୃଦ୍ଧି ପାଇଥିବାରୁ ଭଡ଼ା ବୃଦ୍ଧି କରିବା ଆବଶ୍ୟକ ବୋଲି କୁହାଯାଉଛି । ଦିଲ୍ଲୀ ମେଟ୍ରୋକୁ ରାଜଧାନୀର "ଜୀବନରେଖା" କୁହାଯାଏ । ଏହାର ୩୯୪ କିଲୋମିଟର ଲମ୍ବା ନେଟୱାର୍କ ୨୮୯ ଟି ଷ୍ଟେସନକୁ ସଂଯୋଗ କରେ, ଯେଉଁଥିରେ ନୋଏଡା-ଗ୍ରେଟର ନୋଏଡା ଆକ୍ୱା ଲାଇନ ଏବଂ ଗୁରୁଗ୍ରାମର ରାପିଡ୍ ମେଟ୍ରୋ ମଧ୍ୟ ସାମିଲ ରହିଛି ।  ପ୍ରତିଦିନ ଲକ୍ଷ ଲକ୍ଷ ଲୋକ ନିଜର କାର୍ଯ୍ୟସ୍ଥଳ, ସ୍କୁଲ, କଲେଜ ଏବଂ ଅନ୍ୟାନ୍ୟ କାର୍ଯ୍ୟ ପାଇଁ ମେଟ୍ରୋ ଉପରେ ନିର୍ଭର କରନ୍ତି । ଏହି ଭଡ଼ା ବୃଦ୍ଧି ନିଶ୍ଚିତ ଭାବରେ ସେମାନଙ୍କ ମାସିକ ବଜେଟକୁ ପ୍ରଭାବିତ କରିବ ।