କନକ ବ୍ୟୁରୋ : ଦିଲ୍ଲୀ କୋର୍ଟ ତରଫରୁ ପ୍ରବର୍ତ୍ତନ ନିର୍ଦ୍ଦେଶାଳୟ ବା ଇଡି ଦ୍ୱାରା ସୋସିଆଲ ମିଡିଆରେ ଆମ୍ ଆଦମୀ ପାର୍ଟି ନେତା ସତ୍ୟନ୍ଦ୍ର ଜୈନଙ୍କ ଘରୁ ତଲାସ ବେଳେ ମିଳିଥିବା ସମ୍ପତ୍ତିକୁ ନେଇ ମିଥ୍ୟା ତଥ୍ୟ ଦେଇଥିବାରୁ ଏହାକୁ କୋର୍ଟ ଭର୍ସନା କରିଛନ୍ତି ।

Advertisment

୨୦୨୨ ଜୁନ୍ ୭ ତାରିଖରେ ଇଡି ତରଫରୁ ସୋସିଆଲ ମିଡ଼ିଆରେ ଏକ ପୋଷ୍ଟ କରାଯାଇଥିଲା । ଏଥିରେ ଲେଖାଯାଇଥିଲା କି, ଆପ୍ ନେତା ସତ୍ୟନ୍ଦ୍ର ଜୈନ ଓ ତାଙ୍କ ସଂପର୍କୀଙ୍କ ଘରେ ଚଢ଼ାଉ ବେଳେ ୨.୮୫ କୋଟି ନଗଦ ଟଙ୍କା ଓ ୧.୮୦ କିଲୋ ସୁନା ସହ କିଛି ଆପତ୍ତିଜନକ କାଗଜପତ୍ର ଜବତ ହୋଇଛି । ହେଲେ ବାସ୍ତବରେ ଏହି ଜବତ ସତ୍ୟନ୍ଦ୍ର ଜୈନଙ୍କ ଘରୁ ହୋଇନଥିଲା । 

କୋର୍ଟ କହିଛନ୍ତି କି ଇଡି ଯେଭଳି ସତ୍ୟନ୍ଦ୍ର ଜୈନ ଓ ତାଙ୍କ ସଂପର୍କୀୟଙ୍କ ଘରୁ ଜବତକୁ ନେଇ ଶବ୍ଦ ବ୍ୟବହାର କରିଥିଲା, ଏଥିରେ ଲୋକମାନଙ୍କ ମଧ୍ୟରେ ଧାରଣା ତିଆରି ହୋଇଥିଲା କି, ଏହି ଜବତ ସତ୍ୟନ୍ଦ୍ର ଜୈନ ଓ ତାଙ୍କ ସଂପର୍କୀୟଙ୍କ ଘରୁ ଜବତ୍ ହୋଇଛି । 

ନ୍ୟାୟାଳୟ ସ୍ପଷ୍ଟ କରିଛନ୍ତି କି, ଚଢାଉ ବେଳେ ଅଭିଯୁକ୍ତ ସତ୍ୟନ୍ଦ୍ର ଜୈନଙ୍କ ଘରୁ କିଛି ବି ଜବତ ହୋଇନଥିଲା । "ଏହା ସ୍ୱୀକୃତ ହେବାକୁ ଯାଉଛି ଯେ ଚଢାଉ ବେଳେ ଅଭିଯୁକ୍ତଙ୍କ ଘରୁ କୌଣସି ଜବତ ହୋଇନଥିଲା, ଇଡ଼ି ତରଫରୁ ଟ୍ୱିଟ୍ ମାଧ୍ୟମରେ ବ୍ୟକ୍ତ କରାଯାଇଥିବା ନିହିତାର୍ଥ ସତ୍ୟ ଢାଞ୍ଚାର ସମ୍ପୂର୍ଣ୍ଣ ବିପରିତ ଅଟେ । ପ୍ରସ୍ତୁତ କରାଯାଇଥିବା ସୂଚନାର ସଠିକତା ଓ ସତ୍ୟତାକୁ ଏହି ପୋଷ୍ଟ ଗୁରୁତ୍ୱପୂର୍ଣ୍ଣ ଭାବେ ଦୁର୍ବଳ କରିଛି' । ଏହି ସନ୍ଦର୍ଭରେ ନ୍ୟାୟାଳୟ ଜୋର ଦେଇ କହିଛନ୍ତି ପ୍ରବର୍ତ୍ତନ ନିର୍ଦ୍ଦେଶାଳୟକୁ ନିରପେକ୍ଷ ଭାବେ କାର୍ଯ୍ୟ କରିବା ଉଚିତ । 
ରାଉଜ୍ ଏଭିନ୍ୟୁ କୋର୍ଟର ସ୍ପେଶାଲ ଜଜ୍ ଜଷ୍ଟିସ ଜିତେନ୍ଦ୍ର ସିଂ କହିଛନ୍ତି କି, ଭୁଲ ତଥ୍ୟ ଦେଇ କୌଣସି ବ୍ୟକ୍ତିଙ୍କୁ ବଦନାମ କରିବା କିମ୍ବା ରାଜନୈତିକ ଭାବେ ପୂର୍ବପକ୍ଷ ରଖିବାର ଇଚ୍ଛା କେବଳ ଇଡ଼ିର ନିରପେକ୍ଷତାକୁ ଦୁର୍ବଳ କରିବ ନାହିଁ, ଦେଶର ସରକାରୀ ଯାଂଚ ଏଜେନ୍ସିଗୁଡିକ ଉପରେ ଲୋକଙ୍କର ଭରସା ଓ ବିଶ୍ୱାସ ତୁଟିବା ଭୟ ରହିଛି । ଏହା ଭାରତୀୟ ସମ୍ବିଧାନର ଧାରା ୨୧  ମୁତାବକ କୌଣସି ବ୍ୟକ୍ତିର ମୌଳିକ ଅଧିକାର ଉଲ୍ଲଘଂନ କରେ । ସମ୍ପୂର୍ଣ୍ଣ ସମ୍ମାନର ସହ କୋର୍ଟ କହିଛନ୍ତି ଇଡି ଭଳି ଯାଂଚ ଏଜେନ୍ସିର ଦାୟିତ୍ୱ ହେଉଛି ନିରପେକ୍ଷ ଭାବେ କାର୍ଯ୍ୟ କରିବା