କନକ ବ୍ୟୁରୋ: ଦିଲ୍ଲୀ ନିର୍ବାଚନକୁ ନେଇ ଯେତିକି ଚର୍ଚ୍ଚା ହେଉଥିଲା, ରେଜଲ୍ଟକୁ ନେଇ ବି ସେତିକି ଚର୍ଚ୍ଚା । କାରଣ ଦେଶର ସବୁ ବଡ଼ ସଂସ୍ଥା ଦ୍ବାରା କରାଯାଇଥିବା ଏକଜିଟ୍‌ ପୋଲରେ କୁହାଯାଉଛି କି, ଆସନ୍ତାକାଲି ରେଜଲ୍ଟରେ ଆପ୍‌ର ବିଜୟ ସ୍ବପ୍ନ ଅଧୁରା ରହିଯିବା ନେଇ ଚର୍ଚ୍ଚା ବି ହେଉଛି । ତେଣୁ ଏମିତି ସମୟରେ ଦିଲ୍ଲୀରେ ଆପ୍‌ ସରକାର କରିବା ସମ୍ଭବ ହେଉନି । ଏତିକି ବେଳେ ଏକ ରାଜନୈତିକ ଦଳ ଆପ୍‌କୁ ସମର୍ଥନ ଦେବ ବୋଲି ଘୋଷଣା କରିଛି । ଯାହାକୁ ନେଇ ଜୋରଦାର ଚର୍ଚ୍ଚା ଚାଲିଛି । ଦିଲ୍ଲୀକୁ ନେଇ ହୋଇଥିବା ଏକଜିଟ୍‌ ପୋଲର ଆକଳନ ଅନୁସାରେ କଂଗ୍ରେସ ଏଥର ଖାତା ଖୋଲିନପାରେ । କିନ୍ତୁ ଏମିତି ସ୍ଥିତିରେ ଅସଉଦ୍ଦିନ୍‌ ଓୱେସୀଙ୍କ ନେତୃତ୍ବାଧୀନ ଏଆଇଏମଆଇଏମ୍‌ ଖାତା ଖୋଲିବା ନେଇ ଦାବି କରିଛନ୍ତି ଦଳୀୟ  ନେତା । ଯଦି ଏମିତି ହୁଏ ତାହାଲେ ଦିଲ୍ଲୀରେ କିଛି ଗୋଟାଏ ପରିବର୍ତ୍ତନ ହୋଇପାରେ । ଅବଶ୍ୟ କେତେ ଆସନ ମିଳିବ ସେନେଇ ଏକଜିଟ୍‌ ପୋଲ କିଛି ଖୁଲାସା କରିନି କିନ୍ତୁ ନେତା କହୁଛନ୍ତି ଦୁଇଟି ସିଟ୍‌ରେ ସେମାନଙ୍କ ପ୍ରାର୍ଥୀ ବିଜୟ ହେବେ । ଖାଲି ଏତିକି ନୁହେଁ ବରଂ ସେମାନେ କେଜ୍ରିୱାଲଙ୍କୁ ସମର୍ଥନ ଦେବେ ବୋଲି ବି ଘୋଷଣା କରିଛନ୍ତି । 

Advertisment

ଦିଲ୍ଲୀ ରାଜନୀତିରେ ବିଷମ ସ୍ଥିତି
ବିଜେପିକୁ ସଂଖ୍ୟା ଗରିଷ୍ଠତା ମିଳିବା ନେଇ ସଂକେତ
ଆପ ତୃତୀୟଥର ଲାଗି ସରକାର କରିବାକୁ ଦେଖୁଛି ସ୍ବପ୍ନ

ରାତି ପାହିଲେ ଦିଲ୍ଲୀ ଦଖଲ କରିବ କିଏ ସେନେଇ ଧୀରେ ଧୀରେ ଚିତ୍ର ସ୍ପଷ୍ଟ ହେବାରେ ଲାଗିବ । କିନ୍ତୁ ଏବେଠୁ ଚର୍ଚ୍ଚା ଜୋର ଧରିଛି । ଓୱେସୀଙ୍କ ଦଳର ନେତା ଯେଉଁ ଦାବି କରୁଛନ୍ତି ସେଥିରୁ ଗୋଟିଏ କଥା ସ୍ପଷ୍ଟ ଏଆଇଏମଆଇଏମ୍‌କୁ ଗୋଟିଏ କିମ୍ବା ଦୁଇଟି ଆସନ ମିଳିବ । ଏହାସହ ସେମାନେ କହିଛନ୍ତି, ଦିଲ୍ଲୀରେ ଏଥର ପରିବର୍ତ୍ତନ ହେବା ନେଇ ସଂକେତ ମିଳିଛି, ତେଣୁ ଆମ ଦଳକୁ ଜନତା ଭୋଟ୍‌ ଦେବେ ।  

କେଜ୍ରିୱାଲଙ୍କୁ ସମର୍ଥନ ଦେବେ କି ଓୱେସୀ ? 

ଏଆଇଏମଆଇଏମ୍‌ର ବରିଷ୍ଠ ନେତା କେଜ୍ରିୱାଲଙ୍କୁ ସମର୍ଥନ ଦେବା ନେଇ କହିବା ପରେ ଜୋର ଧରିଛି ରାଜନୀତି । କାରଣ ବରିଷ୍ଠ ନେତା କହିଛନ୍ତି ଦିଲ୍ଲୀରେ ସେମାନେ ଆପ୍‌ ସହ ମେଣ୍ଟ କରିବେ । କିନ୍ତୁ ନିଷ୍ପତ୍ତି ନେବେ ଦଳର ଅଧ୍ୟକ୍ଷ । ଦଳର ସଭାପତି ଯେଉଁ ନିଷ୍ପତ୍ତି ନେବେ ଆମେ ତାହାକୁ ପାଳନ କରିବୁ । କାରଣ ଉଭୟ ଦଳ ନିର୍ବାଚନ ଆୟୋଗଙ୍କ ପାଖରେ ଅଭିଯୋଗ କରିଛନ୍ତି । ଅଭିଯୋଗ ଏହା କି, ଦିଲ୍ଲୀ ନିର୍ବାଚନରେ ବିଜେପି ସରକାର ଟାମ୍ପରିଂ କରିଛି । ଅବଶ୍ୟ ଏହା ସତ କି ମିଛ ସେନେଇ କୌଣସି ଖବର ମିଳିନାହିଁ । କିନ୍ତୁ ଏହାକୁ ନେଇ ଦିଲ୍ଲୀ ରାଜନୀତିରେ ଜୋରଦାର ଚର୍ଚ୍ଚା ହେଉଛି । ସେପଟେ ଦିଲ୍ଲୀରେ ବିଜୟ ଉତ୍ସବ ପାଳନ କରିବା ଲାଗି ବିଜେପି କୁଆଡ଼େ ପ୍ରସ୍ତୁତି କରିଛି । ଏପଟେ କେଜ୍ରିୱାଲଙ୍କ ଘର ସାମ୍ନାରେ କଡ଼ା ସୁରକ୍ଷା ବ୍ୟବସ୍ଥା କରିଛି ଦିଲ୍ଲୀ ପୋଲିସ । ଅପେକ୍ଷା ଆଉ ମାତ୍ର କିଛି ଘଂଟାକୁ । ସମୟ ଗଡ଼ିବା ଅନୁସାରେ ଦିଲ୍ଲୀ ଆସନରେ କିଏ ବସିବ ତାହା ପ୍ରମାଣ ହୋଇଯିବ ।