ଦିଲ୍ଲୀର ବାୟୁ ପ୍ରଦୁଷଣ ମାନ ୪ ଶହ ଟପିଲା । ସୋମବାର ପର୍ଯ୍ୟନ୍ତ ସମସ୍ତ ପ୍ରାଥମିକ ବିଦ୍ୟାଳୟ ବନ୍ଦ, ଗ୍ରାଫ ଗ୍ରେଡ ୩ ଓ ୪ ଲାଗୁ

କନକ ବ୍ୟୁରୋ : ଦିଲ୍ଲୀରେ ପ୍ରଦୂଷଣ ଏଭଳି ସାଂଘାତିକ ସ୍ଥିତିରେ ପହଁଚିଛି ଯେ ରାସ୍ତାଘାଟ ଦେଖାଯାଉନି । ଦିନ ବି ଲାଗୁଛି ସଂଧ୍ୟା ପରି । ଯୁଆଡେ ଆଖି ପଡୁଛି ସେଠି ଖାଲି ପ୍ରଦୂଷଣର ମୋଟା ଆସ୍ତରଣ ରହିଛି । ଦିପାବଳୀ ପରେ ଦିଲ୍ଲୀରେ ସାଂଘାତିକ ରୂପ ନେଲାଣି ପ୍ରଦୂଷଣ । ନିଶ୍ବାସ ନେବା ମୁସ୍କିଲ ହୋଇପଡିଛି । ଦିଲ୍ଲୀରେ ପ୍ରଦୂଷଣର ମାତ୍ରା ଗମ୍ଭୀର ସ୍ଥିତିରେ ରହିଛି । ଆନନ୍ଦବିହାରରେ ସବୁଠାରୁ ପ୍ରଦୂଷଣର ମାତ୍ରା ଅଧିକ ରହିଛି । ସେହିପରି ଦ୍ଵାରକା, ଆରକେ ପୁରମ, ମୁଣ୍ଡକା, ଚାନ୍ଦନୀ ଚୌକରେ ମଧ୍ୟ ଅଧିକ ପ୍ରଦୂଷଣ ରହିଛି । ସ୍ଥିତିକୁ ଦେଖିକି ସୋମବାର ପର୍ଯ୍ୟନ୍ତ ସମସ୍ତ ଘରୋଇ ଓ ସରକାରୀ ପ୍ରାଇମେରୀ ସ୍କୁଲ ବନ୍ଦ ରଖାଯିବା ସହ ଅନଲାଇନ ପାଠ ପଡାଇବାକୁ ନିର୍ଦ୍ଦେଶ ଦେଇଛନ୍ତି ଦିଲ୍ଲୀ ସରକାର  

 ସେପଟେ  ଆଜିଠୁ ଦିଲ୍ଲୀରେ ଗ୍ରାଫ୍ ୩ କଟକଣା ଲାଗୁ କରାଯାଇଛି । ଦିଲ୍ଲୀରେ ପ୍ରଦୂଷଣର ମାତ୍ରା ବୃଦ୍ଧି ପାଇଥିବାରୁ 
-ଗ୍ରେଡେଡ ରେସପନ୍ସ ଆକ୍ସନ ପ୍ଲାନ୍ ଗ୍ରାପ ସ୍ତରର ୩ ନମ୍ବର କଟକଣା ଜାରି 
-ବିଏସ-୩ ଓ ବିଏସ-୪ ଡିଜେଲ ଚାରି ଚକିଆ ଗାଡି ଚଳାଚଳ ଉପରେ କଟକଣା 
-ହାଲୁକା ବ୍ୟବସାୟିକ ଯାନ, ଡିଜେଲ ଟ୍ରକର ପ୍ରବେଶ ଉପରେ କଟକଣା 
-ଅନାବଶ୍ୟକ ନିର୍ମାଣ କାର୍ଯ୍ୟ ବନ୍ଦ
-ଉଚ୍ଛେଦ କାର୍ଯ୍ୟ  ମଧ୍ୟ ବନ୍ଦ
-ହୋଟେଲ, ରେସ୍ତୋରାଁରେ ତନ୍ଦୁର ଚୁଲିରେ କୋଇଲା ଏବଂ କାଠ ଜାଳିବା ଉପରେ କଟକଣା 
-କେବଳ ଜରୁରୀକାଳୀନ କାର୍ଯ୍ୟ ପାଇଁ ଡିଜେଲ ଜେନେରେଟରର ବ୍ୟବହାର ହୋଇପାରିବ
-ଶିଳ୍ପରେ ଅଣସ୍ଵୀକୃତି ଇନ୍ଧନର ବ୍ୟବହାରରେ କଟକଣା 

ଯେଣେତେଣେ ରାଜଧାନୀରୁ  ପ୍ରଦୁଷଣ କମ କରିବାକୁ କସରତ କରାଯାଉଛି । ଧୂଳିକୁ କମ କରିବାକୁ ରାସ୍ତାରେ ପାଣି ସିଂଚନ ଉପରେ ଗୁରୁତ୍ଵ ଦିଆଯାଉଛି । ତଥାପି ଆଶାନୁରୂପକ ଫଳ ମିଳିପାରୁନି । ଏହି ସବୁ ଭିତରେ ବୟସ୍କ ଓ ପିଲାଙ୍କ ପାଇଁ କାଳ ସାଜିଛି ଦିଲ୍ଲୀର ପ୍ରଦୁଷଣ । ସମସ୍ୟା ନକମିଲେ ଗୁରୁତର ସ୍ବାସ୍ଥ୍ୟ ସମସ୍ୟା ଦେଖାଯିବା ନେଇ ସତର୍କ କରାଇଛନ୍ତି । ସେପଟେ ପ୍ରଦୁଷଣକୁ ନେଇ ବିଜେପି ଓ ଆପ ସରକାରଙ୍କ ମଧ୍ୟରେ ଦୋଷ ଲଦାଲଦି ଜାରି ରହିଛି ।