ନିଯୁକ୍ତି: ଖୋଲିଲା ପୂର୍ବ ସରକାରର ପୋଲ୍

କନକ ବ୍ୟୁରୋ: ନିଯୁକ୍ତି ଓ ବେକାରୀ ସମସ୍ୟାକୁ ନେଇ ସାରା ଦେଶରେ ବିତର୍କ ଚାଲିଛି। ଆଉ ଏତିକିବେଳେ ଓଡିଶାରେ ନିଯୁକ୍ତି ନେଇ ଚମକାଇ ଦେଲା ଭଳି ତଥ୍ୟ ବିଧାନସଭାରୁ ଆସିଛି। ଦକ୍ଷତା ବିକାଶ, ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ସ୍ବାଇଁ ବିଧାନସଭାରେ ଦେଇଥିବା ତଥ୍ୟରେ କହିଛନ୍ତି ଯେ, ବିଗତ ୧୦ ବର୍ଷ ରେ ୧୮ ଲକ୍ଷ ୪୨ ହଜାର ୬୭ ଜଣ ତାଲିମ ଦେଇଥିଲେ ରାଜ୍ୟ ସରକାର କିନ୍ତୁ ଚାକିରି ଦେଇଛନ୍ତି ମାତ୍ର ୧ ଲକ୍ଷ ୫ ହଜାର ୪୪୪ ପିଲାଙ୍କୁ।

Advertisment

ନିଯୁକ୍ତି ନେଇ ଖୋଲିଲା ବିଜେଡି ସରକାରର ପୋଲ
ତାଲିମ୍ ନେଲେ ୧୮ ଲକ୍ଷ, ନିଯୁକ୍ତି ପାଇଲେ ୧ ଲକ୍ଷ
ପୂର୍ବ ସରକାରକୁ ଦୋଷ ଦେଲେ ମୁଖ୍ୟମନ୍ତ୍ରୀ

ସେପଟେ ଆଉ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ରାଜ୍ୟରେ ବିଗତ ପାଞ୍ଚ ବର୍ଷରେ ନିଯୁକ୍ତି ସମ୍ପର୍କରେ ତଥ୍ୟ ରଖିଛନ୍ତି। ତଥ୍ୟ ଅନୁସାରେ, ୧୨ ଲକ୍ଷ ୧୩ ହଜାର ୯୨୪ ଜଣ ଯୁବକ ଯୁବତୀ ପଞ୍ଜିକରଣ କରି ଚାକରି ଅପେକ୍ଷାରେ ଅଛନ୍ତି। ହେଲେ, ସେମାନଙ୍କ ମଧ୍ୟରୁ ମାତ୍ର ୨୨୭୪ ଜଣଙ୍କୁ ନିଯୁକ୍ତି ଦେଇଛନ୍ତି ରାଜ୍ୟ ସରକାର। ତେବେ କମ୍ ନିଯୁକ୍ତିକୁ ନେଇ ଓଡିଶା ବିଜେଡି ସରକାର ଉପରେ ବର୍ଷିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। କହିଛନ୍ତି, ପୂର୍ବ ସରକାରଙ୍କ ନିଯୁକ୍ତିରେ ସ୍ବଛତା ନଥିଲା, ଦୁର୍ନୀତିରେ ବୁଡି ରହିଥିଲା।

ବଡ଼ କଥା ହେଲା ୨୨୬ ଟି ନିଯୁକ୍ତି ମେଳା ଆୟୋଜନ ପାଇଁ ସରକାର ଖର୍ଚ୍ଚ କରିଛନ୍ତି ୩ କୋଟି ୮୦ ଲକ୍ଷ ଟଙ୍କା। ସେହିପରି ନିଯୁକ୍ତି ଭିତ୍ତିକ ତାଲିମ କାର୍ଯ୍ୟକ୍ରମ ଜରିଆରେ ବିଗତ ପାଞ୍ଚ ବର୍ଷରେ ୩୬ ହାଜର ୩୨୯ ଜଣ ଯୁବକ ଯୁବତୀଙ୍କୁ ତାଲିମ ଦିଆଯାଇଥିବା ବେଳେ ନିଯୁକ୍ତି ଦେଇଛନ୍ତି ମାତ୍ର ୧୫ ହଜାର ୩୮ ଜଣଙ୍କୁ।

ତେବେ ଗୋଟିଏ ପଟେ ରାଜ୍ୟରେ ବେକାରୀ ସଂଖ୍ୟା ବଢ଼ି ଚାଲିଥିଲାବେଳେ, ଅନ୍ୟପଟେ ହଜାର ହଜାର ସରକାରୀ ପଦବୀ ପାଙ୍କା ପଡିଛି। ତେଣୁ ନୂଆ ସରକାର ଫାଙ୍କା ପଡିଥିବା ପଦବୀରେ ନୂଆ ନିଯୁକ୍ତି କେବେ ଦେଉଛନ୍ତି ତା ଉପରେ ସମସ୍ତଙ୍କ ନଜର ରହିଛି।