କୋର୍ଟରେ ହାଜର ଅଭିଯୁକ୍ତ ଫୈଜଲ: ଶାହାରୁଖ ଖାନଙ୍କୁ ଧମକ ଦେଇଥିବା ଅଭିଯୋଗରେ ରାୟପୁରରୁ ଗିରଫ କରିଛି ମୁମ୍ବାଇ ପୁଲିସ

କନକ ବ୍ୟୁରୋ: ବଲିଉଡ୍ ବାଦଶାହ ଶାହରୁଖ୍‌ ଖାନଙ୍କୁ ହତ୍ୟା ଧମକ ଦେଇଥିବା ଅଭିଯୁକ୍ତକୁ ବାନ୍ଧିଲା ମୁମ୍ବାଇ ପୋଲିସ୍‌ । ମଙ୍ଗଳବାର ସକାଳେ ମୁମ୍ବାଇ ପୋଲିସ ଛତିଶଗଡ଼ର ରାୟପୁରରୁ ଅଭିଯୁକ୍ତ ଫୈଜାନ ଖାନଙ୍କୁ ଗିରଫ କରିଛି । ଅଭିଯୁକ୍ତ ଜଣକ ରାୟପୁରରୁ ଥାଇ ଶାହରୁଖଙ୍କ କମ୍ପାନୀ ରେଡ୍ ଚିଲିଜସକୁ ଫୋନ କରି ଧମକ ଦେଇଥିଲା ।

ମୁମ୍ବାଇ ପୁଲିସ କିଙ୍ଗଖାନଙ୍କୁ ହତ୍ୟା ଧମକ ଘଟଣାରେ ଜଣେ ଅଭିଯୁକ୍ତକୁ ଗିରଫ କରିଛି । ଛତିଶଗଡ଼ ରାୟପୁରରୁ ମୁଖ୍ୟ ଅଭିଯୁକ୍ତ ଫୈଜାନ ଖାନକୁ ଗିରଫ କରିଛି ପୁଲିସ । ଗତ ସପ୍ତାହରେ ବଲିଉଡର ବାଦଶାହଙ୍କୁ ଜୀବନରେ ମାରିଦେବାକୁ ଧମକ ମିଳିଥିଲା । ଏନେଇ ମୁମ୍ବାଇ ବାନ୍ଦ୍ରା ପୁଲିସ ଷ୍ଟେସନରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଥିଲା ।  ବାନ୍ଦ୍ରାସ୍ଥିତ ଶାହରୁଖ ଖାନଙ୍କ ପ୍ରଡକ୍ସନ୍ କମ୍ପାନୀ ରେଡ୍ ଚିଲିସ୍ ଏଣ୍ଟରଟେନମେଣ୍ଟ ଅଫିସକୁ ଜଣେ ବ୍ୟକ୍ତି ଫୋନ୍‌ କରି ଅଭିନେତାଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ । ତେବେ ଏହି କଲ ଛତିଶଗଡ଼ ରାୟପୁରରୁ ଆସିଥିଲା । ଯାହାର ତଦନ୍ତ କରି ମାମଲାର ପର୍ଦ୍ଦାଫାସ କରିଛି ପୁଲିସ୍ ।

ତେବେ ଶାହରୁଖଙ୍କ ପୂର୍ବରୁ ସଲମାନ ଖାନଙ୍କୁ ମଧ୍ୟ ହତ୍ୟା ଧମକ ମିଳିଥିଲା । ସଲମାନଙ୍କୁ କ୍ରମାଗତ ଭାବରେ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ନାଁରେ ଧମକ ଦିଆଯାଉଛି । ଗତ ମାସରେ ସଲମାନଙ୍କ ବନ୍ଧୁ ତଥା ଏନସିପି ନେତା ବାବା ସିଦ୍ଦିକିଙ୍କୁ ହତ୍ୟା କରାଯାଇଥିଲା । ଏବେ ଶାହରୁଖଙ୍କ ଧମକପୂର୍ଣ୍ଣ ଫୋନ୍‌ କଲ୍‌ ମିଳିବା ପରେ ତାଙ୍କ ସୁରକ୍ଷା ମଧ୍ୟ କଡ଼ାକଡ଼ି କରାଯାଇଛି । ଶାହରୁଖ୍‌ ରହୁଥିବା ମନ୍ନତରେ ସୁରକ୍ଷା ବୃଦ୍ଧି କରାଯାଇଛି । ବାରମ୍ବାର ଏଭଳି ଧମକ ଘଟଣା ଏବେ ବଲିଉଡରେ ଭୟର ଖେଳାଇଦେଇଛି ।