ପୁନଶ୍ଚ ପୃଥିବୀ ସମ୍ମିଳନୀରେ ନବୀନ ପଟ୍ଟନାୟକ; ଜଳବାୟୁ ପରିବର୍ତ୍ତନର ପ୍ରଭାବ ସହ ପରିବେଶ ସୁରକ୍ଷା ଦିଗରେ ଦେଲେ ନିଜର ମତ

କନକ ବ୍ୟୁରୋ : ଜଳବାୟୁ ପରିବର୍ତ୍ତନ ପ୍ରସଙ୍ଗରେ ମାନସ ମନ୍ଥନ ପାଇଁ ବୁଧବାରଠାରୁ ଆରମ୍ଭ ହୋଇଥିବା ମହାସମ୍ମିଳନୀ ଆଜି ଦ୍ୱିତୀୟ ଦିନରେ ପହଞ୍ଚିଛି । ଗୁରୁବାର ୫ଟି ସେସନରେ ବଛାବଛା ବିଶେଷଜ୍ଞଙ୍କୁ ନେଇ ଜଳବାୟୁ ପରିବର୍ତ୍ତନର ପ୍ରଭାବ ସହ ପରିବେଶ ସୁରକ୍ଷା ଦିଗରେ ଚର୍ଚ୍ଚା ଆଲୋଚନା କରାଯାଇଛି । ପରିବେଶକୁ ନେଇ ଫିଲ୍ମ ନିର୍ମାଣ ଓ ପରିବର୍ତ୍ତନ ପାଇଁ ପ୍ରେରଣାଦାୟୀ କାହାଣୀ ପ୍ରସଙ୍ଗରେ ନିଜନିଜ ମତ ରଖିଛନ୍ତି ଜଣାଶୁଣା ଡକ୍ୟୁମେଣ୍ଟାରୀ ଫିଲ୍ମ ନିର୍ମାତା ସଞ୍ଜୟ ବର୍ଣ୍ଣେଲା ଓ ଲିପିକା ସିଂ ଦରାଇ । ଏହି ଆଲୋଚନାରେ ଭାଗ ନେଇଛନ୍ତି ବିଜେପି ବିଧାୟକ ତଥା ଅଭିନେତା ଆକାଶ ଦାସ ନାୟକ ।

ସହରାଞ୍ଚଳରେ ବିକାଶ କିଭଳି ସବୁଜିମାର ବିରୋଧୀ ସାଜିଛି ସେନେଇ ଆଲୋକପାତ କରିଛନ୍ତି ବିଶେଷଜ୍ଞ । ତେବେ ପରିବେଶକୁ କ୍ଷତି ନପହଞ୍ଚାଇ ସମାନ୍ତରାଳ ଭାବେ ଉନ୍ନତି କାମ କେମିତି ଆଗେଇ ଚାଲିବ ସେନେଇ ଗୁରୁତ୍ୱ ଦିଆଯାଇଛି । ସେପଟେ ଜଙ୍ଗଲ ସୁରକ୍ଷା ଓ ଆଦିବାସୀଙ୍କ ଅଧିକାର ପାଇଁ ଲଢେଇ କରୁଥିବା ଗବେଷକ ସରକାରଙ୍କ ଉପରେ ବର୍ଷିଛନ୍ତି ।

ରତ୍ନଗର୍ଭା ଓଡ଼ିଶାରେ କିଳଭି ଖଣି ନିୟମକୁ ଖୋଲାଖୋଲି ଉଲ୍ଲଙ୍ଘନ କରାଯାଉଛି ସେନେଇ ଉଦବେଗ ପ୍ରକାଶ ପାଇଛି । ଏ କ୍ଷେତ୍ରରେ କାମ କରୁଥିବା ବିଶେଷଜ୍ଞଙ୍କ ମତରେ ଖଣି ଅଞ୍ଚଳରେ ବ୍ୟାପକ ବନିକରଣ ପାଇଁ ନିୟମ ଥିଲେ ମଧ୍ୟ ତାହା ନାଲିଫିତା ତଳେ ରହିଯାଇଛି । ଯାହା ଖଣି ଅଞ୍ଚଳ ଲୋକଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିବା ସହ ପରିବେଶ ସନ୍ତୁଳନକୁ ବିଗାଡ଼ି ଚାଲିଛି ।

ପ୍ରାକୃତିକ ବିପର୍ଯ୍ୟୟର ମୁକାବିଲା ପାଇଁ ରାଜନୈତିକ ଇଚ୍ଛାଶକ୍ତି କିଭଳି ପ୍ରମୁଖ ଭୂମିକା ନେଇଥାଏ, ସେନେଇ ଆଲୋକପାତ କରିଛନ୍ତି ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆମ ପରିବେଶର ସୁରକ୍ଷାକୁ ନେଇ ଏହି ମହାସମ୍ମିଳନୀ ଶୁକ୍ରବାର ଯାଏଁ ଚାଲିବ । ଉଦଯାପନୀ ଉତ୍ସବରେ ଯୋଗଦେବେ ରାଜ୍ୟପାଳ ରଘୁବର ଦାସ ।