ଲଙ୍କାରେ ଦାନବ ରୂପ ଦେଖାଇଲା, ଏବେ ଭାରତମୁହାଁ ବାତ୍ୟା ‘ଦିତ୍-ୱାହ’!

କନକ ବ୍ୟୁରୋ: ଭୟଙ୍କର ରୂପ ନେଇ ଭାରତ ଆଡ଼କୁ ମାଡ଼ି ଆସୁଛି ବାତ୍ୟା । ସାମୁଦ୍ରିକ ବାତ୍ୟା ‘ଦିତ୍‌ୱାହ’ ଶ୍ରୀଲଙ୍କାରେ ତାଣ୍ଡବ ରଚିବା ପରେ ଏବେ ତାମିଲନାଡୁ ମୁହାଁ ହୋଇଛି । ଆସନ୍ତାକାଲି ସ୍ଥଳଭାଗ ଛୁଇଁବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି । ଆଉ ଏନେଇ ରେଡ୍ ଆଲର୍ଟ ଜାରି କରି ସତର୍କ ରହିଛନ୍ତି ତାମିଲନାଡୁ ସରକାର । ଶ୍ରୀଲଙ୍କା ଇତିହାସରେ ସବଠାରୁ ବଡ଼ବାତ୍ୟା ।

ଅଧିକ ପଢନ୍ତୁ :  ଇମ୍ରାନ ଖାନଙ୍କୁ ନେଇ ସସପେନ୍ସ ଜାରି, ପାକିସ୍ତାନ ସରକାର ଓ ସେନାଠୁ ବାପା ବଞ୍ଚିଥିବା ପ୍ରମାଣ ମାଗିଲେ ପୁଅ କାସିମ୍

ଗତକାଲି ସକାଳୁ ସକାଳୁ ଶ୍ରୀଲଙ୍କାର ପୂର୍ବ ଉପକୂଳରେ ଲ୍ୟାଣ୍ଡଫଲ୍‌ କରି ବାତ୍ୟା ‘ଦିତ୍‌ୱାହ’ ଲଙ୍କାକୁ ଦେଖାଇଥିଲା ତାର ଦାନବ ରୂପ । ବାତ୍ୟା ପ୍ରଭାବରେ ଶ୍ରୀଲଙ୍କାରେ ପ୍ରବଳ ବର୍ଷା ଓ ପବନ ଲାଗି ରହିବାରୁ ଅନେକ ଅଞ୍ଚଳରେ ଭୂସ୍ଖଳନ ହୋଇଛି । ୬୦ରୁ ଅଧିକ ଲୋକଙ୍କ ଜୀବନ ଯାଇଥିବାବେଳେ ୨୫ରୁ ଅଧିକ ଲୋକ ନିଖୋଜ ଅଛନ୍ତି ।  ଏପଟେ ଆଜି ସକାଳୁ ସକାଳୁ ତାମିଲନାଡ଼ୁର ୪ ଜିଲ୍ଲା ପାଇଁ ରେଡ୍‌ ଆଲର୍ଟ ଏବଂ ୫ ଜିଲ୍ଲା ପାଇଁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଭାଗ ।

 ବଡ଼କଥା ହେଲା ଶ୍ରୀଲଙ୍କାର ଅବସ୍ଥା ଦେଖି ଏବେ ସତର୍କ ହୋଇଛନ୍ତି ତାମିଲନାଡ଼ୁ ସରକାର । ପ୍ରତିକୂଳ ପାଗ ଚେନ୍ନାଇ ଆନ୍ତର୍ଜାତୀୟ ବିମାନବନ୍ଦରରେ ବିମାନ ଚଳାଚଳକୁ ପ୍ରଭାବିତ କରିଛି, ଯାହା ଫଳରେ ଅନେକ ବିମାନ ଚଳାଚଳ ବାତିଲ କରାଯାଇଛି । ଏହା ସହ ଅନେକ ଟ୍ରେନ ବାତିଲ୍ କରାଯାଇଥିବା ବେଳେ କିଛି ଟ୍ରେନର ସମୟ ବଦଳାଯାଇଛି ।

ଖାଲି ଏତିକି ନୁହେଁ ତାମିଲନାଡୁ ସରକାର ଶନିବାର ରାଜ୍ୟର ସମସ୍ତ ସ୍କୁଲ ପାଇଁ ଛୁଟି ଘୋଷଣା କରିଛନ୍ତି । ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ଏହି ପଦକ୍ଷେପ ନିଆଯାଇଛି । ସେପଟେ ବାତ୍ୟାକୁ ସାମନା କରି ଭାଙ୍ଗିପଡ଼ିଥିବା ଶ୍ରୀଲଙ୍କାକୁ ‘ଅ‌ପରେସନ୍‌ ସାଗରବନ୍ଧୁ’ ମାଧ୍ୟମରେ ସହାୟତା ପଠାଇଛି ଭାରତ । ଶ୍ରୀଲଙ୍କାରେ ମୃତକଙ୍କ ପରିବାର ପ୍ରତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମବେଦନା ଜଣାଇବା ସହ କହିଛନ୍ତି ଯେ ଭାରତ ସବୁବେଳେ ଶ୍ରୀଲଙ୍କା ସହ ରହିଛି । ଆମେ ମିଳିମିଶି ଏ ଦୁଃଖରୁ ବାହାରିବା । ସେଥିପାଇଁ ଅପରେସନ ସାଗର ବନ୍ଧୁ ଅଧୀନରେ ତୁରନ୍ତ ରିଲିଫ୍ ସାମଗ୍ରୀ ପଠାଇଛି । ଆବଶ୍ୟକ ପଡ଼ିଲେ ଭାରତ ଅତିରିକ୍ତ ସହାୟତା ଯୋଗାଇବାକୁ ପ୍ରସ୍ତୁତ ଅଛି ।