ଗଞ୍ଜାମରେ ଗର୍ଜିଲା ବନ୍ଧୁକ

କନକ ବ୍ୟୁରୋ: ଅପରାଧ… ଏ ଶବ୍ଦ ଶୁଣିବା କ୍ଷଣି ମନରେ ଛନକା ପଶେ । ଭୟ ଲାଗେ । ହେଲେ ଗଞ୍ଜାମ ଜିଲ୍ଲାରେ ଏହା ନିତିଦିନିଆ ପାଲଟିଯାଇଛି । ହତ୍ୟା, ଚୋରୀ, ଗଣଦୁଷ୍କର୍ମ, ବୋମାମାଡ଼ ଓ ଗୁଳିମାଡ଼ ଘଟଣା କିଛି ନୂଆ ନୁହେଁ । କେତେବେଳେ କେଉଁଠି ଗୁଳି ଫୁଟିଲାଣି ତ ଆଉ କେଉଁଠି ବୋମା । ଗୋଟିଏ ଜିଲ୍ଲାରେ ଦୁଇଟି ପୁଲିସ ଜିଲ୍ଲା ଓ ଦୁଇ ଦୁଇ ଜଣ ଏସ୍‌ପି ଥାଇ ବି ଆଇନ୍‌ଶୃଙ୍ଖଳା ପରିସ୍ଥିତି ବିଗିଡ଼ିବାରେ ଲାଗିଛି । ଆଜି ବି ଜଣଙ୍କୁ ଗୁଳିମାଡ଼ ହୋଇଛି । ଗୋଟିଏ ବର୍ଷ ଅର୍ଥାତ୍‌ ୨୦୨୫ରେ ଜିଲ୍ଲାର ଆପରାଧିକ ତାଲିକା ବେଶ୍‌ ଲମ୍ବା ରହିଛି । ଆଉ ଅପରାଧିକ ମାମଲା ତାଲିକାରେ ଅନ୍ୟ ଜିଲ୍ଲାକୁ ପଛରେ ପକାଇ ଏକ ନମ୍ବରରେ ରହିଛି ଗଞ୍ଜାମ ।

Advertisment

ଏହା ବି ପଢ଼ନ୍ତୁ: ନୂଆ ପାଞ୍ଜିରେ ସାଙ୍ଘାତିକ ତଥ୍ୟ: ଭୂକମ୍ପ ସହ ବଡ଼ ଦୁର୍ଘଟଣାର ଆଭାସ

ପୁରୁଷୋତ୍ତମ ଥାନା ଅନ୍ତର୍ଗତ ସୁଣ୍ଡିବାଙ୍କ ଗାଁ ନିକଟରେ ଗୁଳିମାଡ଼ । ସୋମବାର ସକାଳ ପ୍ରାୟ ସାଢ଼େ ୮ଟାରେ ଅରଖପୁର ଗାଁର ସାଗର ବେହେରାଙ୍କୁ ଗୁଳିମାଡ଼ କରି ଫେରାର ଦୁର୍ବୃତ୍ତ ।

ଅପରାଧରେ ଏକ ନମ୍ବର ଗଞ୍ଜାମ
ଗଣଦୁଷ୍କର୍ମ, ହତ୍ୟାକାଣ୍ଡ, ବୋମାମାଡ଼ରେ ଅଲୋଡ଼ା ରେକର୍ଡ
ଦେଶରେ ଓଡ଼ିଶାକୁ ଲଜ୍ଜିତ କରିଥିଲା ଗୋପାଳପୁର ଗଣଦୁଷ୍କର୍ମ
ଚାଞ୍ଚଲ୍ୟ ସୃଷ୍ଟି କରିଥିଲା ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ

୨୦୨୫ ମସିହାରେ ଅପରାଧ ତାଲିକାରେ ସବୁ ଜିଲ୍ଲାକୁ ପଛରେ ପକାଇ ଅଲୋଡ଼ା ରେକର୍ଡ ସୃଷ୍ଟି କରିଛି ଗଞ୍ଜାମ ଜିଲ୍ଲା । ଗୋଟିଏ ଜିଲ୍ଲାରେ ୨ଟି ପୁଲିସ ଜିଲ୍ଲା ଥାଇ ବି ଅପରାଧପ୍ରବଣତା ଖୁବ୍‌ ବଢ଼ିଯାଇଛି । ଆଇନଶୃଙ୍ଖଳା ସ୍ଥିତି ସଂପୂର୍ଣ୍ଣ ବିଗିଡ଼ି ଯାଇଛି । ଗଣଦୁଷ୍କର୍ମ, ହତ୍ୟାକାଣ୍ଡ, ଗୁଳିମାଡ଼, ବୋମାମାଡ଼କୁ ନେଇ ରାଜ୍ୟ ରାଜନୀତିରେ ବି ବେଶ ହଟଚମଟ ହୋଇଛି । ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ, ଓ ଗୋପାଳପୁର ଗଣଦୁଷ୍କର୍ମ ମାମଲା ତ ଏଯାଏଁ ମନରୁ ଲିଭିନି । ଗଞ୍ଜାମରେ ୭ ବର୍ଷର ନାବାଳିକାକୁ ଦୁଷ୍କର୍ମ ପରେ ହତ୍ୟା କରାଯିବା ନେଇ ବୀଭତ୍ସ ଚିତ୍ର ବି ସାମ୍ନାକୁ ଆସିଥିଲା ।

ଯଦିଓ ଅଭିଯୁକ୍ତକୁ ଧରୁଛି ପୁଲିସ, ତଥାପି ଅପରାଧ ଉପରମୁହାଁ । ସରକାରୀ ରିପୋର୍ଟରେ ଗଞ୍ଜାମର ଅପରାଧର ଲମ୍ବା ଚିଠା ସାମ୍ନାକୁ ଆସିଛି । ଗୋଟିଏ ବର୍ଷରେ ୯୭ ହତ୍ୟା, ୧୯୪ ଦୁଷ୍କର୍ମ ଘଟିଛି । ଚୋରି ମାମଲା ତ ୧୩୦୦ ପାର୍‌ କରିଛି । ୬୫ଟି ସ୍ଥାନରେ ସଂଘର୍ଷ ଘଟିଛି । ଗୋଟିଏ ଜିଲ୍ଲାରେ ଦୁଇ ଦୁଇ ଜଣ ଏସ୍‌ପି ଥାଇ କାହିଁକି ଅପରାଧ ବଢ଼ୁଛି? ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି । ସରକାରୀ ତଥ୍ୟ ଅନୁସାରେ ଗଞ୍ଜାମ ପୁଲିସ ଜିଲ୍ଲାରେ ଗୋଟିଏ ବର୍ଷରେ ୧୮ ହଜାର ୮୯ ଆପରାଧିକ ମାମଲା ରୁଜୁ ହୋଇଛି ।

ଗଞ୍ଜାମ ପୁଲିସ ଜିଲ୍ଲାରେ କେତେ ମାମଲା ?
ହତ୍ୟା- ୬୯, ଦୁଷ୍କର୍ମ- ୧୧୩, ଡକାୟତି- ୬
ଛିନତାଇ- ୩୨, ସିନ୍ଧିଚୋରି- ୨୨୮, ଚୋରି- ୭୨୨
ଷଡ଼୍‌ଯନ୍ତ୍ର- ୨୩୪, ହିଂସାକାଣ୍ଡ- ୩୨, ଦୁର୍ଘଟଣା- ୬୨୦
ଅନ୍ୟାନ୍ୟ- ୧୬,୦୩୩, ମୋଟ - ୧୮,୦୮୯
ପିଟୁସି- ରାକେଶ ରୋଷନ ମହାନ୍ତି

୨୦୨୫ ମସିହାରେ ବ୍ରହ୍ମପୁର ପୁଲିସ ଜିଲ୍ଲାରେ ଘଟିଥିବା ଚର୍ଚ୍ଚିତ ଘଟଣା ରାଜ୍ୟ ରାଜନୀତିରେ ନିଆଁ ଲଗାଇଥିଲା । ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ପୂରା ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଥିଲା । ଗୋପାଳପୁର ଗଣଦୁଷ୍କର୍ମ ମାମଲା ତ ରେଡ୍‌ ଫ୍ଲାଗ୍‌ ଘୋଷଣା ହୋଇଥିଲା । ବର୍ଷର ପ୍ରାୟ ସବୁ ଦିନ କେଉଁଠି ନା କେଉଁଠି କିଛି ନା କିଛି ଆପରାଧିକ କାର୍ଯ୍ୟକଳାପ ଘଟିଛି । ଯାହାର ସଂଖ୍ୟା ୬ ହଜାର ୮ଶହ ୭୦ । ବ୍ରହ୍ମପୁର ପୁଲିସ ଜିଲ୍ଲାରେ କେତେ ମାମଲା ?