ରାଜରାସ୍ତାରେ ମାଳ ମାଳ ବୁଲା ଗୋରୁ, ରାସ୍ତା ପାଲଟିଛି ଗୋରୁ ଗାଈଙ୍କ ଆଶ୍ରୟସ୍ଥଳୀ

କନକ ବ୍ୟୁରୋ: ରାଜ ରାସ୍ତାରେ ଯେଉଁଠି ଦେଖିବ ସେଠି ଗୋରୁ ମାଳ ମାଳ । ରାଜରାସ୍ତା ପାଲଟିଛି ଗୋରୁଗାଈଙ୍କ ଆଶ୍ରୟସ୍ଥଳୀ । ବାଘମାରୀଠାରୁ ଖୋର୍ଦ୍ଧାରେ ସବୁଠି ଗୋରୁ ଗାଈଙ୍କ ଦୌରାତ୍ମ୍ୟ । ଏହି ସବୁ ରାସ୍ତାରେ ପ୍ରତିଦିନ ଶହଶହ ଗାଡି ଯାତାୟତ କରୁଛି । ହେଲେ ଏହି ସବୁ ଯାତାୟାତରେ ବାଧକ ଖୋଲାରେ ବୁଲୁଥିବା ଗୋରୁ । ଗୋରୁଙ୍କ ପାଇଁ ଗୁହାଳ ଘର ନଥିବାବେଳେ ମାଲିକ ମାନେ ରାଜରାସ୍ତାରେ ଖୋଲା ଛାଡି ଦେଉଛନ୍ତି । ତା ସହିତ ନିଅଣ୍ଟ ହୋଇପଡିଛି ଚାରଣ ଭୂଇଁ। ଯାହାଫଳରେ ଗୋରୁଗାଈ ରାଜରାସ୍ତାରେ ବୁଲିବା ସହିତ ରାସ୍ତାରେ ନେଉଛନ୍ତି ଆଶ୍ରୟ । ଯେଉଁଥିପାଇଁ ଦୁର୍ଘଟଣା ଏଠି ସାଧାରଣ ପାଲଟିଛି ।   

ଖୋର୍ଦ୍ଧା ସହରର ଅନେକ ସ୍ଥାନ ଏବେ ଗୋରୁଙ୍କ ଆଶ୍ରୟ ସ୍ଥଳୀ ପାଲଟିଛି । ନୂଆ ବସଷ୍ଟାଣ୍ଡରୁ ନେଇ  କୋର୍ଟ ଛକ, ବ୍ୟାଙ୍କ ଛକରୁ ନେଇ ଖୋର୍ଦ୍ଧାରୁ ବାଘମାରି ଯିବା ରାସ୍ତାରେ ସବୁ ସ୍ଥାନରେ ମାଳ ମାଳ ଗାଈ ଗୋରୁ ବୁଲୁଛନ୍ତି । ଏହି ସମସ୍ୟା ନେଇ ବହୁବାର ଅଭିଯୋଗ ହୋଇଛି । ହେଲେ ଅଭିଯୋଗ ପ୍ରତି କାହାର ନଜର ନାହିଁ ।  ବୁଲା ଗୋରୁଗାଈ ଯୋଗୁ ପ୍ରତିଦିନ ଘଟୁଛି ଦୁର୍ଘଟଣା । ଏପରିକି ଯାତାୟତରେ ବି ସମସ୍ୟା ଉପୁଜୁଛି । ଏଥିପ୍ରତି ଗୁରୁତ୍ବ ଦିଆଯାଇ ସ୍ବତନ୍ତ୍ର ବ୍ୟବସ୍ଥା କରାଯାଇପାରିଲେ ଯାତ୍ରୀ ମାନେ ଉପକୃତ ହୋଇପାରିବେ  ।