କନକ ବ୍ୟୁରୋ: ଗାଁ ଦାଣ୍ଡରେ ଯୁବକଙ୍କୁ ଅଧା ଲଣ୍ଡା କରି ବୁଲାଇଲେ ଆଉ ଆଣ୍ଠେଇ ଆଣ୍ଠେଇ ଗାଁ ବୁଲାଇଲେ । ଘାସ ଖୁଆଇବା ସହିତ ନର୍ଦ୍ଦମା ପାଣି ମଧ୍ୟ ପିଆଇଲେ । ଗଞ୍ଜାମ ଧରାକୋଟରେ ଘଟିଥିବା କଙ୍ଗାରୁ କୋର୍ଟର ଏ କରୁଣ ପରିଣତି ପରେ ଏହାକୁ ନେଇ ଏବେ ତେଜିଛି ରାଜନୀତି । ଖୋଦ୍ କଂଗ୍ରେସ ନେତା ରାହୁଲ ଗାନ୍ଧୀ ଏ ବିଷୟରେ ବିଜେପି ସରକାରକୁ ଟାର୍ଗେଟ୍ କରିବା ଦେଶ ସମ୍ବିଧାନରେ ଚାଲିବ ମନୁସ୍ମୃତିରେ ନୁହେଁ ବୋଲି ସିଧା ସିଧା କହିଛନ୍ତି ।

Advertisment

ରାହୁଲ ଗାନ୍ଧୀ ସୋସିଆଲ୍ ମିଡିଆରେ ଏହି ଘଟଣା ସମ୍ପର୍କରେ ପୋଷ୍ଟ ସେୟାର୍ କରି ଲେଖିଛନ୍ତି, ଓଡ଼ିଶାରେ ଦୁଇ ଦଳିତ ଯୁବକଙ୍କୁ ଆଣ୍ଠୁରେ ଚଲାଯିବା ସହିତ ଘାସ ଖୁଆଇବା ଘଟଣା ଅମାନବୀୟ ଅଟେ । ଯେଉଁମାନେ ଜାତି ଏବେ ମୁଦ୍ଦା ନୁହେଁ ବୋଲି କହୁଛନ୍ତି, ସେମାନଙ୍କ ପାଇଁ ଏ ଘଟଣା ଆଇନା ବୋଲି କହିଛନ୍ତି ରାହୁଲ ଗାନ୍ଧୀ । ତା ସହିତ ଏ ଦେଶ ସମ୍ବିଧାନ ଦ୍ୱାରା ଚାଲିବ, ମନୁସ୍ମୃତିରେ ନୁହେଁ ବୋଲି କହିଛନ୍ତି କଂଗ୍ରେସର ସାଂସଦ ।

କଂଗ୍ରେସ ନେତା ରାହୁଲ ଗାନ୍ଧୀ ଗଞ୍ଜାମ ଧରାକୋଟର ଏହି ଘଟଣାକୁ ନେଇ ଟାର୍ଗେଟ୍ କରିବା ସହିତ ବିଜେପି ଶାସିତ ରାଜ୍ୟରେ ଏମିତି ଘଟଣା ଏବେ ସାଧାରଣ କଥାରେ ପରିଣତ ହେଲାଣି ବୋଲି କହିଛନ୍ତି । ବିଶେଷକରି ଓଡ଼ିଶାରେ ଏସସି, ଏସଟି ଏବଂ ମହିଳାଙ୍କ ବିରୋଧରେ ବଢୁଥିବା ଅତ୍ୟାଚାର ଚିନ୍ତାଜନକ ବୋଲି କହିଛନ୍ତି ରାହୁଲ । ଏହାସହ ଏହି ଘଟଣାରେ ତୁରନ୍ତ ଅଭିଯୁକ୍ତଙ୍କୁ ଗିରଫ କରିବାକୁ ରାହୁଲ ଦାବି କରିଛନ୍ତି ।

ଏହା ପୂର୍ବରୁ ଗୋପାଳପୁର ଗଣଦୁଷ୍କର୍ମ ଘଟଣାରେ ମଧ୍ୟ ବିଜେପି ସରକାରକୁ ଟାର୍ଗେଟ୍ କରିଥିଲା କଂଗ୍ରେସ । ଦିଲ୍ଲୀରେ ଓଡ଼ିଶାର ନେତାଙ୍କୁ ନେଇ କଂଗ୍ରେସ ପ୍ରେସମିଟ୍ କରିବା ସହିତ ମୋହନ ସରକାର ଉପରେ ବର୍ଷିଥିଲା । ଖାସ୍ କରି ବିଧାୟିକା ସୋଫିଆ ଫିର୍ଦ୍ଦୋସ ଏ ଗଣଦୁଷ୍କର୍ମ ଘଟଣାରେ ସରକାରକୁ କାଠଗଡ଼ାକୁ ଟାଣିଥିଲେ । ଆଉ ଏବେ ଧରାକୋଟ ଘଟଣାରେ ପୁଣି ବିଜେପି ସରକାରକୁ ଟାର୍ଗେଟ୍ କରିଛନ୍ତି ସାଂସଦ ରାହୁଲ ଗାନ୍ଧୀ ।