ଏହି ଡାକ୍ତର ଲେଖିଥିଲେ କାଳରୂପୀ କଫ୍ ସିରପ୍ ... ୧୧ ଜଣ ଶିଶୁଙ୍କ ଚାଲିଯାଇଥିଲା ଜୀବନ

କନକ ବ୍ୟୁରୋ : ମଧ୍ୟପ୍ରଦେଶର ଛିନ୍ଦୱାଡ଼ାରେ କଫ ସିରପ୍ ମାମଲାରେ ପ୍ରଶାସନ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଔଷଧ ଲେଖିଥିବା ଶିଶୁରୋଗ ବିଶେଷଜ୍ଞ ଡାକ୍ତର ପ୍ରବୀଣ ସୋନିଙ୍କୁ ପୁଲିସ ଗିରଫ କରିଛି । ଏସପିଙ୍କ ଦଳ ଗତକାଲି ବିଳମ୍ବିତ ରାତିରେ ଛିନ୍ଦୱାଡ଼ାର କୋତୱାଲି ଥାନା ଅଞ୍ଚଳର ରାଜପାଲ ଚୌକରୁ ଡାକ୍ତର ପ୍ରବୀଣ ସୋନିଙ୍କୁ ଗିରଫ କରିଛି । ପୁଲିସ ବିଭିନ୍ନ ଧାରା ଅନୁଯାୟୀ ମାମଲା ରୁଜୁ କରିଥିଲା । ପୁଲିସ ଔଷଧ ନିର୍ମାଣକାରୀ କମ୍ପାନୀ ବିରୁଦ୍ଧରେ ଏକ ଏଫଆଇଆର ମଧ୍ୟ ରୁଜୁ କରିଛି । କୋଲଡ୍ରିଫ୍ ସିରପ୍ ପିଇବା ପରେ ୧୦ ଜଣ ଶିଶୁଙ୍କ ମୃତ୍ୟୁ ହୋଇଥିଲା । ଡାକ୍ତର ସୋନିଙ୍କ ନିଜସ୍ୱ ଘରୋଇ କ୍ଲିନିକରେ ପିଲାମାନଙ୍କୁ କୋଲଡ୍ରିଫ୍ ଏବଂ ନେଷ୍ଟ୍ରୋ ଡିଏସ୍ ଔଷଧ ଦିଆଯାଇଥିଲା । ଆପଣଙ୍କୁ ଜଣାଇ ଦେଉଛୁ ଯେ ପାରସିଆ ଥାନାରେ ଡାକ୍ତର ପ୍ରବୀଣ ସୋନି ଏବଂ ଔଷଧ ନିର୍ମାଣକାରୀ କମ୍ପାନୀ ଶ୍ରେଶନ ବିରୁଦ୍ଧରେ ଏକ ଏଫଆଇଆର ରୁଜୁ ହୋଇଥିଲା । ପୁଲିସ ଡାକ୍ତରଙ୍କୁ ଗିରଫ କରିଥିଲା । ମୁଖ୍ୟମନ୍ତ୍ରୀ ମୋହନ ଯାଦବ ତାଙ୍କୁ ତୁରନ୍ତ ନିଲମ୍ବିତ କରିଥିଲେ ।

ପୁଲିସ ଅଧିକ୍ଷକ ଅଜୟ ପାଣ୍ଡେ କହିଛନ୍ତି ଯେ ପାରସିଆ ବିଏମଓ ଡାକ୍ତର ଅଙ୍କିତ ସହଲାମଙ୍କ ଅଭିଯୋଗ ଆଧାରରେ ତାମିଲନାଡୁର କମ୍ପାନୀ ଶ୍ରେଶନ ଫାର୍ମାସ୍ୟୁଟିକାଲ୍ସ ବିରୁଦ୍ଧରେ ଏକ ଏଫଆଇଆର ରୁଜୁ କରାଯାଇଛି । ପିଲାମାନଙ୍କ ମୃତ୍ୟୁ ପରେ ମୁଖ୍ୟମନ୍ତ୍ରୀ ମୋହନ ଯାଦବ ସାରା ରାଜ୍ୟରେ କୋଲଡ୍ରିଫ୍ କଫ୍ ସିରପ୍ ଉପରେ ପ୍ରତିବନ୍ଧକ ଲଗାଇଛନ୍ତି । ମାନଦଣ୍ଡ ପୂରଣ କରୁନଥିବା ଅନ୍ୟାନ୍ୟ ଔଷଧ ଜବତ କରିବା ପାଇଁ ମଧ୍ୟ ଚଢ଼ାଉ କରାଯାଉଛି । ପିଲାମାନଙ୍କ ମୃତ୍ୟୁ ସମ୍ପର୍କରେ ମୁଖ୍ୟମନ୍ତ୍ରୀ କହିଛନ୍ତି ଯେ ଦୋଷୀମାନଙ୍କୁ ଛଡ଼ାଯିବ ନାହିଁ । ମୃତ ପିଲାଙ୍କ ପରିବାର ପାଇଁ ଆର୍ଥିକ ସହାୟତା ଏବଂ ଅସୁସ୍ଥ ପିଲାମାନଙ୍କ ଚିକିତ୍ସା ପାଇଁ ମଧ୍ୟ ଘୋଷଣା କରିଛନ୍ତି ।