ଜେଲ ଗଲେ ଅମରେଶ

କନକ ବ୍ୟୁରୋ: ସବୁବେଳେ ଚର୍ଚ୍ଚାରେ ରହୁଥିବା କର୍ପୋରେଟର ଅମରେଶ ଜେନା ପୁଣିଥରେ ବିବାଦକୁ ଆସିଛନ୍ତି । କିନ୍ତୁ ଏଥର କୌଣସି ରାଜନୈତିକ ବିବାଦକୁ ନେଇ ନୁହେଁ, ଏଥର ଦୁଷ୍କର୍ମ ଭଳି ସାଂଘାତିକ ଅଭିଯୋଗକୁ ନେଇ ସେ ଚର୍ଚ୍ଚାକୁ ଆସିଛନ୍ତି ।

Advertisment

କର୍ପୋରେଟର ଅମରେଶ ଜେନା ଗିରଫ
ଦୁଷ୍କର୍ମ ଓ ଗର୍ଭପାତ କରାଇଥିବା ଅଭିଯୋଗ

ତିନି ଦିନର ଛକାପଞ୍ଝା ପରେ ଅମରେଶ ଜେନାକୁ ଗିରଫ କରିଛି ପୁଲିସ୍ । ବାଲେଶ୍ବର ନୀଳଗିରି ଅଞ୍ଚଳରୁ ଗିରଫ କରିବା ପରେ ଆଜି ଭୁବନେଶ୍ବର ଆଣି ଡାକ୍ତରୀ ପରୀକ୍ଷା କରିବା ସହ କୋର୍ଟ ଫରୱାର୍ଡ କରାଯାଇଥିଲା । ଜାମିନ ନାମଞ୍ଜୁର ହେବାରୁ ଜେଲ୍ ଯାଇଛନ୍ତି କର୍ପୋରେଟର ଅମରେଶ ଜେନା । ତେବେ ଜଣେ ୧୯ ବର୍ଷୀୟ ଯୁବତୀଙ୍କ ଅଭିଯୋଗ ଆଧାରରେ ତାଙ୍କ ବିରୋଧରେ ମାମଲା ରୁଜୁ କରି ଦଫା ଲଗାଇଛି କମିସନରେଟ୍ ପୁଲିସ୍ ।

ଅମରେଶଙ୍କ ବିରୋଧରେ ଦଫା

ବିଏନଏସ ଧାରା ୬୪(୨) – ଧର୍ଷଣ
ବିଏନଏସ ଧାରା ୮୯ - ମହିଳାଙ୍କ ଅନୁମତି ବିନା ଗର୍ଭପାତ
ବିଏନଏସ ଧାରା ୨୯୬ - ଅଶ୍ଳୀଳ କାର୍ଯ୍ୟ
୩୫୨ (ଅପରାଧିକ ଧମକ) ସହ ପୋକ୍ସୋ ଆଇନ ଧାରା ୬ରେ ତାଙ୍କ ବିରୋଧରେ ମାମଲା ରୁଜୁ ହୋଇଛି

ମହିଳା ନିର୍ଯାତନାକୁ ନେଇ ସାରା ରାଜ୍ୟ ଉଠୁଥିବାବେଳେ ଗତ ବୁଧବାର ଲକ୍ଷ୍ମୀସାଗର ଥାନାରେ ଜଣେ ଯୁବତୀ ଅମରେଶଙ୍କ ବିରୋଧରେ ଅଭିଯୋଗ କରିଥିଲେ । ନାବାଳିକା ଅବସ୍ଥାରୁ ଅମରେଶ ତାଙ୍କୁ ଯୌନଶୋଷଣ କରିବା ସହ ନିର୍ଯାତନା ଦେଇଥିବା ଥାନାରେ ଲିଖିତ ଭାବେ ଜଣାଇଥିଲେ । ଯୁବତୀ ଜଣଙ୍କ ଅଭିଯୋଗରେ ଦର୍ଶାଇଥିଲେ, ୨୦୨୩ ଜୁନରେ ରଜପର୍ବ ସମୟରେ ସେ ପ୍ରଥମେ ଅମରେଶଙ୍କୁ ଭେଟିଥିଲେ । ଏହାପରେ ସେମାନଙ୍କ ମଧ୍ୟରେ ବନ୍ଧୁତା ବଢ଼ିଥିଲା । ସେପ୍ଟେମ୍ବରରୁ ଅମରେଶ ବାହାନାରେ ତାଙ୍କୁ ଯୌନ ଶୋଷଣ କରିବା ଆରମ୍ଭ କରିଥିଲେ । ଫେବ୍ରୁଆରି ୨୦୨୪ରେ ସେ ଦୁଇମାସର ଗର୍ଭବତୀ ହୋଇଥିବା ବେଳେ ଅମରେଶ ତାଙ୍କୁ ଗର୍ଭପାତ କରାଇଥିଲେ । ପତ୍ନୀଙ୍କୁ ଛାଡ଼ପତ୍ର ଦେଇ ତାଙ୍କୁ ବାହା ହେବେ ବୋଲି ପ୍ରତିଶ୍ରୁତି ଦେଇଥିଲେ । କିନ୍ତୁ ଏପ୍ରିଲରୁ ସେ ତାଙ୍କୁ ଏଡ଼ାଇବା ଆରମ୍ଭ କରିଥିଲେ । ବାହା ପାଇଁ ଚାପ ଦେବାରୁ ଅମରେଶ ତାଙ୍କୁ ଧମକ ଦେଇ ଭୁବନେଶ୍ୱର ଛାଡ଼ି ଚାଲିଯିବାକୁ କହିଥିଲେ ।

ଅଭିଯୋଗ ପରେ ଯୁବତୀଙ୍କ ବୟାନ ବିଏନଏସ ଧାରା ୧୮୩ ଅନୁଯାୟୀ ରେକର୍ଡ ହୋଇଛି । ଅନ୍ୟପଟେ ଅଭିଯୋଗକୁ ଖଣ୍ଡନ କରିବା ସହ ରାଜନୈତିକ ଷଡଯନ୍ତ୍ର ବୋଲି କହିଛନ୍ତି ଅମରେଶଙ୍କ ପତ୍ନୀ । ଅନ୍ୟପଟେ ଗିରଫ ପରେ ଅମରେଶ ଜେନାଙ୍କୁ ଦଳକୁ ନିଲମ୍ବିତ କରିଛି ବିଜେଡି । ଦଳର ଉପସଭାପତି ପ୍ରତାପ ଜେନାଙ୍କ ନିର୍ଦ୍ଦେଶକ୍ରମେ ତାଙ୍କୁ ନିଲମ୍ବନ କରାଯାଇଛି ।