ଗାଁରେ ଜମିଛି ଦୂଷିତ ପାଣି: ନିଷ୍କାସିତ ହୋଇନପାରି ଦୁର୍ଗନ୍ଧରେ ଫାଟି ପଡୁଛି ନାକ

କନକ ବ୍ୟୁରୋ: ଜଳ ନିଷ୍କାସନ ପଥ ଅବରୋଧ ହେବା ଯୋଗୁ ବର୍ଷାପାଣି ନିସ୍କାସିତ ହୋଇ ନପାରି ଗାଁରେ ସୃଷ୍ଟି ହୋଇଛି ଅସ୍ବାସ୍ଥ୍ୟକର ପରିବେଶ। ରାସ୍ତାଘାଟ ନଳକୁପ ସହିତ ଘର ଆଗରେ ଜମିରହିଛି ଦୁର୍ଗନ୍ଧ ଯୁକ୍ତ ପଚା ପାଣି ଓ କାଦୁଅ। ଏପରି ଅସ୍ବାସ୍ଥ୍ୟକର ପରିବେଶ ଯୋଗୁ ଗ୍ରାମବାସୀ ମାନେ ହେଉଛନ୍ତି ବିଭିନ୍ନ ରୋଗର ଶିକାର।

ଗାଁର ଲୋକଙ୍କ ମୁଣ୍ଡ ବିନ୍ଧା ପାଲଟିଛି ଦୂଷିତ ପାଣି । ଜଳ ନିଷ୍କାସନ କରିବାର ବାଟ ବନ୍ଦ ହୋଇଥିବା ବେଳେ ପାଣି ଜମି ରହି ପୁତିଗନ୍ଧମୟ ପରିବଶେ ସୃଷ୍ଟି ହୋଇଛି । କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ରାଜଗଡ ଗ୍ରାମର ୯ ଓ ୧୦ ନମ୍ବର ୱାର୍ଡରେ ଏହି ସମସ୍ୟା ଦେଖିବାକୁ ମିଳିଛି । କିଛି ଲୋକ ଜଳ ନିଷ୍କାସନ ପଥକୁ ଅବରୋଧ କରିବା ସହିତ ମାଟି ପକାଇ ପୋତିଦେଇଥିବା ଅଭିଯୋଗ ହୋଇଛି । ଫଳରେ ଦୂଷିତ ପାଣି ସବୁ ରାସ୍ତାରେ ଲହଡି ଭାଙ୍ଗୁଛି । ଲୋକେ ଦିନ ଦିନ ଧରି ଦୁର୍ଗନ୍ଧ ଯୁକ୍ତ ପରିବେଶରେ ଲୋକେ ରହୁଛନ୍ତି। ସମସ୍ୟା ସମାଧାନ ପାଇଁ ବାରମ୍ବାର ଜିଲ୍ଲା ପ୍ରଶାସନଙ୍କୁ ଜଣାଇଲେ ମଧ୍ୟ ଏହାର କୌଣସି ସମାଧାନ ହୋଇପାରିନି । ଯାହାକୁ ନେଇ ଅସନ୍ତୋଷ ବଢିବାରେ ଲାଗିଛି । 

ରାଜଗଡ ଗ୍ରାମର ୯ ଓ ୧୦ ନମ୍ବର ୱାର୍ଡରେ ପ୍ରାୟ ୧୫୦ ପରିବାର ବସବାସ କରୁଛନ୍ତି। ଜଳ ନିଷ୍କାସନ ପଥ ଅବରୋଧ ଯୋଗୁ ଦୀର୍ଘଦିନ ହେବ ବର୍ଷା ପାଣି ସହିତ ଡ୍ରେନ୍ ପାଣି ଆଉ ଆଗଭଳି ନିସ୍କାସିତ ହୋଇ ପାରୁନି । ସ୍କୁଲ ପିଲାଙ୍କଠୁ ନେଇ ଗାଁର ଲୋକମାନେ ଯିବାଆସିବା ନେଇ ଅନେକ ଅସୁବିଧା ଭୋଗୁଛନ୍ତି । ଦୁଷିତ ପରିବେଶ ଯୋଗୁ ମଶା ମାଛି ବୃଦ୍ଧି ପାଇବା ସହିତ ଜ୍ବର , ଝାଡା ସହିତ ବିଭିନ୍ନ ଚର୍ମ ରୋଗରେ ଆକ୍ରାନ୍ତ ହେଉଥିବା ଅଭିଯୋଗ ହୋଇଛି ।

 ରାଜଗଡ ଗ୍ରାମର ୯ ଓ ୧୦ ନମ୍ବର ୱାର୍ଡରେ ଜଳ ନିଷ୍କାସନ ପଥ ଜବରଦଖଲ ମୁକ୍ତ କରିବା ସହିତ ସୃଷ୍ଟି ହୋଇଥିବା ଅସ୍ବାସ୍ଥ୍ୟକର ପରିବେଶରୁ ଗ୍ରାମବାସୀଙ୍କୁ ମୁକ୍ତି ଦେବାପାଇଁ ଜିଲ୍ଲା ପ୍ରଶାସନ ନିକଟରେ ଦାବି କରିଛନ୍ତି ଗ୍ରାମବାସୀ।