ମୋଦୀ ଓ ଶାହାଙ୍କ ଗଡରେ କଂଗ୍ରେସର ମହାଅଧିବେଶନ । ଆଗାମୀ ୬ଟି ରାଜ୍ୟ ନିର୍ବାଚନ ପାଇଁ ଦଳ ପ୍ରସ୍ତୁତ କରୁଛି ରଣନୀତି

କନକ ବ୍ୟୁରୋ : କଂଗ୍ରସର ଅଢ଼େଇ ହଜାରରୁ ଅଧିକ ନେତା,ମନ୍ତ୍ରୀ,ଶୀର୍ଷ ନେତୃବୃନ୍ଦଙ୍କୁ ନେଇ ଚଳଚଞ୍ଚଳ ଗୁଜରାଟର ଅହମଦାବାଦ ସ୍ଥିତ ସାବରମତୀ ଆଶ୍ରମ । ୬୪ବର୍ଷ ପରେ ପ୍ରଥମଥର ପାଇଁ ଦଳ ଏଠାରେ ମହା ଅଧିବେଶନର ଆୟୋଜନ କରିଛି । ନ୍ୟାୟପଥ ନାଁରେ ଆୟୋଜିତ ବିଶାଳ ସମାବେଶରେ ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ସମେତ ସମସ୍ତ ତୁଙ୍ଗନେତାଙ୍କୁ ଏକାଠି ଦେଖିବାକୁ ମିଳିଛି । କୁହାଯାଉଛି ଦଳର ଏହି ପାୱାର ଶୋ ପଛର ମୁଖ୍ୟ ଏଜେଣ୍ଡା ୬ରାଜ୍ୟର ବିଧାନସଭା ନିର୍ବାଚନ । 

ମୋଦୀ ଓ ଶାହାଙ୍କ ଗଡ଼ରେ କାର୍ଯ୍ୟକ୍ରମ  ଆୟୋଜନ କରି ଦଳ କେନ୍ଦ୍ର ସରକାରଙ୍କୁ ଶାଣିତ ଆକ୍ରମଣ କରିଛି । ଗୁଜରାଟର ସ୍ଥାନୀୟ ସମସ୍ୟାଠୁ ନେଇ ୱାକଫ୍ ବିଲ, ଆମେରିକାର ଟାରିଫ, ଜାତିଭିତିକ ଜନଗଣନା, ,ଦେଶର ଆର୍ଥିକ ସ୍ଥିତି, ସମ୍ବିଧାନକୁ ବିଜେପି ଓ ଆରଏସଏସ ଦୁର୍ବଳ କରୁଥିବା ଅଭିଯୋଗ, ନିର୍ବାଚନରେ ଭୋଟର ତାଲିକାରେ ଗଡବଡ ଅଭିଯୋଗ ସହ ସରକାରଙ୍କୁ ଟାର୍ଗେଟ କରିଛି ।

ଦୀର୍ଘ ୩୦ବର୍ଷ ହେବ ଗୁଜରାଟରେ ବିଜେପି ଶାସନ କ୍ଷମତାରେ ରହିଛି ତେବେ ରାହୁଲ ଓ ଖଡ଼ଗେଙ୍କ ନେତୃତ୍ବରେ ଦଳ ରାଜ୍ୟକୁ ହାତମୁଠାକୁ ଆଣିବାକୁ ରଣନୀତି ପ୍ରସ୍ତୁତ କରିବା ସହ ଦଳୀୟ କନ୍ଦଳ,ମତଭେଦକୁ ଦୂର କରିବ ଏକୁଟିଆ ନୁହେଁ ଏକାଠି ନେଇ ଚାଲିବା ଉପରେ ଫୋକସ କରୁଛି । ଗତମାସରେ ରାହୁଲ ଗୁଜରାଟ ଗସ୍ତ କରି ଦଳର ଭିତିରି ଫାଟକୁ ପଦାକୁ ଆଣିବା ସହ କର୍ମୀଙ୍କ ତାଗିଦ କରିସାରିଛନ୍ତି ଆଉ ଏବେ ମହାଅଧିବେଶନରେ ଶକ୍ତିପ୍ରଦର୍ଶନ କରିଛି ।

ସେପଟେ କଂଗ୍ରେସ କାର୍ଯ୍ୟକ୍ରମର ଏକ ଭିଡିଓକୁ ପୋଷ୍ଟ କରି ବିଜେପି ଆଇଟି ସେଲ ମୁଖ୍ୟ ଅମିତ ମାଲବୀୟ ଏକ ସୋସିଆଲ ମିଡିଆ ପୋଷ୍ଟ କରିଛନ୍ତି ।ଯେଉଁଥିରେ କଡ଼ରେ ଖଡ଼ଗେ ବସିବାକୁ ନେଇ ଦଳକୁ କଟାକ୍ଷ କରିଛି ବିଜେପି । ଦଳର ଅଧ୍ୟକ୍ଷ ତଥା ବରିଷ୍ଠ ନେତାଙ୍କୁ ମୁଖ୍ୟ ଚୌକି ନଦିଆଇ କାହିଁକି ରାହୁଲ ମଝିରେ ବସିଛନ୍ତି ବୋଲି ପ୍ରଶ୍ନ କରାଯାଇଛି ।