କନକ ବ୍ୟୁରୋ: ଶ୍ରୀମନ୍ଦିର ଚାରିଦ୍ଵାର ଦର୍ଶନ ବ୍ୟବସ୍ଥା ନେଇ ଅବଗତ ନୁହନ୍ତି ଅଣ ଓଡ଼ିଆ ଭକ୍ତ । ଅଲଗା ଦ୍ଵାରରେ ପ୍ରବେଶ କରାଇବୁ କହି ଚୂନା ଲଗାଉଛନ୍ତି ଦଣ୍ଡିଆ । ଟଙ୍କା ନେଇ ପଶ୍ଚିମ ଓ ଉତ୍ତର ଦ୍ଵାରରେ ଭକ୍ତଙ୍କୁ ଦର୍ଶନ ପାଇଁ ନେଇଯାଉଛନ୍ତି । ଭାଇରାଲ ହୋଇଥିବା ରୋହନ ଭିର୍ଦି ନାମକ ଜଣେ ୟୁଟ୍ୟୁବର୍‌ଙ୍କ ବ୍ଲଗ୍‌ରେ ଏନେଇ ସ୍ପଷ୍ଟ ହୋଇଛି । ବ୍ଲଗରେ ଜଗନ୍ନାଥ ମନ୍ଦିର ବିଷୟରେ ଲୋକଙ୍କୁ ଅବଗତ କରାଉଛନ୍ତି ବ୍ଲଗର । ଜଣେ ବ୍ୟକ୍ତି ଭେଟ ହୋଇ କିଭଳି ସୁବିଧାରେ ସମସ୍ତ ଦ୍ୱାର ଦେଇ ଦର୍ଶନ କରାଇବେ କହୁଛନ୍ତି । ସେ କହୁଛନ୍ତି ସିଂହଦ୍ୱାର ପବ୍ଲିକଙ୍କ ପାଇଁ, ହେଲେ ଆମ ପାଇଁ ଅନ୍ୟ ଦ୍ଵାର ଖୋଲା ଅଛି । ଯାହା ଟଙ୍କା ଦେଲେ ବି ଚଳିବ । ୟୁଟ୍ୟୁବର ମଧ୍ୟ ଭିଆଇପି ସୁବିଧା ମିଳିବ କହି ଲୋକଙ୍କୁ ଓଲଟା ବୁଝାଉଛନ୍ତି । ଅର୍ଥାତ୍ ଏବେ ବି ଚାରିଦ୍ୱାର ଦର୍ଶନ ସମ୍ପର୍କରେ ସଚେତନ ନୁହନ୍ତି ଓଡ଼ିଶା ବାହାର ଲୋକ । କରୋନା ବେଳ ଠାରୁ ଚାରିଦ୍ୱାର ଦର୍ଶନ ବନ୍ଦ ଥିଲା । ହେଲେ ଏବେ ଚାରିଦ୍ୱାର ଖୋଲାଯାଇ ଦର୍ଶନ କରୁଛନ୍ତି ଶ୍ରଦ୍ଧାଳୁ । ଆଉ ଯାହାର ଫାଇଦା ଉଠାଉଛନ୍ତି କିଛି ଅଣ ସେବାୟତ ।