କାଳ ସାଜୁଛି କମ୍ଫାନୀ ଲୁଣିପାଣି : ଚାଷୀଙ୍କ ଅଭିଯୋଗ ବଢୁଛି କମ୍ଫାନୀ ଜୁଲମ

କନକବ୍ୟୁରୋ : ପ୍ରାକୃତିକ ଦୁର୍ବିପାକ ସାଙ୍ଗକୁ କମ୍ପାନୀର ଦୌରାତ୍ମ୍ୟ ।  ଖରିଫ ଧାନ ଅମଳ ବେଳେ ବାରମ୍ବାର ଅଦିନିଆ ବର୍ଷା ଚାଷୀଙ୍କୁ ନାକେଦମ୍ କରିଛି। ଅଧାରୁ ଅଧିକ ଧାନ ନଷ୍ଟ ହୋଇଯାଇଛି  । ଯାହା ଯେତିକି ବଞ୍ଚିଛି, ତାକୁ ନଷ୍ଟ କରିବାକୁ ଲାଗିଛି ଚିଙ୍ଗୁଡ଼ି କମ୍ପାନୀ   ।  ଏଭଳି ଅଭିଯୋଗ କରିଛନ୍ତି, ପୁରୀ ଜିଲ୍ଲା ନୂଆଗଡ଼ର ଚାଷୀ  ।  ଦଇବ ମାଡ ପରେ ନୂଆଗଡ ଚାଷୀଙ୍କୁ ଆଉ ଏକ ମାଡ ଦେଇଛି ସ୍ଥାନୀୟ ଅଞ୍ଚଳରେ ଗଢିଉଠିଥିବା  ନାଭା ଫାର୍ମା ନାମକ ଘରୋଇ ଚିଙ୍ଗୁଡି କମ୍ପାନୀ  ।

ଚିଙ୍ଗୁଡି ଘେରିର ବିଷାକ୍ତ ରସାୟନିକ ଯୁକ୍ତ ଲୁଣି ପାଣି ସିଧାସଳଖ ଚାଷ ଜମିରେ ମାଡୁଛି  । ଫଳରେ କ୍ଷେତ ଲୁଣି ଚରିଯାଉଛି ।  ମାଟିର ଉର୍ବରତା ନଷ୍ଟ ହେବାରୁ ଧାନ କି ବିରି ,ମୁଗ ଭଳି ରବି ଫସଲ ହେଉନଥିବା ଚାଷୀ ଅଭିଯୋଗ କରିଛନ୍ତି ।  ଏ ସଂପର୍କରେ ସଂପୃକ୍ତ କମ୍ପାନୀକୁ ବାରମ୍ବାର ଜଣାଇଛନ୍ତି। କମ୍ପାନୀ ପକ୍ଷରୁ ସମସ୍ୟାର ସମାଧାନ କରିବା ବଦଳରେ ଧମକ ଚମକ ଦେଉଥିବା ଚାଷୀ କ୍ଷୋଭର ସହ ପ୍ରକାଶ କରିଛନ୍ତି ।  ମନୁଷ୍ୟକୃତ ସମସ୍ୟା ଯୋଗୁଁ ଚାଷ ଉଜୁଡି ଯାଉଛି, ଚାଷୀ କ୍ଷତି ସହୁଛି ।  ତେଣୁ ତୁରନ୍ତ ସଂପୃକ୍ତ କମ୍ପାନୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।