ଗଣେଶ ଭସାଣି ବେଳେ ଗଣ୍ଡଗୋଳ ; ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ, ୬ ଆହତ, ୨ ଗୁରୁତର

କନକ ବ୍ୟୁରୋ: ଭଦ୍ରକରେ ଗଣେଶ ଭସାଣି ବେଳେ ଗଣ୍ଡଗୋଳ । ଭଦ୍ରକ ତିହିଡି ଥାନା ପାଳିଆବିନ୍ଧାରେ ଗତ ରାତିରେ ଗଣେଶ ଭସାଣି ବେଳେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଛି । ଏଥିରେ ୬ ଜଣ ଆହତ ହୋଇଥିବା ବେଳେ ୨ ଗୁରୁତରଙ୍କୁ କଟକ ଏସସିବି ସ୍ଥାନାନ୍ତର କରାଯାଇଛି । ଏକ କ୍ଷୀର ଗାଡ଼ି ଛାଡିବାକୁ ନେଇ ଗୋଷ୍ଠୀ ସଂଘର୍ଷର ସୂତ୍ରପାତ ହୋଇଥିଲା । ଉଭୟ ଗୋଷ୍ଠୀରୁ ୬ ଜଣ ଆହତ ହୋଇଛନ୍ତି । ଘଟଣା ସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଛି । 

ସେପଟେ ଗଞ୍ଜାମ ଜିଲ୍ଲା ପାଟପୁରରେ ମଧ୍ୟ ଗଣେଶ ଭସାଣକୁ ନେଇ ସଂଘର୍ଷ । ପାଟପୁର ଥାନା ରାମଚନ୍ଦ୍ରପୁର ଗାଁରେ ଗଣେଶ ଭସାଣ ବେଳେ ଭୀଷଣ ଗଣ୍ଡଗୋଳ ହୋଇଛି । ୩ ଜଣଙ୍କୁ  ଖଣ୍ଡାରେ ଆକ୍ରମଣ କରାଯାଇଛି । ୨ ଜଣ ଆହତ ହୋଇ ନିକଟସ୍ଥ ଆଡ଼ପଡା ମେଡିକାଲରେ ଚିକିତ୍ସିତ ହେଉଥିବା ବେଳେ ଅନ୍ୟ ଜଣେ ଗୁରୁତରଙ୍କୁ ବ୍ରହ୍ମପୁର ଏମକେସିଜି ମେଡିକାଲରେ ଭର୍ତ୍ତି କରାଯାଇଛି । ଗୁରୁତର ଯୁବକଙ୍କ ମୁଣ୍ଡ ଓ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ସୃଷ୍ଟି ହୋଇଛି । ଆହତ ଯୁବକମାନେ ହେଲେ ଜିତୁ ବରାଡ଼, ପପୁନ ବରାଡ଼ ଓ ବିଜୟ ବେହେରା । ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଅଭିଯୁକ୍ତଙ୍କୁ ଗିରଫ କରିବାକୁ ତନାଘନା ଆରମ୍ଭ କରିଛି ।