ଆସୁଛନ୍ତି ଥଲାଇବା, ଭାଙ୍ଗିଲାଣି ରେକର୍ଡ: ସିନେମା ‘କୁଲି’କୁ ନେଇ ସବୁଠି ଚର୍ଚ୍ଚା

କନକ ବ୍ୟୁରୋ: ରିଲିଜ ପୂର୍ବରୁ କୁଲିର ଦମଦାର ରେକର୍ଡ । ରଜନୀକାନ୍ତଙ୍କ ଆଗାମୀ ଫିଲ୍ମ କୁଲି ଏବେ ସବୁଠି ଚର୍ଚ୍ଚା ସାଉଁଟିଛି । ଟିକେଟର ଦାମ ୪ହଜାର ୫ଶହ ଟଙ୍କାରେ ପହଞ୍ଚିଲାଣି ସେପଟେ ଆଡାଭାନ୍ସ ବୁକିଂ ଭାଙ୍ଗୁଛି ଗୋଟିଏ ପରେ ଗୋଟିଏ ରେକର୍ଡ ।

ବଡ ପରଦାକୁ ଯେବେ ଯେବେ ଫେରନ୍ତି ରଜନୀକାନ୍ତ ସେତେବେଳେ ପୂର୍ବ ରେକର୍ଡ ଭାଙ୍ଗିବା ନିଶ୍ଚିତ । ଏଥରକ ମଧ୍ୟ ସମାନ ଘଟଣା ଦେଖିବାକୁ ମିଳିଲା । ରଜନୀଙ୍କ ଆଗାମୀ ସିନେମା କୁଲି ଅଗଷ୍ଟ ୧୪ରେ ରିଲିଜ ହେବ କିନ୍ତୁ ତା ପୂର୍ବରୁ ଭାଙ୍ଗୁଛି ଗୋଟିଏ ପରେ ଗୋଟିଏ ରେକର୍ଡ । ପ୍ରତି ଗୋଟିଏ ଘଣ୍ଟାରେ ବୁକିଂ ହେଉଛି ୫୦ହଜାର ଟିକେଟ । ଆଡାଭାନ୍ସ ବୁକିଂରେ  ଦେଶରେ ୨୦ କୋଟି ଟଙ୍କା ଆୟ କରିଥିବାବେଳେ ବିଦେଶରେ ୩୦କୋଟି ଟଙ୍କାର ଟିକେଟ ବିକ୍ରି ସରିଲାଣି । ଅନ୍ୟପଟେ ତାମିଲନାଡୁରେ ବଢ଼ିଲାଣି ଟିକେଟ ବଡ କଳାବଜାରୀ । ଆଶ୍ଚର୍ୟ୍ୟର କଥା ହେଉଛି ୬ଶହଟଙ୍କା ଟିକେଟ ୪୫୦୦ରେ ବିକ୍ରି ହେଉଥିବାରୁ ଫାଷ୍ଟ ଡେ ଫାଷ୍ଟ ଶୋ ଦେଖିବାକୁ ଦର୍ଶକ ଅନ୍ୟ ରାଜ୍ୟକୁ ଯିବାକୁ ବିଚାର କରୁଛନ୍ତି । ରଜନୀଙ୍କ ପ୍ରଂଶସକ ଓ ଦର୍ଶକଙ୍କ ମଧ୍ୟରେ ନାହିଁ ନଥିବା ଉତ୍ସାହ ଓ ଉତ୍କଣ୍ଠା ଦେଖିବାକୁ ମିଳୁଛି । ଏମିତିକି ରାତି ରାତି ଅନିଦ୍ରା ହୋଇ ଟିକେଟ ବୁକିଂ ପାଇଁ ଲମ୍ବା ଦର୍ଶକ ଲମ୍ବାଲାଇନରେ ମଧ୍ୟ ଛିଡା ହେଉଛନ୍ତି  । ଲୋକେଶ କନଗରାଜଙ୍କ ନିର୍ଦ୍ଦେଶିତ ତଥା ରଜନୀକାନ୍ତ ଅଭିନୀତ କୁଲି ଅନ୍ୟତମ ବ୍ଲକବଷ୍ଟର ସିନେମା ହେବ ବୋଲି ସମୀକ୍ଷକ ଆକଳନ କରିଛନ୍ତି ।ତେବେ ଏହି ବହୁ ପ୍ରତିକ୍ଷିତ ସିନେମାରେ ୩୩ବର୍ଷ ପରେ ରଜନୀକାନ୍ତ ଓ ନାଗାର୍ଜୁନଙ୍କୁ ଏକାଠି ଦେଖିବାକୁ ପାଇବେ ଦର୍ଶକ । ତାମିଲ, ହିନ୍ଦୀ, ତେଲେଗୁ, କନ୍ନଡ ଭାଷାରେ ରିଲିଜ ହେବ କୁଲି ।