ଭୁଶୁଡିଲା ଚିମିନି ; ଗଲା ଶ୍ରମିକଙ୍କ ଜୀବନ, ୨ ଗୁରୁତର

କନକ ବ୍ୟୁରୋ: ଛତିଶଗଡ଼ର ମୁଙ୍ଗେଲି ଜିଲ୍ଲାରେ ଥିବା ଗୋଟିଏ ଷ୍ଟିଲ ପ୍ଲାଣ୍ଟର ସିଲୋ ଭୁଶୁଡ଼ି ପଡ଼ିଛି । କାମ ସମୟରେ ଏହା ଭୁଶୁଡ଼ି ପଡ଼ିଥିବାରୁ ଜଣେ ଶ୍ରମିକ ପ୍ରାଣ ହରାଇଛନ୍ତି । ୨ ଜଣଙ୍କୁ ଜୀବିତ ଅବସ୍ଥାରେ ଧ୍ୱଂସାବଶେଷ ତଳୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । କିନ୍ତୁ ଏବେ ବି ଅନେକ ଶ୍ରମିକ ଭୁଶୁଡ଼ି ପଡ଼ିଥିବା ସିଲୋ ତଳେ ରହିଥିବା ଆଶଙ୍କା କରାଯାଉଛି । ସାରଗାଓଁ ଅଞ୍ଚଳରେ ଥିବା କୁସୁମ ଷ୍ଟିଲ ପ୍ଲାଣ୍ଟରେ କାମ ଚାଲୁଥିବା ବେଳେ ମଧ୍ୟାହ୍ନ ସମୟରେ ପୂରା ଘଟଣା ଘଟିଛି । ଘଟଣା ବେଳେ ସିଲୋ ନିକଟରେ ୮ରୁ ୧୦ ଜଣ ଶ୍ରମିକ କାମ କରୁଥିଲେ । ସିଲୋ ଭୁଶୁଡ଼ି ପଡ଼ିବାରୁ ଏହା ତଳେ ସମସ୍ତେ ଚାପି ହୋଇ ରହିଯାଇଥିଲେ । ପୁଲିସ୍‌ ଓ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ । ଉଦ୍ଧାର କାର୍ୟ୍ୟରେ ମେସିନ ମଧ୍ୟ ବ୍ୟବହାର କରାଯାଉଛି । ଧ୍ୱଂସାବଶେଷ ତଳକୁ ୨ ଜଣଙ୍କୁ ଉଦ୍ଧାର କରାଯାଇ ବିଳାସପୁରକୁ ଚିକିତ୍ସା ପାଇଁ ପଠାଯାଇଛି ।