କନକ ବ୍ୟୁରୋ: ଛତିଶଗଡ଼-ତେଲେଙ୍ଗାନା ସୀମା କେରେଗୁଟା ପାହାଡ଼ରେ ୨୧ ଦିନର ଅପରେସନ୍ କେଜିଏଚରେ ଛତ୍ରଭଙ୍ଗ ଦେଇଛନ୍ତି ୩ ଶହରୁ ଅଧିକ ମାଓବାଦୀ । ମାଓବାଦୀଙ୍କ ୟୁନିଫାଏଡ୍ କମାଣ୍ଡ ଖିନଭିନ୍ ହୋଇଯାଇଛି । ଛୋଟ ଛୋଟ ଦଳ ଗଠନ କରି ପଡ଼ୋଶୀ ରାଜ୍ୟକୁ ଖସି ପଳାଇବାକୁ ଉଦ୍ୟମ ଆରମ୍ଭ କରିଛନ୍ତି ଟପ୍ ମାଓ ନେତା । 

Advertisment

ଛତିଶଗଡ଼ ଗରିଆବନ୍ଧ ଓ ଓଡ଼ିଶାର ନୂଆପଡ଼ା ଦେଇ ମାଓବାଦୀଙ୍କ ସ୍ୱତନ୍ତ୍ର ଚଳପ୍ରଚଳ ପଥ ରହିଛି । କନ୍ଧମାଳ, ବଲାଙ୍ଗୀର, ବୌଦ୍ଧ, ନୂଆପଡ଼ାକୁ ନେଇ ମାଓବାଦୀଙ୍କ କେକେବିଏନ ଡିଭିଜନ୍ ମଧ୍ୟ ସକ୍ରିୟ ଅଛି । ଛତିଶଗଡ଼ ସୁକମା ଜିଲ୍ଲା ସହ ମାଲକାନଗିରିର ପଡ଼ିଆ-ଭେଜାଙ୍ଗିୱାଡ଼ା ଏବଂ ତୁଳସୀ ପାହାଡ଼, ମାଥିଲି-ଖଇରପୁଟ ଦେଇ ଆନ୍ଧ୍ର-ଓଡ଼ିଶା ସ୍ପେଶାଲ ଜୋନାଲ୍ କମିଟି ସହ ଯୋଗାଯୋଗର ରାସ୍ତା ରହିଛି । ତେଣୁ ଏହି ରାସ୍ତା ଦେଇ ମାଓବାଦୀମାନେ ଓଡ଼ିଶା ମୁହାଁ ହେବାର ଯଥେଷ୍ଟ ସମ୍ଭାବନା ରହିଛି । 

ପୂର୍ବରୁ ବଡ଼ ବଡ଼ ଏନକାଉଣ୍ଟର୍ ପରେ ଲାଲବାହିନୀ ଓଡ଼ିଶା ମୁହାଁ ହେବାର ନଜିର ରହିଛି । ନଭେମ୍ବରରେ ଛତିଶଗଡ଼ରେ ବଡ଼ ଏନକାଉଣ୍ଟର୍ ପରେ ଟପ୍ ମାଓ ନେତା ଉଦୟ ସମେତ ବହୁ ମାଓବାଦୀ ଓଡ଼ିଶା ଭିତରକୁ ପ୍ରବେଶ କରିଥିବା ସ୍ପଷ୍ଟ ହୋଇଛି । ଜାନୁଆରି ୨୧ ତାରିଖରେ ଟପ୍ ମାଓ ନେତା ଚଲାପାତିଙ୍କ ଟିମ୍ ଓଡିଶା ମୁହାଁ ହେଉଥିବା ସମୟରେ ଯବାନଙ୍କ ଗୁଳିରେ ଚଲାପାତି ସମେତ ୧୩ ଜଣ ଟଳି ପଡ଼ିଥିଲେ । ତେଣୁ କେରେଗୁଟା ଏନକାଉଣ୍ଟର୍ ପରେ ଓଡିଶା ସୀମାବର୍ତ୍ତୀ ଅଞ୍ଚଳରେ ହାଇଆଲର୍ଟ ଜାରି କରି କମ୍ବିଂ ଅପରେସନକୁ ଜୋରଦାର କରିଛି ଓଡିଶା ପୁଲିସ ।