ମୁଣ୍ଡ ଖରାପ କରୁଛି ଜେଲ୍ ! ବଢ଼ୁଛି ମାନସିକ ରୋଗୀଙ୍କ ସଂଖ୍ୟା

କନକ ବ୍ୟୁରୋ : ଚାରିକାନ୍ଥ ଭିତରେ ଜୀବନ । ଅପରାଧୀଙ୍କ ପାଇଁ ଅଲଗା ଏକ ଦୁନିଆ । ସଂସ୍କାର ପାଇଁ ଥିବା ଜେଲ୍‌ ଯେବେ ମାନସିକ ବିକାରର କାରଣ ହୁଏ, ତେବେ ମାନବିକ ଅଧିକାରର ଉଲ୍ଲଂଘନ ହେଲାନି କି ? ଏମିତି ଏକ ଅଭାବନୀୟ ଘଟଣା ପାଇଁ ଚର୍ଚ୍ଚାକୁ ଆସିଛି ସମ୍ବଲପୁର ଜେଲ୍‌ । ରୋଗାଗ୍ରସ୍ତ ହେଉଛନ୍ତି ସୁସ୍ଥ ଅପରାଧୀ । ଅବସାଦ ଓ ଏକଲାପଣ ଦେଉଛି ମାନସିକ ଯନ୍ତ୍ରଣା ।

ମୁଣ୍ଡ ଖରାପ କରୁଛି ଜେଲ୍ । ଜେଲ୍‌ରେ ବଢ଼ୁଛି ମାନସିକ ରୋଗୀଙ୍କ ସଂଖ୍ୟା । ମାନସିକ ଅବସାଦରୁ ଚରମ ନିଷ୍ପତ୍ତି ନେଉଛନ୍ତି କଏଦୀ । ଆତ୍ମହତ୍ୟା ଭଳି ଶେଷ ବାଟକୁ ବାଛୁଛନ୍ତି । ରାଜ୍ୟର ଅନ୍ୟତମ ବଡ଼ ଜେଲ୍‌ ସମ୍ବଲପୁର ମଣ୍ଡଳ କାରାଗାରରେ ବଢ଼ୁଛି ମାନସିକ ରୋଗୀଙ୍କ ସଂଖ୍ୟା । ଏବେ ଜେଲ୍‌ରେ ୩୮ ଜଣ ମାନସିକ ରୋଗୀ ଚିହ୍ନଟ ହୋଇ ଚିକିତ୍ସିତ ହେଉଛନ୍ତି । ଏମାନଙ୍କ ମଧ୍ୟରୁ ୨୦ ପ୍ରତିଶତ ବା ପ୍ରାୟ ୮ ଜଣ ବାହାରୁ ମାନସିକ ରୋଗର ଲକ୍ଷଣ ନେଇ ଜେଲ୍ ଆସିଥିଲେ । ବାକି ୮୦ ପ୍ରତିଶତ ବା ୩୦ ଜଣ ଜେଲରେ ମାନସିକ ରୋଗୀ ବନିଥିବା କହିଛନ୍ତି ମାନସିକ ରୋଗ ବିଶେଷଜ୍ଞ ।