କନକ ବ୍ୟୁରୋ: ବଲିଉଡର ଆଗାମୀ ଫିଲ୍ମ 'ପତି ପତ୍ନୀ ଔର ୱୋ ଦୋ'ର ସୁଟିଂ ସେଟ୍‌ରେ ହଙ୍ଗାମା । ଯେତେବେଳେ କିଛି ଅଜ୍ଞାତ ଲୋକ ହଠାତ୍ ଫିଲ୍ମର ନିର୍ଦ୍ଦେଶକ ଏବଂ କ୍ରୁ ସଦସ୍ୟଙ୍କ ସହ ମାରପିଟ୍ ଆରମ୍ଭ କରିଦେଇଥିଲେ । ଏହି ଘଟଣାର ଏକ ଭିଡିଓ ମଧ୍ୟ ସୋସିଆଲ୍ ମିଡିଆରେ ବେଶ୍ ଭାଇରାଲ୍ ହେଉଛି । ଭିଡିଓରେ ସ୍ପଷ୍ଟ ଦେଖିବାକୁ ମିଳୁଛି ଯେ ସୁଟିଂ ସମୟରେ କିଛି ସ୍ଥାନୀୟ ଲୋକ ହଠାତ୍ ସେଟରେ ଆସି ମାରପିଟ୍   ଆରମ୍ଭ କରିଦେଇଥିଲେ ।  ବର୍ତ୍ତମାନ ପ୍ରୟାଗରାଜରେ ଫିଲ୍ମର ସୁଟିଂ ଚାଲିଛି ।

ସେଟ୍ ଉପରକୁ ହଠାତ୍ ଆସିଥିଲେ ଲୋକେ

Advertisment

'ପତି ପତ୍ନୀ ଔର ୱୋ ଦୋ' ର ଟିମ୍ ବର୍ତ୍ତମାନ ପ୍ରୟାଗରାଜରେ ଫିଲ୍ମର ସୁଟିଂ କରୁଛନ୍ତି । ଗତକାଲି ଫିଲ୍ମ ସେଟ୍ ଉପରକୁ ହଠାତ୍ କିଛି ସ୍ଥାନୀୟ ଲୋକ ଆସିଥିଲେ । ବାଦବିବାଦ କରିବା ସହ ନିର୍ଦ୍ଦେଶକଙ୍କ ସମେତ କ୍ରୁ ସଦସ୍ୟଙ୍କ ସହ ମାରପିଟ୍ କରିବାକୁ ଲାଗିଥିଲେ । ଭାଇରାଲ୍ ହେଉଥିବା ଭିଡିଓରେ ମଧ୍ୟ ଏହି ସବୁ ଦେଖିବାକୁ ମିଳିଥିଲା । ତେବେ ଏହି ମାରପିଟ୍ ସମ୍ପର୍କରେ ଫିଲ୍ମ ଟିମ୍ ପକ୍ଷରୁ ଅଫିସିଆଲ ସୂଚନା ଦିଆଯାଇନାହିଁ । 
ନିର୍ଦ୍ଦେଶକଙ୍କୁ ମାଡ଼

Reddit.comରେ ସେୟାର କରାଯାଇଥିବା ଭିଡିଓରେ ଦେଖାଯାଉଛି ଯେ ସୁଟିଂ ସେଟ୍ ଉପରକୁ ୩ ଜଣ ଲୋକ ରାଗରେ ଆସି କିଛି କହିବା ସହ କ୍ରୁ ସଦସ୍ୟଙ୍କ ସହ ମାରପିଟ୍ କରିବାକୁ ଲାଗିଥିଲେ । ଏହି ସମୟରେ ସେଟ୍‌ରେ ଏକ କାର୍ ସିକ୍ୱେନ୍ସ ଫିଲ୍ମ କରାଯାଉଥିଲା । କିଛି ରିପୋର୍ଟରେ ଦାବି କରାଯାଇଛି ଯେ ସ୍ଥାନୀୟ ଲୋକମାନେ ଯେଉଁ ବ୍ୟକ୍ତିଙ୍କୁ ମାଡ଼ ମାରୁଛନ୍ତି, ସେ ଆଉ କେହି ନୁହନ୍ତି ବରଂ ଫିଲ୍ମର ନିର୍ଦ୍ଦେଶକ ।  

ପ୍ରଶଂସକମାନେ କ'ଣ କହିଲେ?

ଏହି ଭିଡିଓ ଉପରେ ଅନେକ ଲୋକଙ୍କ ପ୍ରତିକ୍ରିୟା ସାମ୍ନାକୁ ଆସିଛି । ଏହି ଭିଡିଓ ଉପରେ ଜଣେ ରେଡିଟ୍ ୟୁଜର୍ ଲେଖିଛନ୍ତି ଯେ 'ସୁରକ୍ଷା ବିନା ଏମାନେ  କିପରି ସୁଟିଂ କରୁଥିଲେ,'ଯାହାର ଉତ୍ତରରେ ଅନ୍ୟ ଜଣେ ୟୁଜର୍ କହିଛନ୍ତି ଯେ 'ପୁଲିସ୍ କର୍ମଚାରୀମାନେ ଲୋକେସନରେ ଥିଲେ, ତା'ପରେ ମଧ୍ୟ ଏହି ଘଟଣା ଘଟିବା ଦୁର୍ଭାଗ୍ୟଜନକ ।'