କନକ ବ୍ୟୁରୋ : ଭାରତର ସ୍ବାଧୀନତା ସଂଗ୍ରାମରେ ଖୋର୍ଦ୍ଧା ମାଟିର ଅବଦାନ କାହାକୁ ଲୁଚାଛପା ନାହିଁ । ହେଲେ ଏହି ମାଟିରେ ଏମିତି ଅନେକ କାହାଣୀ ରହିଛି ଯାହା ଆଜି ଅନେକ ଲୋକଙ୍କ ପାଖରେ ପହଞ୍ଚି ପାରିନି । ବୋଲଗଡ଼ ବ୍ଲକର ଚମ୍ପେଇଲୋ ଗାଁ ଏମିତି ହିଁ ଏକ କାହାଣୀ କୁହେ । ଖୋର୍ଦ୍ଧା ମୁଖ୍ୟାଳୟରୁ ପ୍ରାୟ ୨୫ କିମି ଦୂରରେ ରହିଛି ସ୍ୱାଧୀନତା ସଂଗ୍ରାମୀଙ୍କ ଗାଁ ଚମ୍ପେଇଲୋ । ବଣ ପାହାଡ଼ ଘେରା ସବୁଜ ବନାନୀରେ ନିଜକୁ ଢାଙ୍କି ରହିଥିବା ଏହି ଗାଁ ଆଜି ନିଜ ମାଟିର ସନ୍ତାନମାନଙ୍କୁ ଝୁରୁଛି । ଗାଁର ଲୋକେ ଗର୍ବରେ ଛାତି ଚଉଡ଼ା କରି ନିଜ ପୂର୍ବଜଙ୍କ ବୀରତ୍ୱର କାହାଣୀ ବଖାଣନ୍ତି । ଏଥିପାଇଁ ଏହି ଗାଁକୁ ସ୍ୱାଧୀନତା ସଂଗ୍ରାମୀଙ୍କ ଗାଁ ବୋଲି ବି କୁହାଯାଏ । ୧୯୪୩ରେ ନେତାଜୀ ସୁଭାଷ ଚନ୍ଦ୍ର ବୋଷ ଆଜାଦ ହିନ୍ଦ ଫୌଜ ଗଠନ କରି ଏଥିରେ ଭାରତୀୟମାନଙ୍କୁ ସାମିଲ ହେବାକୁ ଆହ୍ୱାନ ଦେଇଥିଲେ । ଏହି ଆହ୍ୱାନରେ ପ୍ରଭାବିତ ହୋଇ ଚମ୍ପେଇଲୋ ଗ୍ରାମର ପ୍ରାୟ ୨୯ ଜଣ ଲୋକେ ନେତାଜୀଙ୍କ ସେନାରେ ସାମିଲ ହୋଇ ଦେଶ ପାଇଁ ଇଂରେଜ ବିରୁଦ୍ଧରେ ଲଢ଼ିଥିଲେ । 

Advertisment

ସ୍ୱାଧୀନତା ସଂଗ୍ରାମରେ ଚମ୍ପେଇଲୋ ଗ୍ରାମର ବ୍ରହ୍ମଚାରି ଉତ୍ତରୀୟ, ଅପର୍ତ୍ତି ମାର୍ଥ, ଶଙ୍କର ସାମନ୍ତରାୟ, କୃଷ୍ଣଚନ୍ଦ୍ର ସାମନ୍ତରାୟ, ଗୋକୁଳ ଦାସ, ଲୋକନାଥ ରଣସିଂ, ଅର୍ଜୁନ ଶ୍ରୀଚନ୍ଦନ ପ୍ରମୁଖ ଆଜାଦ ହିନ୍ଦ ଫୌଜରେ ସାମିଲ ହୋଇଥିଲେ । ସ୍ୱାଧୀନତା ସଂଗ୍ରାମରେ ସାମିଲ ଥିବାରୁ ସେମାନଙ୍କ ଗାଁ ଜମିବାଡ଼ି ବି ଛଡ଼ାଇ ନେଇଥିଲେ ଗୋରା ସରକାର । ସ୍ଥାନୀୟ ପିଚୁକୁଳି ବଙ୍ଗଳାଠାରେ ତ୍ରିରଙ୍ଗା ଉଡ଼ାଇ ପ୍ରଥମେ ଏମାନେ କାରାବରଣ କରିଥିଲେ । ଗାଁର ପ୍ରତିଟି ଲୋକ ମଧ୍ୟରେ ଜଳୁଥିଲା ସ୍ୱାଧୀନତାର ବହ୍ନି । ଏଣୁ ଗାଁ ଲୋକେ ଗାନ୍ଧିଜୀଙ୍କ କୁଟି ଖାଅ କାଟି ପିନ୍ଧ ଆହ୍ୱାନରେ ଅନୁପ୍ରାଣିତ ହୋଇ ଗୋପବନ୍ଧୁ ଦରିଦ୍ର ନାରାୟଣ ସେବାଶ୍ରମରେ ସୂତା କାଟିବା ଆରମ୍ଭ କରିଥିଲେ । ଏଠାକୁ ଗାନ୍ଧୀଜି ମଧ୍ୟ ୩ ଦିନିଆ ଗସ୍ତରେ ଆସିଥିଲେ । ଖାଲି ଗାନ୍ଧିଜୀ ନୁହନ୍ତି ବିନୋବା ଭାବେ, କୁନ୍ତଳା କୁମାରୀ ସାବତ, ଗୋପବନ୍ଧୁ ଦାସ, ଆଚାର୍ଯ୍ୟ ହରିହର, କୃପାସିନ୍ଧୁ ହୋତାଙ୍କ ଭଳି ମହାନ ସଂଗ୍ରାମୀ ବି ଏଠାକୁ ଆସିଥିଲେ । ବିଭିନ୍ନ ଜାତୀୟ ଦିବସରେ ଆଜି ବି ସ୍ୱାଧୀନତା ସଂଗ୍ରାମୀଙ୍କ ସ୍ମୃତିଚାରଣ କରନ୍ତି ଚମ୍ପେଇଲୋ ଗ୍ରାମବାସୀ । ଏବେ ଆଉ ହାତ ଗଣତି କେତେଜଣ ସ୍ୱାଧୀନତା ସଂଗ୍ରାମୀଙ୍କ ପତ୍ନୀ ବଞ୍ଚି ରହିଛନ୍ତି । ସେମାନେ ବି ସ୍ୱାମୀଙ୍କ କହିଥିବା କଥାକୁ ବଖାଣୁଛନ୍ତି ଓ ଆଜି ବି ଏହି ଗାଁ ସ୍ୱାଧୀନତା ସଂଗ୍ରାମୀଙ୍କ ଗାଁ ବୋଲାଉଛି ।