କନକ ବ୍ୟୁରୋ: ରାଉରକେଲା ଇସ୍ପାତ କାରଖାନା ଦ୍ବାରା ସ୍ଥାପିତ ତଥା ଅଗ୍ରଣୀ ଅନୁଷ୍ଠାନ ଦୀପିକା ମହିଳା ସଂଘତି ଦ୍ଵାରା ପରିଚାଳିତ ନିଃଶୁଳ୍କ ବିଦ୍ୟାଳୟ ଦୀପିକା ଇସ୍ପାତ ଶିକ୍ଷା ସଦନରେ ଏକ ସାର୍ଟିଫିକେଟ ବିତରଣ ଉତ୍ସବ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଦୀପିକା ମହିଳା ସଂଘତିର ଅଧ୍ୟକ୍ଷା ନମ୍ରତା ବର୍ମା ମୁଖ୍ୟ ଅତିଥି ରୂପେ ଯୋଗଦେଇ ବିଦ୍ୟାଳୟର ଛାତ୍ରଛାତ୍ରୀଙ୍କୁ ସାର୍ଟିଫିକେଟ ପ୍ରଦାନ କରିଥିଲେ । ଏହି ଅବସରରେ ଦୀପିକା ମହିଳା ସଂଘତିର ଉପାଧ୍ୟକ୍ଷା ପ୍ରଭାତୀ ମିଶ୍ର, ପ୍ରତିଜ୍ଞା ପଲାଇ, ବନ୍ଦନା ସିଂହ, ରୀତା ରାଣୀ ଏବଂ ନବନୀତା ପାଲଚୌଧୁରୀ ଉପସ୍ଥିତ ଥିଲେ । ଉକ୍ତ ଉତ୍ସବରେ ସହର ସେବା ଓ ସିଏସଆର ବିଭାଗର ସିଜିଏମ ଟି ଜି କାନେକର, ସିଏସଆର ବିଭାଗର ଜିଏମ ଇନ ଚାର୍ଜ ସୁଶ୍ରୀ ମୁନମୁନ ମିତ୍ରା, ସିଏସଆର ବିଭାଗର ଏଜିଏମ ଟି ବି ଟସ୍କୋ, ସଂଘତିର ସମ୍ପାଦିକା ସାରିକା ମୁକାର, ଡିଏମଏସ ପରିଚାଳନା ପରିଷଦର ସଦସ୍ୟାବୃନ୍ଦ, ପ୍ରଧାନ ଶିକ୍ଷକ ଏସ କେ ସାମଲ, ବିଦ୍ୟାଳୟ ପ୍ରଶାସକ ଏସ କେ ମିଶ୍ର, ସହକାରୀ ପ୍ରଧାନ ଶିକ୍ଷୟିତ୍ରୀ ନିହାରିକା ବଳ ଏବଂ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ଓ ଷ୍ଟାଫ ଉପସ୍ଥିତ ଥିଲେ ।

Advertisment

ସାର୍ଟିଫିକେଟଗୁଡିକ ମଧ୍ୟରେ ସ୍କୁଲ୍ ଲିଭିଙ୍ଗ ସାର୍ଟିଫିକେଟ, କଣ୍ଡକ୍ଟ ସାର୍ଟିଫିକେଟ, ମାଇଗ୍ରେସନ ସାର୍ଟିଫିକେଟ, ମୂଳ ବୋର୍ଡ ସାର୍ଟିଫିକେଟ ଏବଂ ସ୍କାଉଟ ଓ ଗାଇଡଙ୍କ ପାଇଁ ୨୦୨୩-୨୪ ନିମନ୍ତେ ରାଜ୍ୟପାଳ ପୁରସ୍କାର ସାର୍ଟିଫିକେଟ ଅନ୍ତର୍ଭୁକ୍ତ ଥିଲା ।

ଉଲ୍ଲେଖଯୋଗ୍ୟ ଯେ, ସ୍କୁଲ୍ କ୍ରମାଗତ ଦଶମ ବର୍ଷ ପାଇଁ ୧୦୦% ପାସ୍‌ ହାର ହାସଲ କରିବାର ଏକ ଉଲ୍ଲେଖନୀୟ ଶୈକ୍ଷିକ ମାଇଲଖୁଣ୍ଟ ହାସଲ କରିଛି । ଚଳିତ ବର୍ଷ ମାଧ୍ୟମିକ ଶିକ୍ଷା ବୋର୍ଡ, ଓଡ଼ିଶା ଦ୍ଵାରା ପରିଚାଳିତ ଦଶମ ଶ୍ରେଣୀ ବୋର୍ଡ ପରୀକ୍ଷାରେ ୮୬ ଜଣ ଛାତ୍ରଛାତ୍ରୀଙ୍କ ମଧ୍ୟରୁ ୨୬ ଜଣ ପ୍ରଥମ ଶ୍ରେଣୀ, ୩୧ ଜଣ ହିତୀୟ ଶ୍ରେଣୀ ଏବଂ ୨୯ ଜଣ ତୃତୀୟ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି । ଶୁଭଲକ୍ଷ୍ମୀ ସାହୁ ୫୨୧ ନମ୍ବର ସହିତ ସ୍କୁଲରେ ପ୍ରଥମ ସ୍ଥାନ ଅଧିକାର କରିଛନ୍ତି, ତାଙ୍କ ପରେ ସୁପ୍ରଭା ତାଣ୍ଡି ୫୦୧ ନମ୍ବର ସହିତ ଦ୍ଵିତୀୟ ଏବଂ ଶ୍ରୁତିସ୍ମିତା ପଟ୍ଟନାୟକ ୪୯୭ ନମ୍ବର ସହିତ ତୃତୀୟ ସ୍ଥାନ ଅଧିକାର କରିଛନ୍ତି । ଗ୍ରେଡିଂ ଦୃଷ୍ଟିରୁ, ୫ ଜଣ ଛାତ୍ର ଏ-୨ ଗ୍ରେଡ୍, ୭ ଜଣ ବି-୧ଗ୍ରେଡ୍ ଏବଂ ୧୪ ଜଣ ବି-୨ ଗ୍ରେଡ୍ ପାଇଛନ୍ତି ।

୨୦୦୭ ମସିହାରେ ସ୍ଥାପିତ ଦୀପିକା ଇସ୍ପାତ ଶିକ୍ଷା ସଦନ ଇସ୍ପାତ ସହରର ଅଗ୍ରଣୀ ସମାଜସେବୀ ସଂଗଠନ ଦୀପିକା ମହିଳା ସଂଘତି ଦ୍ଵାରା ପରିଚାଳିତ ହେଉଛି । ୨୦୧୬ରେ ଏହାର ପ୍ରଥମ ବ୍ୟାଚ୍ ବୋର୍ଡ ପରୀକ୍ଷା ଦେବା ପରଠାରୁ, ସ୍କୁଲଟି ସ୍ଥିର ଭାବରେ ୧୦୦% ପାସ୍‌ ହାର ବଜାୟ ରଖୁଛି । ଏହି ଅନୁଷ୍ଠାନ ରାଉରକେଲାର ଯେକୌଣସି ମାନକ ସ୍କୁଲ ସହିତ ସମକକ୍ଷ ଗୁଣାତ୍ମକ ଶିକ୍ଷା ପ୍ରଦାନ କରେ ଏବଂ ମାଗଣା ଶିକ୍ଷା, ୟୁନିଫର୍ମ, ଶୀତକାଳୀନ ପୋଷାକ, ଜୋତା, ବ୍ୟାଗ୍, ବିଶୁଦ୍ଧ ପାନୀୟ ଜଳ, ଉପଯୁକ୍ତ ପରିମଳ ଏବଂ ଅକ୍ଷୟ ପାତ୍ର ଫାଉଣ୍ଡେସନ ଦ୍ବାରା ପ୍ରସ୍ତୁତ ପୁଷ୍ଟିକର ମଧ୍ୟାହ୍ନ ଭୋଜନ ପ୍ରଦାନ କରେ । ଶିକ୍ଷାନୁଷ୍ଠାନରେ ଶୈକ୍ଷିକ ପରିବେଶ ଏବଂ ଶିକ୍ଷାର ଗୁଣବତ୍ତା ବୃଦ୍ଧି କରିବା ପାଇଁ କ୍ରମାଗତ ରୂପେ ନୂତନ ସୁବିଧା ଯୋଡା ଯାଉଛି ।