ବିହାର ଓ ଉତ୍ତରପ୍ରଦେଶ ଭଳି ଓଡ଼ିଶାରେ ପଶିଲା ଜାତି ରାଜନୀତି, ଓବିସି ବର୍ଗରେ ସାମିଲ ହେବାକୁ କମିସନଙ୍କ ନିକଟରେ ଦାବି ଜଣାଇଲେ ୫୦ ରୁ ଅଧିକ ଜାତିର ପ୍ରତିନିଧୀ

କନକ ବ୍ୟୁରୋ :   ବିହାର, ୟୁପି ଭଳି ରାଜ୍ୟରେ ଜାତିକୁ ନେଇ ରାଜନୀତି ହୁଏ । ଯେଉଁ ଜାତିର ଅଧିକ ଭୋଟର ସେହି ଜାତିର ନେତା ପତିଆରା ଦେଖାନ୍ତି । ଶାସନ ଗାଦିରେ ବସନ୍ତି । ଓଡ଼ିଶାରେ କିନ୍ତୁ ଏ ଧରଣର ରାଜନୀତି ନଥିଲା । ଏବେ କଡ଼ ଲେଉଟାଇଛି ଓଡ଼ିଶା ଓ ଜାତିକୁ ନେଇ ଜୋର ଧରିଲାଣି ରାଜନୀତି । 

ବିଭିନ୍ନ କ୍ଷେତ୍ରରେ ଜାତି ଭିତ୍ତିରେ ସଂରକ୍ଷଣ ଦିଆଯିବାକୁ ନେଇ ସାରାଦେଶରେ ବିତର୍କ ଲାଗି ରହିଛି । ଏବେ ଏହା ଓଡ଼ିଶାକୁ ଛୁଇଁଛି । ପଛୁଆ ବର୍ଗ କମିସନ ଓଡ଼ିଶାରେ ଜନଶୁଣାଣି କରୁଥିବାବେଳେ, ରାଜ୍ୟର ପ୍ରାୟ ୫୦ରୁ ଅଧିକ ଜାତିର ୫୦୦ରୁ ଅଧିକ ପ୍ରତିନିଧି ସେମାନଙ୍କୁ ଏସଇବିସିରୁ ଓବିସି କରିବାକୁ ଦାବି କରିଛନ୍ତି। ବହୁ ଜାତିର ବନାନଜନିତ ତ୍ରୁଟି ଯୋଗୁଁ ସେମାନଙ୍କୁ କେନ୍ଦ୍ରୀୟ ଓବିସି ବର୍ଗରେ ସାମିଲ କରାଯାଇନି ବୋଲି ଜଣାଇଛନ୍ତି କମିସନଙ୍କୁ । ଏହାସହ ଜାତିଭିତ୍ତିକ ଜନଗଣନା, ସରକାରୀ ଓ ବେସରକାରୀ ଉଦ୍ୟୋଗରେ ନିଯୁକ୍ତି କ୍ଷେତ୍ରରେ ସମାନତା, ଓବିସି/ ଏସଇବିସିଙ୍କ ପାଇଁ ସଂରକ୍ଷଣ ସିଲିଂ ୫୦% ହଟାଇବା, ସ୍ବତନ୍ତ୍ର କଲ୍ୟାଣ ପାଣ୍ଠି ଗଠନ ପାଇଁ ଦାବି ଜଣାଇଛନ୍ତି। କମିସନ କହିଛନ୍ତି, ଏ ସଂପର୍କରେ ସେ ସରକାରଙ୍କୁ ସୁପାରିସ କରିବେ ।  

ଏପଟେ ଓବିସି କାର୍ଡର ଶ୍ରେୟ ନେବାକୁ ରାଜନୈତିକ ଦଳ ମଧ୍ୟରେ ଜୋର ଧରିଛି ବୟାନବାଜି । ପୂର୍ବ ସରକାରଙ୍କ ତ୍ରୁଟି ଯୋଗୁଁ ଓଡ଼ିଶାର ବହୁ ଜାତି କେନ୍ଦ୍ରୀୟ ପଛୁଆ ବର୍ଗରେ ସାମିଲ ହୋଇ ପାରି ନାହାନ୍ତି ବୋଲି ଅଭିଯୋଗ କରିଛନ୍ତି ବିଜେପି ନେତା । ଅଭିଯୋଗକୁ ଖଣ୍ଡନ କରିବା ସହ ପାଲଟା ଗୁଗଲି ପକାଇଛି ବିଜେଡି । କଂଗ୍ରେସ କହିଛି ରାହୁଲ ଗାନ୍ଧୀଙ୍କ ଡରରେ ତତ୍ପର ହୋଇଛନ୍ତି ସରକାର । 

 ଓଡ଼ିଶାରେ ୨୧୬ ଜାତି ଏସଇବିସି ବର୍ଗରେ ଥିବାବେଳେ ୨୦୦ ଜାତି ଓବିସି ବର୍ଗରେ ରହିଛନ୍ତି। ଯେଉଁମାନଙ୍କ ସଂଖ୍ୟା ମୋଟ୍ ଭୋଟର ୪୦ ପ୍ରତିଶତରୁ ଅଧିକ ବୋଲି କୁହାଯାଉଛି। ଯାହା ଉପରେ ରହିଛି ସବୁ ରାଜନୈତିକ ଦଳର ନଜର ।