ବେଆଇନ ମଦ ଭାଟିରେ ବୁଲିବ ବୁଲଡୋଜର

କନକ ବ୍ୟୁରୋ: ଗଞ୍ଜାମ ଚିକିଟିରେ ବିଷାକ୍ତ ମଦମୃତ୍ୟୁ ନେଇ ଆକ୍ସନରେ ସରକାର । ଘଟଣାରେ ଆରଡିସି ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ସରକାର । ଆଗକୁ ଚୋରାମଦ ସଂପୂର୍ଣ୍ଣ ବନ୍ଦ କରିବାକୁ ବେଆଇନ ମଦ ଭାଟିରେ ବୁଲଡୋଜର ବୁଲିବ ବୋଲି କହିଛନ୍ତି ଅବକାରୀ ମନ୍ତ୍ରୀ । ପୂର୍ବ ଘଟଣା ଭଳି ସମାନ ଢଙ୍ଗରେ ଚିକିଟି ମଦମୃତ୍ୟୁ ପାଇଁ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଇସ୍ତଫା ଦାବି ଉଠିଛି।

ବିଷାକ୍ତ ମଦ ବଳୟରେ ଚିକିଟି ଜେନାପୁର ଗାଁ
ପ୍ରଶାସନ ଶୁଣିନଥିଲା ଲୋକଙ୍କ ଅଭିଯୋଗ

ବିଷାକ୍ତ ମଦ ବଳୟରେ ଜଳୁଛି ଚିକିଟିର ଜେନାପୁର ଗାଁ । ବିଷାକ୍ତ ମଦ ପିଇ ଗାଁର ଦୁଇଟି ପରିବାର ଛାରଖାର ହେଇଯାଇଛି । ଜୁର ବେହେରା ଓ ଲୋକନାଥ ବେହେରାଙ୍କ ମୃତ୍ୟୁ ପରେ ଗାଁରେ ଏବେ କୋକୁଆଭୟ । କାହା ଘରେ ଚୁଲି ଜଳୁନି ତ, କିଏ ନିଜ ଲୋକଙ୍କ ଫେରିବା ବାଟକୁ ଅନାଇ ରହିଛି । ମଦମୃତ୍ୟୁର ଶିକାର ଲୋକନାଥ ବେହେରାଙ୍କ ବୟସ ମାତ୍ର ୩୪ ବର୍ଷ ହୋଇଥିଲା । ଏବେ ତାଙ୍କ ମଦମୃତ୍ୟୁ ପରେ ପରିବାରରେ କୋକୁଆଭୟ ସୃଷ୍ଟି ହୋଇଛି ।

ଚୁପ ବସିଥିଲା କି ଅବକାରୀ ବିଭାଗ?

ମାଉନ୍ଦପୁରରେ ୩୦ ବର୍ଷରୁ ଅଧିକ ସମୟ ଧରି ଚାଲିଥିଲା ମଦ କାରବାର
ମଦ ବନ୍ଦ ପାଇଁ ଗାଁ ଲୋକେ ଅବକାରୀ ବିଭାଗ,ପୁଲିସ ଓ ପ୍ରଶାସନକୁ ଜଣାଇଥିଲେ
ପ୍ରଶାସନ କାର୍ଯ୍ୟାନୁଷ୍ଠାନ ନେଇ ନଥିବା ଅଭିଯୋଗ

ସ୍ଥାନୀୟ ଲୋକଙ୍କ ଅଭିଯୋଗ ହେଲା କିଛି ଆଦିବାସୀ ଲୋକ ଗାଁ ନିକଟରେ ଥିବା ଏକ ଜଙ୍ଗଲରେ ବିଷାକ୍ତ ମଦ ପ୍ରସ୍ତୁତ କରି ମଦ ମାଫିଆଙ୍କୁ ଯୋଗାଉଛନ୍ତି ।

ବେଆଇନ ମଦ କାରବାର ପଛରେ କିଏ ?
କାହିଁକି କଡା ଯାଞ୍ଚ କରୁନି ଅବକାରୀ ବିଭାଗ?

ଗଞ୍ଜାମ ଜିଲ୍ଲା ସୀମା ପଡୋଶୀ ଆନ୍ଧ୍ରକୁ ଲାଗିଛି । ଚିକିଟ ଅଞ୍ଚଳରେ ଅଧିକ ତେଲୁଗୁ ଭାଷାଭାଷୀ ରହୁଥିଲାବେଳେ, ଅନ୍ତଃ-ରାଜ୍ୟ ବିଷାକ୍ତ ମଦ କାରବାର ଅଧିକ ହେଉଛି । ପୂର୍ବରୁ ଜିଲ୍ଲାର ପୁରୁଷୋତ୍ତମପୁର, ରମ୍ଭା ଓ ଗୋଳାବନ୍ଧରେ ବିଷାକ୍ତ ମଦ ଅନେକ ଜୀବନ ନେଇଛି । ତା ପରେ ବି ପ୍ରଶାସନର ଚେତା ପଶିନି । ଏବେ ଚିକିଟି ମଦମୃତ୍ୟୁ ପରେ ବିଜେପି-ବିଜେଡି ଦୋଷ ଲଦାଲଦି ହୋଇଛନ୍ତି ।

କୁହାଯାଉଛି, ଗଞ୍ଜାମ ବେଆଇନ ମଦ କାରବାରରେ ବଡ ବଡ ମାଫିଆଙ୍କ ସଂପୃକ୍ତି ରହୁଛି ଓ ବଡବଡିଆଙ୍କ ଛତ୍ରଛାୟା ତଳେ କାରବାର ଚାଲୁଛି । ପ୍ରଶ୍ନ ଉଠୁଛି, ଗଞ୍ଜାମରେ ବନ୍ଦ ହେବ କି ବେଆଇନ ମଦ କାରବାର?