ଦଲାଲ ବିକୁଛନ୍ତି ମେଡିକାଲ ସିଟ୍, ରିମାଣ୍ଡରେ ଆଣି ତଥ୍ୟ ବାହାର କରିବ ସ୍ପେଶାଲ କ୍ରାଇମ୍ ୟୁନିଟ୍

କନକ ବ୍ୟୁରୋ:  ନିଟ୍‌ରେ କୃତକାର୍ଯ୍ୟ ହେବାକୁ ଛାତ୍ରଛାତ୍ରୀଙ୍କ ଭିତରେ ପ୍ରତିଯୋଗିତା ଚାଲିଛି । ମାସ ମାସ ଧରି ପରିଶ୍ରମ କରୁଛନ୍ତି ପିଲା । ମେଡିକାଲ ପାଠ ପ୍ରତି ବଢ଼ୁଥିବା ଚାହିଦାର ସୁଯୋଗ ନେଇ ଦଲାଲ ମାନେ ସକ୍ରିୟ ହେଉଛନ୍ତି । ପ୍ରଲୋଭନ ଦେଖାଇ ଅଭିଭାବକଙ୍କୁ ଲକ୍ଷ ଲକ୍ଷ ଟଙ୍କା ଲୁଟୁଛନ୍ତି । ଦଲାଲ ଧରାପଡିବା ପରେ ସାମନାକୁ ଆସିଛି ପୂରା କାହାଣୀ । 

ମେଡିକାଲ ସିଟ୍‌ କରାଇ ଦେବାକୁ କୋଟି କୋଟି ଟଙ୍କା ଲୁଟିଥିବା ୪ ଦଲାଲ ଧରାପଡିବା ଭିତରେ, ଆଜି ସାରା ଦେଶରେ ଶେଷ ହୋଇଛି ନିଟ ପରୀକ୍ଷା। ତେବେ ପରୀକ୍ଷାର ଗୋଟେ ଦିନ ପୂର୍ବରୁ ଗତକାଲି ରାଜଧାନୀରୁ ନିଟ ସିଟ ବିକ୍ରି ଦଲାଲ ଧରାପଡିବ ପରେ ପରୀକ୍ଷାର ସ୍ୱଚ୍ଛତା ନେଇ ଚିନ୍ତା ପ୍ରକଟ କରିଛନ୍ତି ଅଭିଭାବକ ଓ ଛାତ୍ର ଛାତ୍ରୀ । 
 
ନିଟ୍‌ ପରୀକ୍ଷା ଦିନକ ପୂର୍ବରୁ ୪ ଦଲାଲ ଗିରଫ ହେବ ପରେ ପରୀକ୍ଷାକୁ ସ୍ଵଚ୍ଛ ଓ ଅବାଧ କରିବ ପାଇଁ କମିଶନରେଟ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା । ଆଇଆଇସିଙ୍କୁ ଦିଆଯାଇଥିଲା ନିଜ ଅଞ୍ଚଳରେ ଥିବା ସେଣ୍ଟର ଦାୟିତ୍ବ । ଏସିପିମାନଙ୍କୁ ସମସ୍ତ ସେଣ୍ଟର ଯାଞ୍ଚ କରିବାକୁ ନିର୍ଦ୍ଦେଶ ରହିଥିଲା । ଯେଉଁ ସେଣ୍ଟରରେ ଅଧିକ ପରୀକ୍ଷାର୍ଥୀ ସେହି ସେଣ୍ଟରରେ ଅଧିକ ପୁଲିସ ଅଧିକାରୀଙ୍କୁ ମୁତୟନ କରାଯାଇଥିଲା । ଅନ୍ୟପଟେ ଅନ୍ୟ ରାଜ୍ୟ ମାନଙ୍କରୁ ମଧ୍ୟ କିଛି ଦଲାଲଙ୍କୁ ଗିରଫ କରିଛି ପୋଲିସ । 
 
ନିଟ୍‌ ପରିକ୍ଷା ସ୍ୱଚ୍ଛ ଏବଂ ଅବାଧ ହୋଇଥିବା ନେଇ ଆଶାବାଦୀ ଅଛନ୍ତି ପରିକ୍ଷାର୍ଥୀ । କିନ୍ତୁ ସିଟ୍‌ କରାଇଦେବାକୁ କହି ଭୁବନେଶ୍ବରରେ ଦଲାଲ ଗିରଫ ହେବା ପରେ ଏହାର ଚେର ଯେ ଅନ୍ୟ ରାଜ୍ୟକୁ ଲମ୍ବିଛି ତାହା ସ୍ପଷ୍ଟ ହୋଇଛି ।