ଆବାସ ଯୋଜନା ସାତ ସପନ; ପାଲ ତଳେ ବିତୁଛି ଜୀବନ

କନକ ବ୍ୟୁରୋ : ବସ୍ତି ବାସିନ୍ଦାଙ୍କୁ ମିଳିପାରୁନି ଘର । ଭଙ୍ଗା କୁଡ଼ିଆରେ ରହୁଛନ୍ତି । ଆବାସ ଯୋଜନାରେ ଆବେଦନ କରି କରି ଥକିଲେଣି । କେବେ ସୁଧୁରିବ ଭାଗ୍ୟ ତାକୁ ଚାହିଁ ବସିଛନ୍ତି ।

କଟକ ମହାନଗର ନିଗମ ୫୫ ନମ୍ବର ୱାର୍ଡ ଅନ୍ତର୍ଗତ ବଣ ବିଦ୍ୟାଧରପୁର ବସ୍ତି । ଜଣେ କି ଦୁଇ ଜଣ ନୁହଁନ୍ତି, ପ୍ରାୟ ୧୩୦ରୁ ଅଧିକ ପରିବାର ଏମିତି ଭଙ୍ଗା କୁଡ଼ିଆରେ ରହୁଛନ୍ତି । ସେମାନଙ୍କ ପାଖରେ ଏଯାଏଁ ପହଞ୍ଚି ପାରିନି ଆବାସ ଯୋଜନା । ବାରମ୍ବାର ଆବେଦନ କରି ମଧ୍ୟ କୌଣସି ସୁଫଳ ମିଳୁନଥିବା ବସ୍ତିବାସିନ୍ଦା କହିଛନ୍ତି ।

ବସ୍ତିରେ ସମସ୍ତଙ୍କ ଘରକୁ ପାଣି ପାଇପ୍ ସଂଯୋଗ ହୋଇଛି । ମାତ୍ର ନିୟମିତ ଭାବେ ଆସୁନି ପାଣି । ଏପରିକି ସିଏମ୍‌ସିର ଅଳିଆ ଉଠା ଗାଡ଼ି ବି ବସ୍ତିକୁ ଆସୁନଥିବା ଅଭିଯୋଗ ହୋଇଛି । ସମସ୍ୟାର ସମାଧାନ ପାଇଁ ସରକାରଙ୍କୁ ଅବଗତ କରାଯିବ ବୋଲି ପୂର୍ବତନ ବିଧାୟକ ପ୍ରଭାତ ବିଶ୍ୱାଳ କହିଛନ୍ତି । ବସ୍ତି ବାସିନ୍ଦାଙ୍କୁ କେବେ ମିଳିବ ଘର । କେବେ ଦୂର ହେବ ଦୁଃଖ ତାହା ଦେଖିବାର କଥା ।