ପୁଣି ଫେରୁଛି ଶକ୍ତିମାନ୍ । ୧୯ ବର୍ଷ ପରେ ଶକ୍ତିମାନ୍ ଦେଖିବେ ଦର୍ଶକ । ସାମ୍ନାକୁ ଆସିଲା ଶକ୍ତିମାନର ଟିଜର୍

୯୦ ଦଶକ , ରବିବାର ଆଉ ଦୂରଦର୍ଶନ .. ନାଁ ଶୁଣିଲେ ପିଲାବେଳ ଯେମିତି ଲୁଚକାଳି ଖେଳିଲା ପରି ଲାଗୁଛି । ଛୁଟିବାରରେ ଭାଇଭଉଣୀଙ୍କ ସହ ମିଶି ଏକ ସଙ୍ଗରେ ଟିଭି ଦେଖିବାର ମଜା କେତେ ନିଆରା ଥିଲା କହିଲେ । ମା’ ପାଟି କରୁଥିବେ ଆରେ ଗାଧେଇବ ଯାଉନ , ଖାଇବ ନେଉନ ଆଉ ମା’ଙ୍କ ଆକଟ ସହ ସ୍ୱର ମିଳାଇ ଟିଭିରେ ବାଜୁଥିବ ଶକ୍ତିମାନ୍ , ଶକ୍ତିମାନ୍ , ଶକ୍ତିମାନ୍ .. 

୯୦ ଦଶକରେ ଭାରତୀୟ ମନୋରଞ୍ଜନ ଜଗତର ସବୁଠାରୁ ଲୋକପ୍ରିୟ ସୁପରହିରୋ କହିଲେ ଶକ୍ତିମାନ୍ ନାଁ ସର୍ବପ୍ରଥମେ ଆସେ । ମୁକେଶ ଖାନ୍ନାଙ୍କ ଅଭିନିତ ଏହି ଶୋ’କୁ ଆବାଳ ବୃଦ୍ଧବନିତା ଏତେ ପସନ୍ଦ କରିଥିଲେ ଯେ ଶୋ’ଟି ପାଖାପାଖି ୮ ବର୍ଷ ପର୍ଯ୍ୟନ୍ତ ଲୋକଙ୍କୁ ବାନ୍ଧି ରଖିଥିଲା । ପ୍ରଯୋଜକ ମୁକେଶ୍ ଖାନ୍ନା ଏବଂ ନିର୍ଦ୍ଦେଶକ ଦିନକର ଜାନିଙ୍କ ଯୋଡ଼ି ୧୯୯୭ ରୁ ଟିଭି ପରଦାରେ ଯେମିତି ଯାଦୁ ଖେଳାଇ ଦେଇଥିଲା , ରିଲିଜ୍ ହୋଇଥିଲା ସୁପରହିରୋ ଟିଭି ଶୋ’ ଶକ୍ତିମାନ୍ । ଦୁରଦର୍ଶନ ଟିଭି ଚ୍ୟାନେଲରେ ଏହି ଶୋ’ ୧୯୯୭ ରୁ ଆରମ୍ଭ କରି ୨୦୦୫ ପର୍ଯ୍ୟନ୍ତ ଚାଲିଲା । ଏହି ସମୟରେ ଶୋ’ ଟି ୪୦୦ ଏପିସୋଡ୍ ସଂପୂର୍ଣ୍ଣ କରି ଦର୍ଶକଙ୍କ ହୃଦୟ ଜିତିଥିଲା । ଘରେ ଘରେ ପିଲାଙ୍କ ପ୍ରଥମ ପସନ୍ଦ ପାଲଟିଲା ଶକ୍ତିମାନ୍ ।

ବିଦେଶରେ ସୁପରମ୍ୟାନ୍ , ସ୍ପାଇଡରମ୍ୟାନ୍ , ବ୍ୟାଟ୍ସମ୍ୟାନର କ୍ରେଜ୍ ଚାଲିଥିବା ବେଳେ ଭାରତୀୟଙ୍କୁ ପାଗଳ କରିଥିଲେ ଶକ୍ତିମାନ୍ । ନାଲି ଆଉ ସୁନେଲି ରଙ୍ଗର ପୋଷାକ ତା’ସାଙ୍ଗକୁ ଚକ୍ର ଚିହ୍ନର ଡ୍ରେସ୍ ପିନ୍ଧି ପରଦାକୁ ଯେତେବେଳେ ମୁକେଶ୍ ଖାନ୍ନା ଚାଲିଆସୁଥିଲେ ଦର୍ଶକଙ୍କ ଭିତରେ ଯେମିତି ଉତ୍କଣ୍ଠା ବଢିଯାଉଥିଲା । ବର୍ତ୍ତମାନ ସମୟ ବଦଳିଛି ଧାରାବାହିକ ସରିଛି । କିନ୍ତୁ ଏବେବି ଶକ୍ତିମାନକୁ ଝୁରି ହେଉଛନ୍ତି ଦର୍ଶକ । ତେବେ ଆପଣ ବି ଯଦି ଶକ୍ତିମାନଙ୍କ ଫ୍ୟାନ୍ ତାହେଲେ ଖୁସି ହୋଇଯାଆନ୍ତୁ । କାରଣ ୧୯ ବର୍ଷର ଦୀର୍ଘ ଅପେକ୍ଷା ପରେ ଏହି ଶୋ’ ପୁଣି ପରଦାକୁ କମବ୍ୟାକ୍ କରିବାକୁ ଯାଉଛି । ଏହାର ଲେଟେଷ୍ଟ ଟିଜର୍ ମଧ୍ୟ ମେକର୍ସଙ୍କ ଦ୍ୱାରା ରିଲିଜ୍ କରିଦିଆଯାଇଛି । 

ଶୋ’କୁ ନେଇ ଅଭିନେତା ମୁକେଶ୍ ଖାନ୍ନା କୁହନ୍ତି , ମୋ ଆତ୍ମବିଶ୍ୱାସର ପ୍ରତିଛବି ହେଉଛି ଶକ୍ତିମାନ ଚରିତ୍ର । ମତେ ଲାଗେ ପଞ୍ଚଭୂତରେ ଶକ୍ତିମାନର ପୋଷାକ ତିଆରି । ମୁଁ ଯେତେବେଳେ ଅଭିନୟ କରେ କ୍ୟାମେରା ଭୁଲିଯାଏ । ୧୯୯୭ ରୁ ୨୦୦୫ ଭିତରେ ଆରମ୍ଭ କରିଥିବା ଦାୟିତ୍ୱକୁ ମୁଁ ପ୍ରତିଟି ଦର୍ଶକଙ୍କ ପାଖରେ ପୁଣିଥରେ ପହଂଚାଇବାକୁ ଚାହେଁ । ଆଜିର ପିଢୀ ପାଖରେ ନିଶ୍ୱାସ ନେବାକୁ ସମୟ ନାହିଁ ସବୁ ଦୌଡୁଛନ୍ତି । ସେମାନଙ୍କୁ ସ୍ଥିର ହେବାର ସମୟ ଆସିଛି । ଭିତରର ଜ୍ଞାନରେ ବୁଡ଼ ପକାଇଲେ ବ୍ରହ୍ମାଣ୍ଡ ଅନ୍ତଃମନରେ ହିଁ ପାଇପାରିବେ । ଏହା ହିଁ ହେଉଛି ଶକ୍ତିମାନର ଉଦ୍ଦେଶ୍ୟ , ଲୋକଙ୍କୁ ଜାଗୃତ କରାଇବା । ଶକ୍ତିମାନର ଗୀତ ମୁଁ ନିଜେ ଗାଇଛି କାରଣ ଏହାକୁ ଲୋକ ଅଧିକ ହୃଦୟଙ୍ଗମ କରିବେ । ଚାହିଁଥିଲେ ଡାଇଲଗ୍ ମାଧ୍ୟମରେ ବାର୍ତ୍ତା ପହଂଚାଇ ପାରିଥାନ୍ତି କିନ୍ତୁ ଗୀତର ମଧୁରତା ଲୋକଙ୍କୁ ଆକର୍ଷିତ କରିବ ଡାଇଲଗ୍ ତୁଳନାରେ । 

ମୁକେଶ୍ ଖାନ୍ନା ଏକତା କପୁରଙ୍କ ଉପରେ କହିଥିବା ଟିପ୍ପଣୀକୁ ନେଇ ମଧ୍ୟ ପ୍ରତିକ୍ରିୟା ରଖିଛନ୍ତି । .. ତେବେ ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନି କି ଶକ୍ତିମାନ୍ କେଉଁ ପରଦାରେ ପୁଣି ଯାଦୁ ଖେଳାଇବ । କିନ୍ତୁ ଦର୍ଶକଙ୍କୁ ରହିବ ସୁପରହିରୋ ଶକ୍ତିମାନର ଅପେକ୍ଷା ।