ଦିଲ୍ଲୀର ଆର୍ମି ପବ୍ଲିକ୍ ସ୍କୁଲ ଓ ବାୟୁସେନା ସ୍କୁଲକୁ ଇମେଲ୍ ମାଧ୍ୟମରେ ବୋମା ଧମକ

କନକବ୍ୟୁରୋ : ଦିଲ୍ଲୀର ବିଭିନ୍ନ ସ୍କୁଲରେ ବୋମା ଧମକ ଧାରା ଜାରି ରହିଛି। ପୁଣିଥରେ ଦିଲ୍ଲୀର ଦୁଇଟି ସ୍କୁଲକୁ ବୋମା ଧମକ ମିଳିଛି। ସ୍କୁଲଗୁଡ଼ିକୁ ବୋମା ମାଡ଼ କରି ଉଡ଼ାଇଦେବା ଧମକ ଆତଙ୍କ ସୃଷ୍ଟି କରିଛି। ସୁରକ୍ଷା ଏଜେନ୍ସିଗୁଡ଼ିକୁ ସତର୍କ କରାଯାଇଛି। ଉଭୟ ସ୍କୁଲରେ ତଲାସୀ ଅଭିଯାନ ଚାଲିଛି। ଧୌଲା କୁଆଁର ଆର୍ମି ପବ୍ଲିକ୍ ସ୍କୁଲ ଓ ଦିଲ୍ଲୀର ଲୋଧି ରୋଡରେ ଥିବା ବାୟୁସେନା ବାଲ ଭାରତୀ ସ୍କୁଲକୁ ବୋମା ଧମକ ମିଳିଛି। ଏହି ଧମକ ଇମେଲ୍ ମାଧ୍ୟମରେ ଦିଆଯାଇଛି ।

ଅଧିକ ପଢନ୍ତୁ... ନେପାଳରେ ମର୍ମନ୍ତୁଦ ଦୁର୍ଘଟଣା: ତ୍ରିଶୁଳି ନଦୀକୁ ଖସିଲା ଯାତ୍ରୀବାହୀ ବସ୍

ପୁଲିସ ଏବେ ଏହି ଇମେଲ୍‌ର ଉତ୍ପତ୍ତି ତଥା ଅପରାଧୀଙ୍କ ପରିଚୟ ତଦନ୍ତ କରୁଛି । ବୋମା ଧମକ ପରେ, ଉଭୟ ସ୍କୁଲକୁ ଖାଲି କରିଦିଆଯାଇଥିଲା। ତଦନ୍ତ ଏଜେନ୍ସିଗୁଡ଼ିକ ଏକ ପୁଙ୍ଖାନୁପୁଙ୍ଖ ତଲାସୀ ଅଭିଯାନ ଆରମ୍ଭ କରିଥିଲେ। ତଥାପି, ଏପର୍ଯ୍ୟନ୍ତ ଉଭୟ ସ୍ଥାନରେ କୌଣସି ସନ୍ଦେହଜନକ ଜିନିଷ ମିଳିନାହିଁ ।

ଦିଲ୍ଲୀ ଅଗ୍ନିଶମ ସେବା (ଡିଏଫ୍‌ଏସ୍‌)ର ଜଣେ ଅଧିକାରୀଙ୍କ ଅନୁଯାୟୀ, ସୋମବାର ଆର୍ମି ପବ୍ଲିକ୍ ସ୍କୁଲକୁ ଏକ ବୋମା ଧମକ ଇମେଲ୍ ମିଳିଥିଲା। ଯାହା ପରେ ସୁରକ୍ଷା ଏଜେନ୍ସିଗୁଡ଼ିକ କ୍ୟାମ୍ପସ୍‌ରେ ତଲାସୀ ଅଭିଯାନ ଆରମ୍ଭ କରିଥିଲେ।

ସେ କହିଛନ୍ତି, ସ୍କୁଲ ପ୍ରଶାସନକୁ ସକାଳେ କ୍ୟାମ୍ପସ୍‌ରେ ବିସ୍ଫୋରକ ଉପକରଣ ରଖାଯାଇଥିବା ଇମେଲ୍ ମାଧ୍ୟମରେ ଧମକ ଦିଆଯାଇଥିଲା। ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି, ଆମେ ଇମେଲର ଉତ୍ସ ବିଷୟରେ ତଦନ୍ତ କରୁଛୁ ଏବଂ ଏପର୍ଯ୍ୟନ୍ତ କିଛି ସନ୍ଦେହଜନକ ପାଇନାହୁଁ। ସତର୍କତାମୂଳକ ପଦକ୍ଷେପ ସ୍ୱରୂପ ସ୍କୁଲ ପରିସରକୁ ଖାଲି କରିଦିଆଯାଇଛି। ଇମେଲ୍‌ର ପ୍ରେରକଙ୍କୁ ଚିହ୍ନଟ କରିବା ପାଇଁ ସାଇବର ସେଲ୍‌ର ସାହାଯ୍ୟ ନିଆଯାଉଛି। ଅଧିକାରୀ କହିଛନ୍ତି, ଦିଲ୍ଲୀ ପୁଲିସ, ବୋମା ନିଷ୍କ୍ରିୟକାରୀ ଦଳ, କୁକୁର ଦଳ ଏବଂ ଅଗ୍ନିଶମ ବିଭାଗ ଦଳ ଘଟଣାସ୍ଥଳରେ ଉପସ୍ଥିତ ଅଛନ୍ତି।