କନକ ବ୍ୟୁରୋ :ମାଳମାଳ ସାର୍ଟିଫିକେଟ, ପୁଳାପୁଳା ମେଡାଲ୍ । ଅଶିରୁ ନବେ ଦଶକରେ ସେ କରିଥିଲେ ଅନେକ ନାଁ । ଓଡ଼ିଶାରୁ ବେଙ୍ଗାଲୁରୁ ସବୁଠି ସେ ଦେଖାଇଥିଲେ ନିଜ ବଡି ବିଲ୍ଡିଂର ଦକ୍ଷତା । ଆଶା କରିଥିଲେ ଖେଳ କୋଟାରେ ସରକାରୀ ଚାକିରି ଟିଏ କରିବେ ହେଲେ ସେ ଆଶା ଆଶାରେ ରହିଗଲା । ଆଉ ପେଟ ପୋଶିବାକୁ ଶେଷରେ ଠିକା କର୍ମଚାରୀ ଭାବେ କାମ କରୁଛନ୍ତି । ହେଲେ ଏଥିରେ ପରିବାର ଚଳାଇବା କଷ୍ଟ ହେବାରୁ ଶେଷରେ ନିଜ କଳାକୁ କାମରେ ଲଗାଇଲେ । ଆଉ ଏବେ ସକାଳେ ସନ୍ଧ୍ୟାରେ ଜିମରେ ଟ୍ରେନର ଭାବେ ପ୍ରଶିକ୍ଷଣ ଦେଉଛନ୍ତି । 

Advertisment

ରବି ଦାସ, ଘର କଟକ ସିଦ୍ଧେଶ୍ୱର ସାହି । ବୟସ 58, ହେଲେ ଶରୀର ଆଜି ବି ସଜେତ । ଠିକ ସେମିତି ଅଙ୍ଗଭଙ୍ଗୀ ଦେଖାଉଛନ୍ତି, ଯେମିତି ସେ ଯୁବ ବେଳେ ଦେଖାଇ ଚାମ୍ପିୟନ ହେଉଥିଲେ । ଜାତୀୟ ପ୍ରତିଯୋଗିତାରେ ଅଲ୍ ଇଣ୍ଡିଆ ଗୋଲ୍ଡ ମେଡାଲିସ୍ଟ, ଆଉ ଭାରତ କିଶୋର, ଭାରତ କୁମାର, ଭାରତ ଉଦୟୟ ଭଳି ଅନେକ ଉପାଧି ମଧ୍ୟ ସେ ପାଇଛନ୍ତି । ପ୍ରଶଂସକଙ୍କ ପୁଳା ପୁଳା ପ୍ରଶଂସା ସାଉଣ୍ଟିଥିଲେ , ଯୁବବର୍ଗଙ୍କ ମଡେଲ୍ ସାଜିଥିଲେ ହେଲେ ଏବେ ପୂରା ଅଲୋଡ଼ା । ବଡି ବିଲ୍‌ଡର୍ ଭାବେ ଦେଶରେ ଚମକିଥିଲେ ଚାକିରି ମିଳିଲାନି, ଖେଳାଳି ଭତ୍ତା ବି ମିଳୁନି । 

ରବି ଦାସଙ୍କ ବୟସ ୫୮ ବର୍ଷ ହେଲାଣି । ଏବେ ବି ଦୈନିକ ୨ ଘଣ୍ଟା ବ୍ୟାୟାମ୍ କରନ୍ତି । ଆଜିକାଲି ଜିମ୍ ଯାଉଥିବା ପ୍ରଶିକ୍ଷାର୍ଥୀଙ୍କ ସହ ପ୍ରତିଯେଗିତାକୁ ଓହ୍ଲାଇ ଦଣ୍ଡ, ବୈଠକ ଶହ ଶହ ସଂଖ୍ୟାରେ ମାରିଦିଅନ୍ତି । କିନ୍ତୁ ବ୍ୟାୟାମଶାଳାରୁ ବାହାରିବା ପରେ ଜୀବନ ସଂଘର୍ଷ ତାଙ୍କୁ ନାକେଦମ୍ କରେ । ପ୍ରତିଯୋଗିତାରେ କୃତିତ୍ଵ ସତ୍ତ୍ବେ ରବିଙ୍କୁ ଚାକିରି ଖଣ୍ଡେ ମିଳିଲାନି । ନେତାଙ୍କଠାରୁ ଆରମ୍ଭ କରି ମନ୍ତ୍ରୀ କେହି ତାଙ୍କ କଥା ବୁଝିଲେନି । ଶେଷରେ କଟକ ମହାନଗର ନିଗମରେ ପିଅନ ଚାକିରି ଟିଏ ପାଇଲେ । ଏଭିତରେ ପ୍ରାୟ ୩୦ ବର୍ଷ ବିତିସାରିଛି । ଅଥଚ ଏବେ ଯାଏ ସିଏମ୍ସିର ଦିନ ମଜୁରିଆ ଭାବେ ରବି କାମ କରୁଛନ୍ତି । ତାଙ୍କ ଚାକିରି ସ୍ଥାୟୀ ହୋଇପାରିନି । ସରକାରୀ ଚାକିରୀ ନ ପାଇ ରବିଙ୍କ ମନରେ ଯେତିକି ଅସନ୍ତୋଷ ହେଲେ ତାଙ୍କ ପସନ୍ଦର କ୍ରୀଡା ବଡି ବିଲଡିଂ ପ୍ରତି ତାଙ୍କର ସେତିକି ଭଲପାଇବା ଅଛି ଯାହା ତାଙ୍କୁ ଏହି ଖେଳ ସହିତ ଏହି ବୟସରେ ମଧ୍ୟ ଯୋଡ଼ି ରଖିପାରିଛି ।