ପାକିସ୍ତାନ ପାଇଁ ମୁଣ୍ଡବିନ୍ଧା ସାଜିବ ବିଏଲଏର ଡ୍ରୋନ୍ ଆର୍ମୀ, ଆକାଶରୁ କରିବ ଗୁଳି ବର୍ଷା

କନକବ୍ୟୁରୋ : ପାକିସ୍ତାନ ଓ ବଲୁଚିସ୍ତାନ ମଧ୍ୟରେ ବିବାଦ ଚରମ ସୀମାରେ ପହଞ୍ଚିଥିବା ବେଳେ ପାକିସ୍ତାନ ଆର୍ମୀ ଉପରେ ଏକ ବଡ଼ ବିପଦ ପଡ଼ିବାକୁ ଯାଉଛି। ଏଣିକି ପାକିସ୍ତାନ ସେନା ଉପରେ ଖାଲି ପାହାଡ଼ ଆର ପଟରୁ ନୁହେଁ , ଆକାଶରୁ ବି ଗୁଳି ବର୍ଷା ହେବ ।  ସେନାମୁଖ୍ୟ ଜେନେରାଲ୍ ଅସୀମ ମୁନିରଙ୍କର ଗୋଟି ଗୋଟି କରି ସବୁ ଅଭେଦ ଦୁର୍ଗକୁ ବି ମାଟିରେ ମିଶାଇ ଦିଆଯିବ। ଘରେ ବସି ପାକିସ୍ତାନ ସେନା ଉପରେ ଆକ୍ରମଣ କରିବ ବଲୁଚ ଆର୍ମୀ । ଏବେ ବଲୁଚିସ୍ତାନ ପାହାଡ଼ରୁ ସାମ୍ନାକୁ ଆସିଥିବା ଏକ ଭିଡିଓ ପାକିସ୍ତାନର ନିଦ ହଜାଇ ଦେଇଛି ।

ବଲୁଚ ଆର୍ମୀ ଏପର୍ଯ୍ୟନ୍ତ, ଗରିଲା ଯୁଦ୍ଧ ଲଢ଼ୁଥିଲା ।  ଭୂମିରେ ରହି ପାକିସ୍ତାନ ଆର୍ମୀ ଉପରେ ଗୁଳି ଗୋଳା ବର୍ଷା କରୁଥିଲା । କିନ୍ତୁ ଏବେ ବଲୁଚ ବିଦ୍ରୋହୀ ମାନେ ଆକାଶ ମାର୍ଗରୁ ଆକ୍ରମଣ କରିବେ ।  ବଲୁଚ ବିଦ୍ରୋହୀମାନେ ଏକ ଡ୍ରୋନ୍ ସେନା ପ୍ରସ୍ତୁତ କରିଛନ୍ତି ।  ଏହି ଡ୍ରୋନ୍ ସେନା ଜରିଆରେ ବଲୁଚ ବିଦ୍ରୋହୀ ମାନେ ପାକିସ୍ତାନ ଆର୍ମୀ ଉପରେ ଭରପୂର ଆକ୍ରମଣ କରିବେ । 
ଅପରେସନ୍ ହେରୋଫ୍ ୨.୦ 
ବଲୁଚ ଲିବରେସନ୍ ଆର୍ମି (ବିଏଲଏ) ପାକିସ୍ତାନୀ ପ୍ରତିରକ୍ଷା ବିଶେଷଜ୍ଞ ମାନଙ୍କୁ ଆଶ୍ଚର୍ଯ୍ୟ କରିଦେଇଛି  ।   ବିଏଲଏ ପ୍ରଥମ ଥର ଯୁଦ୍ଧ ଡ୍ରୋନ୍ ୟୁନିଟ୍, "କ୍ୟୁଏଏଚ୍ଆର୍" (କାଜି ଏରୋ ହାଇଭ୍ ରେଞ୍ଜର୍ସ), ପ୍ରସ୍ତୁତ କରିଛି ।  ବିଏଲଏ ଦ୍ୱାରା ପ୍ରକାଶିତ ଏକ ଦୁଇ ମିନିଟର ଭିଡିଓରେ ଏହାର ଲଢ଼ୁଆମାନେ ଦୁର୍ଗମ ପାହାଡ଼ ମଧ୍ୟରେ ଅତ୍ୟାଧୁନିକ ଡ୍ରୋନ୍ ପରୀକ୍ଷଣ କରୁଥିବା ଦେଖାଯାଇଛି ।  ସବୁଠାରୁ ଆଶ୍ଚର୍ଯ୍ୟଜନକ ଭାବରେ, ଏହି ୟୁନିଟ୍ ଅପରେସନ୍ ‘ହେରୋଫ୍ ୨.୦’ ଅନ୍ତର୍ଗତ ଚୀନ୍ ର ଡ୍ରିମ୍ ପ୍ରୋଜେକ୍ଟ ଓ ପାକିସ୍ତାନର ସାମରିକ ଦୁର୍ଗ, ଗ୍ୱାଦର ବନ୍ଦରକୁ ବି ଟାର୍ଗେଟ କରିଛି ।  

ଡ୍ରୋନ୍ ଆକ୍ରମଣ କେବଳ ସାମରିକ ଭିତ୍ତିଭୂମିକୁ ନଷ୍ଟ କରିନାହିଁ ବରଂ ଯୋଗାଯୋଗ ଲାଇନ୍ ମଧ୍ୟ ବିପର୍ଯ୍ୟସ୍ତ କରିଛି ।  ଏହି ନୂତନ ୟୁନିଟ୍, "କ୍ୟୁଏଏଚ୍ଆର୍", କେବଳ ଏକ ପରୀକ୍ଷଣ ନୁହେଁ ବରଂ ବିଏଲଏର ନୂତନ ଟେକନୋଲୋଜିର ଚେହେରା । ବରିଷ୍ଠ କମାଣ୍ଡର ଅବଦୁଲ ବାସିତଙ୍କ ଦ୍ୱାରା ନିର୍ମିତ, ଏହି ୟୁନିଟ୍ ଆକାଶ ମାର୍ଗରେ ନଜର ରଖିବା ଏବଂ ସଠିକ୍ ଆକ୍ରମଣ କରିବାରେ ମାହିର  ।  ବର୍ତ୍ତମାନ, ବଲୁଚ ବିଦ୍ରୋହୀମାନେ ମାଇଲ ଦୂରରୁ ପାକିସ୍ତାନୀ ସେନାର ଗତିବିଧି ଉପରେ ନଜର ରଖିପାରିବେ ଏବଂ ମାନବ ଜୀବନକୁ ବିପଦରେ ନ ପକାଇ ଅତର୍କିତ ଆକ୍ରମଣ କରିପାରିବେ  ।  ଏହା ପାକିସ୍ତାନୀ ସେନା ମୁଖ୍ୟ ଅସୀମ ମୁନିରଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି, କାରଣ ଶତ୍ରୁ ଆଉ ଦୃଶ୍ୟମାନ ହେବେ ନାହିଁ ବରଂ ଆକାଶ ମାର୍ଗରେ ଲୁଚି ରହି ଆକ୍ରମଣ କରିବ ।