ବିଜେପି ଫୋକସରେ ଦକ୍ଷିଣ ଓଡ଼ିଶା, ଦୁଇ ଦିନ ହେଲା ଡେରା ପକାଇଥିଲେ ପ୍ରଭାତୀ

କନକ ବ୍ୟୁରୋ: ରାଜ୍ୟର ସମସ୍ତ ୨୦ଲୋକସଭା ଆସନ ଦଖଲ କରିଥିଲା ବିଜେପି। କିନ୍ତୁ ଏକମାତ୍ର ଆସନ କୋରାପୁଟକୁ ହାତେଇବାରେ ସଫଳ ହୋଇଥିଲା କଂଗ୍ରେସ। ସେହିପରି କଂଗ୍ରେସର ୧୪ ବିଧାୟକଙ୍କ ମଧ୍ୟରୁ କେବଳ ଦକ୍ଷିଣରୁ ଆସିଥିଲେ ୬ଜଣ। କିନ୍ତୁ ଆଗକୁ ଯେମିତି ଏହି ଅଂଚଳରେ କଂଗ୍ରେସ ଆଗକୁ ନବଢ଼ିବ, ବିଜେପି ସବୁଠି ବାଜିମାତ କରିବ ସେଇ ରଣନୀତି ନେଇ ଆଗଉଛି ବିଜେପି। 

ଦକ୍ଷିଣ ଓଡ଼ିଶାରେ ଡେରା ପକାଇଛନ୍ତି ମୋହନଙ୍କ କ୍ୟାବିନେଟ୍। ଦୁଇ ଦିନ ହେଲା କୋରାପୁଟରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ସମେତ ଏକାଧିକ ମନ୍ତ୍ରୀ ଡେରା ପକାଇଥିବାବେଳେ ଆଜି ନିଜେ ପହଁଚିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ଆଉ ଜୟପୁରରେ ଆୟୋଜିତ ସଭାମଂଚରୁ ମୁଖ୍ୟମନ୍ତ୍ରୀ ଦକ୍ଷିଣ ଓଡ଼ିଶା ବିକାଶ ପରିଷଦ କଥା ଉଠାଇଛନ୍ତି। ତାଙ୍କ ସରକାର କେମିତି ଦକ୍ଷିଣ ଓଡ଼ିଶା ବିକାଶ ପରିଷଦ ପାଇଁ ପଦକ୍ଷେପ ନେଇଛି ତାର ହିସାବ ରଖିଛନ୍ତି। ଏଥିସହ କୋରାପୁଟକୁ ଆଜି ୭୬୧କୋଟି ଟଙ୍କାର ବିଭିନ୍ନ ପ୍ରକଳ୍ପ ଭେଟି ଦେଇଛନ୍ତି ମୋହନ। 

ଅଗଷ୍ଟ କ୍ରାନ୍ତି ଦିବସ ଅବସରରେ ବ୍ରହ୍ମପୁରରେ ଆୟୋଜିତ ତ୍ରିରଙ୍ଗା ଯାତ୍ରାରେ ସାମିଲ ହୋଇଛନ୍ତି। ବ୍ରହ୍ମପୁର, ଆସ୍କା ଓ କନ୍ଧମାଳର ବହୁ ନେତାଙ୍କ ସହ ପଦଯାତ୍ରା କରି ଦକ୍ଷିଣ ଓଡ଼ିଶା କେମିତି ବିଜେପି ଫୋକସରେ ରହିଛି ସେହି ବାର୍ତ୍ତା ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।  ବ୍ରହ୍ମପୁର ଟାଉନ ହଲଠାରେ ନେତାଜୀ ସୁଭାଷ ଚନ୍ଦ୍ର ବୋଷଭ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏହି ଅବସରରେ ସ୍ବାଧୀନତା ସଂଗ୍ରାମୀମାନଙ୍କ ଭୂମିକା ଓ ଅବଦାନକୁ ସ୍ମୃତିଚରଣ କରି କହିଛନ୍ତି, ‘ଅଗଷ୍ଟ କ୍ରାନ୍ତି ଦିବସ’ ସ୍ୱାଧୀନତା ସଂଗ୍ରାମକୁ ନୂଆ ଦିଗଦର୍ଶନ ଦେଇଥିଲା। ଏହା କେବଳ ଆନ୍ଦୋଳନ ନଥିଲା ବରଂ ଲୋକଙ୍କ ମଧ୍ୟରେ ସ୍ବାଧୀନତା ପାଇଁ ଅତୁଟ ବିଶ୍ବାସ ଏବଂ ଅଦମ୍ୟ ସାହାସର ପ୍ରତୀକ ଥିଲା। .. ବ୍ରହ୍ମପୁର ବିଶ୍ବବିଦ୍ୟାଳୟରେ ଆୟୋଜିତ କାର୍ୟ୍ୟକ୍ରମରେ ନାଁ ନନେଇ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କଟାକ୍ଷ କରିଛନ୍ତି ଧର୍ମେନ୍ଦ୍ର ପ୍ରଧାନ । 

ଗତ କିଛି ମାସ ହେଲା ରାଜ୍ୟ କ୍ୟାବିନେଟର ମନ୍ତ୍ରୀମାନେ ବାରମ୍ବାର ଦକ୍ଷିଣ ଓଡ଼ିଶା ଗସ୍ତ କରୁଛନ୍ତି। ଗଞ୍ଜାମ ସମେତ ଅବିଭକ୍ତ କୋରାପୁଟ ଜିଲ୍ଳାର ବିକାଶ ମୂଳକ କାର୍ୟ୍ୟର ସମୀକ୍ଷା କରୁଛନ୍ତି। କେନ୍ଦ୍ରର ଏକାଧିକ ମନ୍ତ୍ରୀ ଆସି ଡେରା ପକାଉଛନ୍ତି।