କନକ ବ୍ୟୁରୋ: ଯେବେଠୁ AIADMKର ନେତା ବିଜେପି ଚାଣକ୍ୟ ଅମିତ ଶାହାଙ୍କୁ ଭେଟିଛନ୍ତି, ସେବେଠୁ ସରଗରମ ହେଇଛି ତାମିଲନାଡୁ ରାଜନୀତି । ଗୋଟିଏ ପଟେ ବିଜେପି ଏବଂ ଏଆଇଏଡିଏମକେ ଭିତରେ ମେଣ୍ଟ ଚର୍ଚ୍ଚା ଜୋର ଧରିଥିବାବେଳେ, ଅନ୍ୟପଟେ ଖୁବଶୀଘ୍ର ବିଜେପିର ତାମିଲନାଡୁ ପ୍ରଦେଶ ଅଧ୍ୟକ୍ଷ କେ ଅନ୍ନାମଲାଇଙ୍କୁ ପଦରୁ ହଟାଯାଇପାରେ ବୋଲି ଚର୍ଚ୍ଚା ହେଉଛି । କୁହାଯାଉଛି, ଅନ୍ନାମଲାଇଙ୍କୁ ପ୍ରଦେଶ ଅଧ୍ୟକ୍ଷ ପଦରୁ ହଟାଇବା ବିଜେପି ଏବଂ ଏଆଇଏଡିଏମକେ ମଧ୍ୟରେ ହେବାକୁ ଯାଉଥିବା ମେଣ୍ଟର ଅୟମାରମ୍ଭ । ତେଣୁ ଜାତିଗତ ସନ୍ତୁଳନର ଦ୍ୱାହି ଦେଇ, ବିଜେପି ଖୁବଶୀଘ୍ର ତାମିଲନାଡୁରେ ନିଜର ନେତା ପରିବର୍ତ୍ତନ କରିପାରେ ।

Advertisment

ଅନ୍ନାମଲାଇ କିଏ?

ତାମଲନାଡୁ ରାଜନୀତିରେ କେ ଅନ୍ନମଲାଇ ହେଉଛନ୍ତି ଜଣେ ଚର୍ଚ୍ଚିତ ଚେହେରା । ୨୦୨୦ ମସିହାରେ ବିଜେପିରେ ଯୋଗ ଦେଇଥିବା ଅନ୍ନାମଲାଇ ତାଙ୍କର ଆକ୍ରମଣାତ୍ମକ ଏବଂ ସ୍ପଷ୍ଟବାଦୀ ନେତୃତ୍ୱ ଶୈଳୀ ପାଇଁ ବେଶ ଚର୍ଚ୍ଚାରେ ରହିଥାନ୍ତା । ସେ ତାମିଲନାଡୁରେ ବିଜେପିକୁ ଏକ ନୂତନ ପରିଚୟ ଦେବାକୁ ଚେଷ୍ଟା କରିଥିଲେ, କିନ୍ତୁ ତାଙ୍କର ଏହି ଆଭିମୁଖ୍ୟ ଏଆଇଏଡିଏମକେ ସହିତ ବିବାଦ ସୃଷ୍ଟି କରିଥିଲା । ହେଲେ ଏବେ ଦୁଇ ଦଳ ମଧ୍ୟରେ ମେଣ୍ଟର ସମ୍ଭାବନା ଚର୍ଚ୍ଚାରେ ରହିଛି । ଖାସ୍ କରି ୨୦୨୪ ଲୋକସଭା ନିର୍ବାଚନ ପରେ, ବିଜେପି ଦକ୍ଷିଣ ଭାରତରେ ନିଜର ପ୍ରଭାବ ବିସ୍ତାର କରିବା ପାଇଁ ଏବେ ଆଞ୍ଚଳିକ ଦଳଗୁଡ଼ିକ ସହିତ ଯୋଗାଯୋଗ ଉପରେ ଧ୍ୟାନ ଦେବା ଆରମ୍ଭ କରିଛି। ଏହାରି ଭିତରେ କିନ୍ତୁ ତାମିଲନାଡୁରେ ଏଆଇଏଡିଏମକେ ସହିତ ଅନ୍ନାମଲାଇଙ୍କ ସମ୍ପର୍କ ଭଲ ନାହିଁ । ଯେଉଁ କାରଣରୁ ସେ ଯେପର୍ଯ୍ୟନ୍ତ ବିଜେପିର ରାଜ୍ୟ ସଭାପତି ଅଛନ୍ତି, ସେପର୍ଯ୍ୟନ୍ତ ଏଆଇଏଡିଏମକେ ସହିତ ବିଜେପି ମେଣ୍ଟ ହେବାର କୌଣସି ସମ୍ଭାବନା ନାହିଁ ବୋଲି କୁହାଯାଉଛି । ତେଣୁ ତାଙ୍କୁ ସଭାପତି ପଦରୁ ହଟେଇ, ଏଆଇଏଡିଏମକେ ସହିତ ମେଣ୍ଟ କରିପାରେ ପଦ୍ମ ଦଳ ।

ମିଳିଥିବା ସୂଚନା ମୁତାବକ, ବିଜେପି ହାଇକମାଣ୍ଡ ଏବେ ତାମିଲନାଡୁରେ ଏପରି ଜଣେ ନେତାଙ୍କୁ ଖୋଜୁଛନ୍ତି ଯିଏ କେବଳ ଦଳର ବିଚାରଧାରାକୁ ଆଗକୁ ନେଇପାରିବେ ନାହିଁ ବରଂ ରାଜ୍ୟର ଜାତି ସମୀକରଣକୁ ମଧ୍ୟ ସନ୍ତୁଳିତ କରିପାରିବେ । ତାମିଲନାଡୁ ରାଜନୀତିରେ ଜାତି ଏକ ଗୁରୁତ୍ୱପୂର୍ଣ୍ଣ କାରଣ ହୋଇଛି । ଅନ୍ନାମଲାଇ ସାମ୍ପ୍ରତିକ ସମୟରେ ଯୁବପିଢ଼ି ଏବଂ ସହରୀ ଭୋଟରମାନଙ୍କ ମଧ୍ୟରେ ଲୋକପ୍ରିୟତା ହାସଲ କରିଛନ୍ତି, କିନ୍ତୁ ତାଙ୍କର ପ୍ରତିଛବିକୁ ଜଣେ ଧ୍ରୁବୀକରଣକାରୀ ନେତା ଭାବରେ ମଧ୍ୟ ଦେଖାଯାଉଛି। ତେଣୁ ତାଙ୍କୁ ହଟେଇ, ବିଜେପି ତାମିଲନାଡୁରେ ଜଣେ ନୂଆ ନେତାଙ୍କ ସନ୍ଧାନରେ ରହିଛି ।

ତେବେ ଏହି ସମ୍ଭାବ୍ୟ ପରିବର୍ତ୍ତନ ତାମିଲନାଡୁର ରାଜନୀତିରେ ହଇଚଇ ସୃଷ୍ଟି କରିଛି । କିଛି ରାଜନୈତିକ ବିଶ୍ଲେଷକଙ୍କ କହିବା କଥା ଯେ, ଅନ୍ନାମଲାଇଙ୍କ ପ୍ରସ୍ଥାନ ବିଜେପି ପାଇଁ ବିପଦପୂର୍ଣ୍ଣ ହୋଇପାରେ, କାରଣ ସେ ରାଜ୍ୟରେ ଦଳକୁ ଏକ ନୂତନ ଶକ୍ତି ଦେଇଥିଲେ । ଅନ୍ୟପକ୍ଷରେ ଆଉ କିଛି ଜଣଙ୍କ କହିବା କଥା, ଅନ୍ନାମଲାଇଙ୍କ ପ୍ରସ୍ଥାନ ପରେ ହିଁ ମେଣ୍ଟ ସହଜ ହେଇପାରିବ ।