ଉତ୍ତରପ୍ରଦେଶ ବିଜେପିରେ ଫାଟ, ସାମ୍ନାକୁ ଆସିଲେ ସାଂସଦ ରବି କିଶନ

କନକ ବ୍ୟୁରୋ : ଉତ୍ତରପ୍ରଦେଶରେ ବିଜେପି କନ୍ଦଳ ଏବେ ପଦାରେ ପଡିଛି । ଗୋରଖପୁର ସାଂସଦ ରବି କିଶନ ଏବେ ସିଧାସଳଖ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନାମରେ ଅଭିଯୋଗ ଆଣି କହିଛନ୍ତି କି, ଯୋଗୀ ମୋତେ ଟାର୍ଗେଟ୍ କରୁଛନ୍ତି । ରବି କିଶନଙ୍କ ଏଭଳି ବୟାନ ସେତେବେଳେ ଆସିଛି ଯେତେବେଳେ ତାଙ୍କ ନାମରେ ସରକାରୀ ଜମିରେ ଘର ନିର୍ମାଣ କରିଥିବା ଅଭିଯୋଗ ଆସିଛି । ଏକ ନାଳ ଉପରେ ରବି କିଶନ ଘର କରିଥିବା ନେଇ ବିଭାଗୀୟ ଅଧିକାରୀ ସୂଚନା ଦେବା ପରେ ରବି କିଶନ ତାର ଜବାବ ଦେଇଛନ୍ତି । ସେ ଉତ୍ତରପ୍ରଦେଶ ସରକାରଙ୍କ ଉର୍ଦ୍ଦେଶ୍ୟରେ କହିଛନ୍ତି କି, ମୋ ଘର ତଳେ କେଉଁଠି ନାଳ ଅଛି ସରକାର ଆସି ଖୋଜନ୍ତୁ । ପ୍ରଶାସନ ସହ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ସରକାରୀ ନାଳ ଉପରେ ରବି କିଶନ ଘର କରିଥିବା କଥା କହିଥିଲେ । ଏହାକୁ ନେଇ ସାଂସଦ ରବି କିଶନ କହିଛନ୍ତି, ଯୋଗୀ ସିଧାସଳଖ ମୋତେ ଟାର୍ଗେଟ୍ କରି ରାଜ୍ୟବାସୀଙ୍କ ଜଣାଇଛନ୍ତି କି ମୁଁ ସରକାରୀ ଜମି ଉପରେ ଘର କରିଛି । ଯଦି ମୁଁ ସରକାରୀ ଜମି ଉପରେ ଘର କରିଛି ତେବେ ଯୋଗୀ ସରକାର ତା ଉପରେ ବୁଲଡୋଜର ଚଳାନ୍ତୁ ବୋଲି ସେ ସିଧାସଳଖ ଯୋଗୀଙ୍କୁ ଚ୍ୟାଲେଞ୍ଜ କରିଛନ୍ତି । 

ମୁଖ୍ୟମନ୍ତ୍ରୀ ଯୋଗୀ ବୁଧବାର ଦିନ ୧୭୭ ପରିଯୋଜନାର ଲୋକାର୍ପଣ କାର୍ଯ୍ୟକ୍ରମରେ ଯୋଗଦେଇ କହିଥିଲେ କି, ବିଜେପିର ସ୍ଥାନୀୟ ସାଂସଦ ରବି କିଶନ ରାମଗଡ଼ ତାଲ ଅଞ୍ଚଳରେ ଏକ ନାଳକୁ ଦଖଲ କରି ତା ଉପରେ ଘର ନିର୍ମାଣ କରିଛନ୍ତି । ଏହା ସହରରୁ ପାଣି ନିଷ୍କାସନରେ ବାଧା ସୃଷ୍ଟି କରୁଛି, ଏବେ ରାଜ୍ୟର କେଉଁମାନେ ନାଳ ଉପରେ ଘର କରିଛନ୍ତି ତାହା ମେସିନ ସହାୟତାରେ ଚିହ୍ନଟ କରାଯାଉଛି ବୋଲି ଯୋଗୀ କହିଥିଲେ । 

ଯୋଗୀଙ୍କ ଏଭଳି ବୟାନ ଉପରେ ରବି କିଶନ କହିଛନ୍ତି, ମୁଁ ଜଣେ ଅଭିନେତା ସହ ସାଂସଦ ହୋଇଥିବାରୁ ମୋତେ ଟାର୍ଗେଟ୍ କରାଯାଉଛି । ହେଲେ ନାଳ ଉପରେ ଘର କରିଥିବା ନେଇ ସାଂସଦଙ୍କୁ ପ୍ରଶ୍ନ ପଚରାଯିବାରୁ ସେ କହିଛନ୍ତି କି, ଏଭଳି ଖବର ଶୁଣିବା ପରେ ମୁଁ ରାତି ସାରା ମୋ ଘର ତଳେ ନାଳ ଖୋଜିଲି, ହେଲେ କେଉଁଠି ବି ନାଳ ପାଇଲି ନାହିଁ । ମୁଁ ଯେଉଁଠି ଘର କରିଛି ସେନେଇ ଜିଡ଼ିଏ ଅନୁମତି ଦେଇଛି । ସେ ଆହୁରି କହିଛନ୍ତି କି, ଯୋଗୀ ଯେତେବେଳେ ତୀର ମାରନ୍ତି ସର୍ବପ୍ରଥମେ ମୋତେ ଲକ୍ଷ୍ୟ କରି ତୀର ମାରିଥାନ୍ତି ।