ଖାଇବାକୁ ଦେଲେ , ଗୋଡ଼ ଦବାଇଦେଲେ .. ମହାକୁମ୍ଭରେ ବୃଦ୍ଧାଙ୍କ ସେବାରେ ଲାଗିଲେ ବିଜେପି ବିଧାୟକ

ପବିତ୍ର ଭୂମି ପ୍ରୟାଗରାଜରେ ମହାକୁମ୍ଭମେଳାକୁ ଯିବାଆସିବା କରୁଥିବା ଶ୍ରଦ୍ଧାଳୁଙ୍କୁ ଉଚିତ୍ ସେବା ଯୋଗାଇଦେବା ପାଇଁ ବିଭିନ୍ନ ରାଜନୈତିକ ପାର୍ଟି ଏବଂ ସାମାଜିକ ସଂଗଠନ ପକ୍ଷରୁ ଠାଏଁ ଠାଏଁ ଜାଗାରେ କ୍ୟାମ୍ପ୍ ର ପ୍ରବନ୍ଧ କରାଯାଇଛି । ଯେଉଁଠାରେ ଶ୍ରଦ୍ଧାଳୁଙ୍କ ପାଇଁ ଖାଦ୍ୟପେୟର ବ୍ୟବସ୍ଥା କରାଯିବା ସହ ସେବା ଯୋଗାଇ ଦିଆଯାଉଛି । ଉତ୍ତରପ୍ରଦେଶର ସୋନଭଦ୍ର ଜିଲ୍ଲାରେ ଏଭଳି ଅନେକ କ୍ୟାମ୍ପ୍ ଲାଗିଛି । ଏହି କ୍ୟାମ୍ପ ଭିତରୁ ଭାରତୀୟ ଜନତା ପାର୍ଟି କାର୍ଯ୍ୟକର୍ତ୍ତାଙ୍କ ପକ୍ଷରୁ ଏକ କ୍ୟାମ୍ପ୍ ପ୍ରସ୍ତୁତ କରାଯାଇଛି । ଯେଉଁଥିରେ ବିଜେପି ବିଧାୟକ ଶ୍ରଦ୍ଧାଳୁଙ୍କ ସେବା କରୁଥିବାର ନଜର ଆସିଛନ୍ତି । ବର୍ତ୍ତମାନ ବିଧାୟକଙ୍କର ଏକ ଭିଡିଓ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି । ଯେଉଁଥିରେ ସେ ଜଣେ ବୃଦ୍ଧ ମହିଳାଙ୍କ ଗୋଡ଼ ଚିପୁଥିବାର ନଜର ଆସୁଛନ୍ତି ।

ଏହି ଭାଇରାଲ୍ ଭିଡିଓରେ ବିଜେପି ବିଧାୟକ ଶ୍ରଦ୍ଧାଳୁଙ୍କ ଗାଡ଼ିକୁ ଅଟକାଇ ସେଥିରୁ ବୃଦ୍ଧାଙ୍କୁ ଓହ୍ଲାଉଛନ୍ତି ଏବଂ ସେବା ଶିବିରକୁ ବୃଦ୍ଧାଙ୍କୁ ପାଛୋଟି ଆଣୁଛନ୍ତି । ଏହାପରେ ସେ ଭୋକିଲା ବୃଦ୍ଧାଙ୍କୁ ଖେଚୁଡି ଖାଇବାକୁ ଦେଇ ତାଙ୍କ ଗୋଡ଼ ଦବାଇ ଦେଉଛନ୍ତି । ବୃଦ୍ଧ ମହିଳାଜଣକ ପରିବାର ସହ ସଙ୍ଗମନଗରୀକୁ ମହାକୁମ୍ଭ ସ୍ନାନ ପାଇଁ ଆସିଥିଲେ ଏବଂ ବୁଡ଼ ପକାଇ ଗନ୍ତବ୍ୟ ସ୍ଥଳକୁ ବାହୁଡୁଥିଲେ ଠିକ୍ ଏହି ସମୟରେ ବୃଦ୍ଧାଙ୍କ ସେବାରେ ଲାଗିଲେ ବିଧାୟକ । ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ଏହି ଭିଡିଓ ୩ ଦିନ ପୁରୁଣା ବୋଲି କୁହାଯାଉଛି ।

ସୋନଭଦ୍ର ଜିଲ୍ଲାର ରବର୍ଟସଗଞ୍ଜର ହିନ୍ଦୁୱାରୀ ତିରାହା ଠାରେ ବିଜେପି ବିଧାୟକ ଭୂପେଶ ଚୌବେଙ୍କ ଦ୍ୱାରା ସେବାଭାବ ଶିବିର ଆୟୋଜନ କରାଯାଇଛି । ଏଠାରେ ପ୍ରୟାଗରାଜ ମହାକୁମ୍ଭକୁ ଆସୁଥିବା ଏବଂ ଯାଉଥିବା ଶ୍ରଦ୍ଧାଳୁମାନଙ୍କୁ ବିସ୍କୁଟ୍, ଚା-ପାଣି ଏବଂ ଖେଚୁଡି ପ୍ରଦାନ କରାଯାଉଛି । ଶିବିରରେ ବିଜେପି କର୍ମୀମାନେ ଶ୍ରଦ୍ଧାଳୁମାନଙ୍କ ସେବାରେ ନିୟୋଜିତ ଅଛନ୍ତି । ତିନି ଦିନ ପୂର୍ବେ ବିଧାୟକ ଭୂପେଶ ଚୌବେ ଶିବିରରେ ପହଞ୍ଚି ଶ୍ରଦ୍ଧାଳୁମାନଙ୍କ ସେବାରେ ଲାଗିପଡିଥିଲେ । ଏତିକିବେଳେ ଶ୍ରଦ୍ଧାଳୁମାନଙ୍କର ଏକ କାର ସେଠାରେ ଅଟକିଥିଲା । ସେମାନେ ମହାକୁମ୍ଭରୁ ସଙ୍ଗମ ସ୍ନାନ ସାରି ଘରକୁ ଫେରୁଥିଲେ । କାରରେ ଜଣେ ବୃଦ୍ଧା ମହିଳା ମଧ୍ୟ ଥିଲେ । ବିଧାୟକ ଯେତେବେଳେ ଜଣେ ବୃଦ୍ଧା ମହିଳାଙ୍କୁ ଦେଖିଲେ, ସେ ତୁରନ୍ତ କାର୍ ପାଖକୁ ଦୌଡ଼ିଗଲେ । ଉକ୍ତ ବୃଦ୍ଧାଙ୍କୁ ସାହାଯ୍ୟ କରି କାରରୁ ଓହ୍ଲାଇ ଆଣି ଶିବିରକୁ ନେଇ ଆସିଲେ । ବିଧାୟକ ମହିଳାଙ୍କୁ ଚୌକିରେ ବସାଇ ଖେଚୁଡ଼ି ଖାଇବାକୁ ଦେବା ସହ ତାଙ୍କର ହାତ ଗୋଡ଼ ମଧ୍ୟ ଦବାଇ ଦେଲେ । ତେବେ ବିଧାୟକଙ୍କ ସେବାଭାବର ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି । ଭୂପେଶ ଚୌବେ ରବର୍ଟସଗଞ୍ଜ ଆସନରୁ ବିଧାୟକ ଅଛନ୍ତି ।