ଓଡ଼ିଶାରେ କଳି, ଦିଲ୍ଲୀରେ କୋଳାକୋଳି ! ଏବେ ବି ଦ୍ୱନ୍ଦ୍ୱରେ ବିଜେଡି ଆଭିମୁଖ୍ୟ

କନକ ବ୍ୟୁରୋ : ଓଡ଼ିଶାରେ ଗର୍ଜନ ତର୍ଜନ, ହେଲେ ଦିଲ୍ଲୀରେ ମୌନ । ରାଜ୍ୟସଭାରେ ଅପରେସନ ସିନ୍ଦୂର ଆଲୋଚନା ବେଳେ କେନ୍ଦ୍ର ସରକାରଙ୍କ ବିରୋଧରେ ପଦୁଟିଏ କହିନି ବିଜେଡି । ବିଜେପିକୁ ନେଇ ବିଜେଡିର ଏଭଳି ଦୋମୁହାଁ ଆଭିମୁଖ୍ୟ କର୍ମୀ ଓ ନେତାଙ୍କୁ ସଂଶୟରେ ପକାଇଛି । ଦଳ ଏନ୍‌ଡିଏ ସହ ଅଛି ନା ବିରୋଧୀ ଭୂମିକାରେ ଅଛି ତାହା ବୁଝିପାରୁନାହାନ୍ତି କର୍ମୀ ।

୨୦୨୪ରେ ବିଜେଡି- ବିଜେପି ଆମ୍ନାସାମ୍ନା ହୋଇ ଲଢ଼ିଲେ । ନିର୍ବାଚନ ପରବର୍ତ୍ତୀ ସମୟରେ ପରସ୍ପର ବିରୋଧରେ ବିଷ ଉଗାରିଲେ । ରାଜ୍ୟରେ ଶାସକ-ବିରୋଧୀ ଭାବେ ତୁ ତୁ ମେଁ ମେଁ ହେଲେ । ପ୍ରତି ପ୍ରସଙ୍ଗରେ ବିଜେପି ସରକାରକୁ ଘେରାବନ୍ଦୀ କରୁଛି ବିଜେଡି । ରାଜରାସ୍ତାକୁ ଓହ୍ଲାଇ ମୋହନ ସରକାରଙ୍କୁ କାଠଗଡ଼ାକୁ ଟାଣୁଛି । ହେଲେ ଓଡ଼ିଶାରେ ବିଜେପି ପ୍ରତି ବିଜେଡିର ଥିବା କଠୋର ଆଭିମୁଖ୍ୟ ଦିଲ୍ଲୀରେ ନରମ ପଡ଼ିଯାଉଛି । ଗତକାଲି ରାଜ୍ୟସଭାରେ ଅପରେସନ ସିନ୍ଦୂର ଆଲୋଚନାରେ ବିଜେଡି ସାଂସଦଙ୍କ ଆଭିମୁଖ୍ୟ ଏନ୍‌ଡିଏ ପ୍ରୀତିକୁ ପଦାରେ ପକାଇଛି । ବିରୋଧୀ ଅପରେସନ୍‌ ସିନ୍ଦୂରକୁ ନେଇ କେନ୍ଦ୍ର ସରକାରଙ୍କୁ ପ୍ରଶ୍ନବାଣରେ ଘାଇଲା କରୁଛନ୍ତି । ହେଲେ ବିଜେଡି କ୍ଷେତ୍ରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । 

ସେନାର ପରାକ୍ରମକୁ ଭୂୟସୀ ପ୍ରଶଂସା କରିବାରେ ଅସୁବିଧା ନାହିଁ । ହେଲେ ବିରୋଧୀ ଭାବେ କେନ୍ଦ୍ର ସରକାରଙ୍କ ବିରୋଧରେ ପଦୁଟିଏ କହିବାକୁ କାହିଁକି ସାହସ ଜୁଟାଇ ପାରିନି ବିଜେଡି ? ଭୟ ରହିଛି ନା କିଛି ବାଧ୍ୟବାଧକତା ? ବିଜେଡି ଆଭିମୁଖ୍ୟ ନେଇ ପିସିସି ସଭାପତି କହିଛନ୍ତି, ସିବିଆଇ ଓ ଇଡିରେ ବିଜେଡି ନେତାଙ୍କ ବେକ ଲାଗିଛି । ସେଥିପାଇଁ ବିରୋଧୀ ଭୂମିକାକୁ ଆସିବାକୁ ଭୟ କରୁଛି ବିଜେଡି । ଜବାବରେ ବିଜେଡି କହିଛି, ସେନାର ବୀରତ୍ବକୁ ଦଳ ପ୍ରଶଂସା କରିଛି । ଆଗକୁ ଉପରାଷ୍ଟ୍ରପତି ନିର୍ବାଚନ । ଏହି ନିର୍ବାଚନ ବିଜେଡି ପାଇଁ ବଡ଼ ଅଗ୍ନିପରୀକ୍ଷା । କାରଣ ଦଳର ଅସ୍ପଷ୍ଟ ଆଭିମୁଖ୍ୟକୁ ନେଇ ବରିଷ୍ଠ ନେତାଙ୍କ ଭିତରେ ଅସନ୍ତୋଷ ଦାନା ବାନ୍ଧିଲାଣି ।