ନୂଆବର୍ଷରେ ନୂଆ ରୂପରେ ଆସିବ ବିଜେଡି । ରାଜରାସ୍ତାରେ ବିଜେପି ବିରୋଧରେ ଦେବ ରଣହୁଙ୍କାର ।

କନକ ବ୍ୟୁର: ଡବଲ ଇଞ୍ଜିନ ସରକାରର ମହଙ୍ଗା ମାଡ଼ ବିରୋଧରେ ବିଜେଡିର ରଣହୁଙ୍କାର । ଦରବୃଦ୍ଧିକୁ ବିରୋଧ କରି ଆସନ୍ତା ଜାନୁଆରୀ ୬ ତାରିଖରେ ଦଳବଳ ଘେନି ରାଜରାସ୍ତାକୁ ଓହ୍ଲାଇବ ବିଜେଡି । ଦୀର୍ଘ ୬ ମାସ ପରେ ଆକ୍ରମଣାତ୍ମକ ଆଭିମୁଖ୍ୟ ଆପଣାଇ ପୁଣିଥରେ ତୃଣମୂଳସ୍ତରକୁ ଯିବାକୁ ପ୍ରସ୍ତୁତ ହେଉଛି ବିରୋଧୀ ବିଜେଡି ।

ସରକାରରୁ ଯିବାର ଦୀର୍ଘ ୬ ମାସ ପରେ ନୀରବତା ଭାଙ୍ଗିଛି ବିଜେଡି । ନୂଆବର୍ଷରେ ନୂଆ ଷ୍ଟ୍ରାଟେଜିରେ ମୈଦାନକୁ ଆସିବ ଦଳ ।  ନବୀନଙ୍କ ଟିମ୍ ବିଜେପି ବିରୋଧରେ ଦେଇଛି ଯୁଦ୍ଧଂ ଦେହିଂ ଡାକରା । ରାଜ୍ୟରେ ଦରଦାମ ବୃଦ୍ଧିକୁ ବଡ ମୁଦ୍ଦା କରି ରାଜରାସ୍ତାକୁ ଓହ୍ଲାଇବ ବିଜୁ ଜନତା ଦଳ । 
-    ଜାନୁଆରୀ ୬ ତାରିଖରେ ଲୋକସେବା ଭବନ ସମ୍ମୁଖରେ ବିକ୍ଷୋଭ କରିବ ବିଜେଡି
-    ଭୁବନେଶ୍ବର ପରେ ସାରା ଓଡ଼ିଶାକୁ ଏ ଆନ୍ଦୋଳନ ନେବାକୁ ବିଜେଡିର ପ୍ରସ୍ତୁତି
-    ଦରଦାମ ବୃଦ୍ଧିକୁ ପ୍ରସଙ୍ଗ କରି ବିଜେପିକୁ ଶାଣିତ ଆକ୍ରମଣ କରିବ ଦଳ

ଏଥିପାଇଁ ନିଜର ସବୁ ମୋର୍ଚ୍ଚାକୁ ଏକାଠି କରି ଗଣମାଧ୍ୟମ ସାମ୍ନାକୁ ଆସିଛି ଦଳ । ଏହାସହ ରାଜ୍ୟ ସରକାରଙ୍କୁ ଦରବୃଦ୍ଧି ପାଇଁ ଦାୟୀ କରିଛି ବିଜେଡି । କ୍ଷମତାରୁ ହଟିବା ପରେ ସ୍ଥାଣୁ ଅବସ୍ଥାକୁ ଚାଲି ଯାଇଥିଲା ବିଜେଡି । ନା ଥିଲା ସ୍ପଷ୍ଟ ଆଭିମୁଖ୍ୟ, ନା ସରକାରଙ୍କୁ ଅକଳରେ ପକାଇ ପାରୁଥିଲା ଦଳ । ଯାହାକୁ ନେଇ ଦଳର କର୍ମୀ ଓ ନେତା ବିଜେଡିର ଭବିଷ୍ୟତକୁ ନେଇ ସନ୍ଦିହାନ ଥିଲେ । ଯେହେତୁ ଆଗକୁ ପଞ୍ଚାୟତ ଓ ପୌର ନିର୍ବାଚନ ରହିଛି ତେଣୁ ଆକ୍ରମଣାତ୍ମକ ଆଭିମୁଖ୍ୟ ପୋଷଣ କରି କର୍ମୀଙ୍କ ଜୋଶ ବଢାଇବାକୁ ଚେଷ୍ଟା କରିଛି ବିଜେଡି । ଯେଉଁଥିପାଇଁ ଏବେ ଆନ୍ଦୋଳନକୁ ଆଶ୍ରା କରିଛି ଦଳ । ଏହି ଆନ୍ଦୋଳନ ଜରିଆରେ ବିଜେଡି ନିଜର ଶକ୍ତି ପ୍ରଦର୍ଶନ କରିବାକୁ ଅଣ୍ଟା ଭିଡ଼ିଛି । ସେପେଟ ବିଜେଡିର ବିକ୍ଷୋଭ ଘୋଷଣାକୁ ନେଇ ମନ୍ତ୍ରୀ ରବି ନାୟକ କହିଛନ୍ତି, ନୂଆ ସରକାରଙ୍କ ନୂଆ ଯୋଜନାକୁ ସହିପାରୁନି ବିଜେଡି। ପୂର୍ବରୁ ବିଜେଡି କଣ କରିଛି ତାହା ଲୋକେ ଜାଣିଛନ୍ତି । 

ଦରଦାମ ବୃଦ୍ଧି ସହ ପୋଲାଭରମକୁ ନେଇ ବଡ ଆନ୍ଦୋଳନ କରିବାକୁ ବିଜେଡି ଷ୍ଟ୍ରାଟେଜି କରୁଛି । ଜନସାଧାରଣଙ୍କ ସହ ଯୋଡି ହୋଇଥିବା ସମସ୍ୟାକୁ ଏବେ ଅସ୍ତ୍ର କରି ଭରସା ଜିତିବାକୁ ଚାହୁଁଛି ଦଳ । କିନ୍ତୁ ଏହି ଆନ୍ଦୋଳନ ବିଜେଡି ପାଇଁ କେତେ ଲାଭଦାୟକ ହେବ ତାହା ଦେଖିବାକୁ ବାକି ରହିଲା ।