ବିଜେଡି କଳିକୁ ନେଇ ହେବ କି ବଡ଼ କାର୍ଯ୍ୟାନୁଷ୍ଠାନ; ୪ ଜଣ ନେତାଙ୍କୁ କାରଣ ଦର୍ଶାଅ ନୋଟିସ ଜାରି

କନକ ବ୍ୟୁରୋ : ଭୁବନେଶ୍ୱର ବିଜେଡି କଳିକୁ ନେଇ ହେବ କି ବଡ଼ କାର୍ଯ୍ୟାନୁଷ୍ଠାନ । ବିଜେଡିର ୪ ଜଣ ବିଜେଡି ନେତାଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ଭୁବନେଶ୍ୱର ଜିଲ୍ଲା ବିଜେଡି ସଭାପତି ସୁଶାନ୍ତ ରାଉତ ନୋଟିସ ଜାରି କରିଛନ୍ତି । ୪ ଜଣ ନେତା ହେଲେ ଅମରେଶ ଜେନା, ବିରଞ୍ଚି ନାରାୟଣ ମହାସୁପକାର, ରାଜେଶ ପାତ୍ର, ବିବେକ ସ୍ୱାଇଁଙ୍କୁ ସୋକଜ ନୋଟିସ ଜାରି କରି ରିପୋର୍ଟ ମଗାଯାଇଛି । କାହିଁକି ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ ନାହିଁ, ତାର ଉତ୍ତର ୧୫ ଦିନ ଭିତରେ ଦେବାକୁ ନୋଟିସରେ ଉଲ୍ଲେଖ ରହିଛି ।

କିଛି ଦିନ ତଳେ ଶଙ୍ଖଭବନରେ କର୍ପୋରେଟରଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଦଳର ତୁଙ୍ଗ ନେତାଙ୍କ ଉପସ୍ଥିତିରେ ଗଣ୍ଡଗୋଳ ହେବା ପରେ ଭୁବନେଶ୍ୱର ବିଜେଡିରେ ଠିକଠାକ୍ ଚାଲି ନାହିଁ ବୋଲି ଜଣାପଡିଥିଲା । ଏହାକୁ ନେଇ ଉଭୟ ପକ୍ଷରୁ ଥାନାରେ ଏତଲା ମଧ୍ୟ ଦିଆଯାଇଛି । ଦଳୀୟ ଫୋରମ ଛାଡି ନେତାଙ୍କ ବିବାଦ ମାମଲା ଥାନାକୁ ଯିବା ପରେ ଏବେ ଭୁବନେଶ୍ୱର ବିଜେଡି ସୋକଜ ନୋଟିସ ଜାରି କରିଛି ।

ଭୁବନେଶ୍ୱର ବିଜେଡ଼ିରେ ହଲଚଲ୍‌ । ସେପଟେ ପୁରୀରେ ବିଜେଡ଼ି କର୍ପୋରେଟରଙ୍କ ମେଳି । ପୁରୀରେ ପହଞ୍ଚି ଲୋକନାଥଙ୍କୁ ଦର୍ଶନ କରିଛନ୍ତି ୩୦ ଜଣ ବିଜେଡି କର୍ପୋରେଟର । ବିଜେଡିର ସମସ୍ତ କର୍ପୋରେଟର ଏକାଠି ହୋଇ ବସରେ ଲୋକନାଥ ଦର୍ଶନ ପାଇଁ ଶ୍ରୀକ୍ଷେତ୍ର ଯାଇଛନ୍ତି । ବିଜେଡ଼ିର ବିଦ୍ରୋହୀ କର୍ପୋରେଟର ଅମରେଶ ଜେନା ଓ ବିରଞ୍ଚି ନାରାୟଣ ମହାସୂପକାରଙ୍କ ବିରୋଧରେ ମେଳି ହୋଇଥିବା ସୂଚନା ମିଳିଛି ।