କନକ ବ୍ୟୁରୋ: ଭୋଟ୍ ଚୋରି ପ୍ରସଙ୍ଗରେ ପୁଣି ମୋଦୀ ସରକାରକୁ ଘେରିଲେ ରାହୁଲ ଗାନ୍ଧୀ । ବିହାରରେ ରାହୁଲ ଗାନ୍ଧୀ ଭୋଟର ଅଧିକାର ଯାତ୍ରା ଚଲାଇଥିବାବେଳେ, ୧୨ ତମ ଦିନରେ ସୀତାମଢୀର ଜାନକୀ ମାତା ମନ୍ଦିର ଦର୍ଶନ କରିବା ସହିତ ସେଠାରେ ଲୋକଙ୍କୁ ସମ୍ବୋଧିତ କରିଛନ୍ତି । ଏହି ସମ୍ବୋଧନରେ ରାହୁଲ ସିଧା ସିଧା ନିର୍ବାଚନ ଆୟୋଗଙ୍କୁ ଟାର୍ଗେଟ୍ କରିବା ସହିତ ବିଜେପି ଉପରକୁ ତୀର ମାରିଛନ୍ତି । ରାହୁଲ କହିଛନ୍ତି, ଆମେ ଭୋଟ୍ ଚୋରି ହେବାକୁ ଦେବୁନି । ଏହି ଲୋକମାନେ ପ୍ରଥମେ ଆପଣଙ୍କ ଭୋଟ୍ ନେବେ, ଆଉ ତା ପରେ ରାସନ୍ କାର୍ଡ ଆଉ ଆଧାର କାର୍ଡକୁ ମଧ୍ୟ ଟାର୍ଗେଟ୍ କରିବେ । 

Advertisment

ରାହୁଲ ଆହୁରି ମଧ୍ୟ କହିଛନ୍ତି ଯେ, ଆମକୁ ଜଣାଅଛି ବିହାର ନିର୍ବାଚନରେ ଭୋଟ୍ ଚୋରି କରିବାକୁ ଉଦ୍ୟମ କରାଯାଉଛି । ଏଥିପାଇ ଆମେ ଭୋଟ୍ ଅଧିକାର ଯାତ୍ରା ଆରମ୍ଭ କରିଛୁ । ତେବେ ନିର୍ବାଚନ ଆୟୋଗ ଜାଣିବା ଉଚିତ ଯେ, ବିହାରର ଲୋକ ସଚେତନ ହେଲେଣି ଆଉ ସେମାନେ ଭୋଟ୍ ଚୋରି ହେବାକୁ ଦେବେନି । ଏହାସହ ଦଳିତମାନଙ୍କୁ ସମ୍ବୋଧିତ କରି ରାହୁଲ କହିଛନ୍ତି, ଆପଣମାନେ ମନେ ରଖିବା ଉଚିତ ସ୍ୱାଧୀନତା ପୂର୍ବରୁ ଆପଣଙ୍କ ଅବସ୍ଥା କଣ ଥିଲା । ଆପଣଙ୍କୁ ସେତେବେଳେ ମାଡ଼ ମରାଯାଉଥିଲା । ଅଛୁଆଁ ଭଳି ବ୍ୟବହାର କରାଯାଉଥିଲା । ସମ୍ବିଧାନ ହିଁ ଆପଣଙ୍କୁ ଅଧିକାର ଦେଇଥିଲା । ହେଲେ ବିଜେପି କିନ୍ତୁ ଆପଣଙ୍କ ପାଖରୁ ସେହି ଅଧିକାର ଛଡ଼ାଇ ନେବାକୁ ଚାହୁଛି ବୋଲି ରାହୁଲ କହିଛନ୍ତି ।

ଅନ୍ୟପଟେ ବିଜେପି ଭୋଟ୍ ଚୋରି କରୁଛି । ଏହାପୂର୍ବରୁ ମଧ୍ୟ ବିଜେପି ଭୋଟ୍ ଚୋରି କରୁଥିଲା । ଏବେଯାଏଁ କେବଳ କର୍ଣ୍ଣାଟକର ପ୍ରମାଣ ଆମେ ଦେଇଛୁ । ହେଲେ ଆଗାମୀ ଦିନରେ ଲୋକସଭା ନିର୍ବାଚନ ଏବଂ ହରିୟାଣା ନିର୍ବାଚନର ମଧ୍ୟ ଆମେ ପ୍ରମାଣ ଦେବୁ ବୋଲି ରାହୁଲ କହିଛନ୍ତି । ଆମେ ପ୍ରମାଣ କରି ଦେଖାଇବୁ ବିଜେପି ଏବଂ ଆରଏସଏସ୍ ଭୋଟ୍ ଚୋର ବୋଲି କହିଛନ୍ତି ରାହୁଲ ଗାନ୍ଧୀ ।